بۇگىن جازۋشىلار وداعىندا اقىن, كومپوزيتور, اكتەر ەرمۇرات زەيىپحاننىڭ 50 جىلدىعى اياسىندا اتقارىلاتىن شارالار تۋرالى پرەسس-كونفەرەنتسيا ءوتتى ءارى اقىننىڭ «دۇنيە عاپىل» اتتى شىعارمالار جيناعى جارىق كوردى.
شاراعا حالىق جازۋشىسى قابدەش ءجۇمادىلوۆ, قر جازۋشىلار وداعى توراعاسىنىڭ ءبىرىنشى ورىنباسارى عالىم جايلىباي, جازۋشىلار وداعى توراعاسىنىڭ ورىنباسارى جاناربەك ءاشىمجان, قىتايتانۋشى, تاريحشى-عالىم ءنابيجان مۇحامەتحان ۇلى, اقىن الماسبەك احمەتبەك ۇلى قاتىسىپ, ەرمۇرات زەيىپحاننىڭ شىعارماشىلىعى مەن ءومىرى جايىندا كەڭ ماعلۇمات بەردى.
قابىرعالى قالامگەر قابدەش ءجۇمادىلوۆ: «ەرمۇرات تالانتىمەن, تاعدىرىمەن, ونەرىمەن جانە بولەك بولمىسىمەن ءبارىمىزدى مويىنداتتى. ونى كۇنى كەشەگى سەرىلەردەي كوردىك. ولەڭى قانداي, پروزاسى قانداي, اندەرى قانداي ەدى؟ «كوك تۋدىڭ جەلبىرەگەنى» بۇگىندەرى بارشا قازاقتىڭ جاتقا ايتاتىن انىنە اينالدى. «كۇنەس-ايى» تۋعان جەر تۋرالى قۇيىلىپ تۇسكەن بىرەگەي تۋىندى ەدى. ونىڭ 70-كە جۋىق ءانى بار, ورىنداۋشىسى تابىلسا ەلدىڭ رۋحىن كوتەرەتىن سۇبەلى تۋىندىلارعا كەندە ەمەس. ولەڭدەرىندەگى سىربازدىق, شىنشىلدىق جايىندا ءالى دە بولسا تەرەڭىرەك زەرتتەۋ كەرەك», – دەدى.
ال ن. مۇحامەتحان ۇلى: «ناعىز پاتريوت كىم دەسە – ەرمۇراتتى, ناعىز دەگدار جان كىم دەسە – ەرمۇراتتى, ناعىز قاراپايىم ونەر يەسى كىم دەسە – تاعى دا ەرمۇراتتى ايتۋعا بولادى. ول ءوزىنىڭ ادال دا شىنايى بولمىسىمەن بارىمىزگە سىيىمدى, ۇلگى بولعان ازامات», – دەدى.
الداعى سارسەنبى كۇنى كەشكى ساعات 18.00-دە اۋەزوۆ تەاترىندا ەرمۇرات زەيىپحاندى ەسكە الۋعا ارنالعان «ەكى دۇنيەدە جالعىزىم – قازاقستان» اتتى شىعارماشىلىق كەش وتەدى. كەشتە بەلگىلى ونەر جۇلدىزدارى ەرمۇرات زەيىپحاننىڭ اندەرىن شىرقايدى.
