شاردارادا جاڭا سپورت كەشەنى اشىلدى

ەل تاۋەلسىزدىگىنىڭ 25 جىلدىعى قۇرمەتىنە شاردارادا جاڭادان بوي كوتەرگەن سپورت كەشەنى سالتاناتتى تۇردە اشىلىپ, ىسكە قوسىلدى, دەپ حابارلادى اۋدان اكىمدىگىنىڭ ءباسپاسوز قىزمەتى. اشىلۋ سالتاناتىندا اۋدان اكىمىنىڭ مىندەتىن اتقارۋشى تۇرسىنقۇل بايتۇرعانوۆ قۇتتىقتاۋ ءسوز سويلەدى. «ارداقتى اعايىن! بۇگىن شاعالالى وڭىردە ءزاۋلىم سپورت كەشەنى پايدالانۋعا بەرىلىپ جاتىر. وبلىستىق بيۋدجەتتەن بولىنگەن 368 ملن 995 مىڭ تەڭگەگە 260 ورىندىق زاماناۋي ۇلگىدە سپورت عيماراتى تۇرعىزىلدى. الەمدىك داعدارىسقا قاراماستان وسىنداي الەۋمەتتىك نىسانعا مەملەكەت تاراپىنان قارجى ءبولىنۋى ەلىمىزدىڭ ەكونوميكالىق جاعدايىنىڭ قارقىندى دامىپ كەلە جاتقانىنا دالەل بولا الادى», - دەدى ول. شاردارالىقتاردىڭ قۋانىشىن سپورت سالاسىنىڭ ارداگەرى باقىت جاڭبىرباەۆ, وبلىستىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى ايتجان بەرداشوۆ, اۋداننىڭ ارداگەر سپورتشىسى ورازباي نازاربەكوۆ, جانە باسقالار ءبولىسىپ, جاڭا عيماراتتان الەم تانيتىن سپورت جۇلدىزدارى شىعا بەرۋلەرىنە تىلەكتەستىگىن ءبىلدىردى. ايتا كەتكەن ءجون, جاڭا عيماراتتا №2 اۋداندىق بالالار مەن جاسوسپىرىمدەر سپورت مەكتەبى ورنالاسادى. مۇندا  بوكس, قازاق كۇرەسى, دزيۋدو, گرەك-ريم كۇرەسى, ەركىن كۇرەس, تاەكۆوندو, جەڭىل اتلەتيكا, فۋتبول جانە شاحمات ءتارىزدى سپورت تۇرلەرى بويىنشا 1200 جاس  جاتتىقپاق. سپورت كەشەنىنىڭ عيماراتىندا وبلىستىق دەڭگەيدەن باستاپ, رەسپۋبليكالىق جانە حالىقارالىق دەڭگەيدەگى جارىستار ۇيىمداستىرىلاتىن بولادى. رەسمي تۇردە پايدالانۋعا بەرىلگەن جاڭا سپورت كەشەنىندە وسى كۇنى العاشقى ويىندار باستالىپ كەتتى. اۋداندىق دەنە شىنىقتىرۋ جانە سپورت ءبولىمىنىڭ ۇيىمداستىرۋىمەن جاسوسپىرىمدەر اراسىندا قازاق كۇرەسىنەن وڭتۇستىك قازاقستان وبلىسىنىڭ كۋبوگى ءۇشىن تۋرنير ۇيىمداستىرىلىپ, وعان شىمكەنت قالاسى مەن باسقا دا اۋدانداردان جاس پالۋاندار قاتىستى. تارتىستى وتكەن پالۋاندار سايىسىندا شاردارا اۋدانىنىڭ سپورتشىلارى كوماندالىق ەسەپ بويىنشا ءبىرىنشى ورىندى جەڭىپ الدى. ال ەكىنشى ورىندى تۇركىستان قالاسىنىڭ جاس پالۋاندارى ەنشىلەسە, ءىىى ورىن شىمكەنت قالاسىنان كەلگەن سپورتشىلارعا بۇيىردى. جەڭىمپازدار سىي-سياپاتپەن ماراپاتتالىپ, ءى ورىنعا 300 مىڭ, ءىى ورىنعا 200 مىڭ, ءىىى ورىنعا 100 مىڭ تەڭگە جۇلدە تاپسىرىلدى.