اپتا ىشىندە مۇناي باعاسى قالاي قۇبىلادى؟

لوندوننىڭ ICE قور نارىعىندا بۇگىنگى برەنت ماركالى مۇناي باعاسى $53,97 دەيىن تومەندەدى. ال امەريكاندىق WTI ماركالى مۇناي باررەلىنىڭ باعاسى $51,18 دەيىن ءتۇستى. وسىلايشا, جۇما كۇنىنە دەيىن ۇزدىكسىز ءۇش كۇن قاتارىنان قىمباتتاعان قارا التىن وسى اپتانى قولايسىز باستاپ وتىر. ال كەشە ءدال وسى قور نارىعىندا برەنت ماركاسى باررەلىنە 54,43 دوللارعا جەتكەن ەدى. بۇل وتكەن اپتاداعى ورتاشا باعادان 15 پايىزعا ارتىق بولاتىن. باعانىڭ بۇلاي كۇرت قىمباتتاۋىنا سەبەپ بولعان وتكەن سارسەنبىدەگى وپەك ۇيىمىنىڭ ءوندىرىستى ازايتۋ تۋرالى ورتاق شەشىمى ءالى دە بولسا ءوز ناتيجەسىن بەرگەن جوق. ويتكەنى, ساراپشىلاردىڭ ايتۋىنشا, بارلىق ماسەلە 10 جەلتوقساندا شەشىلەدى. ەستەرىڭىزگە سالا كەتەيىك, وپەك-كە مۇشە مەملەكەتتەر مەن ۇيىمعا كىرمەيتىن وزگە ەكسپورتتاۋشى ەلدەر ۆەنادا 10 جەلتوقسان كۇنى قايتا كەزدەسەتىن بولىپ شەشكەن. ونداعى ماقسات وتكەن اپتادا قول جەتكىزگەن كەلىسىم اياسىندا ناقتى قاي ەلدىڭ قانشا كولەمدە مۇناي ءوندىرىسىن ازايتاتىنىن شەشۋ. ۇيىمعا مۇشە مەملەكەتتەر قازىرگى تاڭدا 33,6 ملن باررەل قارا التىن وندىرۋدە. قاڭتاردىڭ بىرىنەن باستاپ بۇل كورسەتكىشتى ۇيىم بولىپ 32,5 ملن باررەلگە ازايتۋ جوسپارى بار. وسى ورايدا ۇيىمنىڭ ەڭ ءىرى مۇشەسى ساۋد ارابياسى 0,5 ملن باررەلگە ازايتىپ, تاۋلىگىنە ءوندىرىستى 10,54 ملن باررەلگە تۇسىرەدى. ال ۇيىمداعى كولەمى جاعىنان ەكىنشى ورىنداعى يراك 4,351 ملن باررەلگە قىسقارتادى. ال ءۇشىنشى ورىنداعى يران 3,797 ملن باررەلدەن اسىرماۋى ءتيىس. وپەك-كە كىرمەيتىن مەملەكەتتەر بولسا, ءوندىرىستى تاۋلىگىنە 0,6 ملن باررەلگە ازايتۋى كەرەك. سونىڭ 0,3 ملن باررەلى رەسەيدىڭ موينىندا. قالعان 0,3 ملن باررەلدى قازاقستان, ءازىربايجان, مەكسيكا, كولۋمبيا, ومان, بوليۆيا, ەگيپەت, باحرەين, نورۆەگيا, كانادا, تريناد پەن توباگو ەلدەرى ءوزارا ءبولىپ الماق. وسى ورايدا قازاقستاننىڭ ناقتى قانشا باررەل ازايتاتىنى ازىرگە بەلگىسىز. وسى شارتتار ورىندالىپ جاتسا, ساراپشىلاردىڭ ايتۋىنشا, باعا 60 دوللارعا دەيىن جەتۋى ءتيىس. سونىمەن قاتار, بۇل شارتتاردىڭ تەك كەلەر جىلدىڭ ءبىرىنشى جارتىجىلدىعىنا عانا قاتىستى ەكەنىن ايتا كەتۋ كەرەك. ۇيىم مۇشەلەرى جىل ورتاسىندا كەزەكتى رەت كەزدەسىپ, 2017 جىلدىڭ شىلدە-جەلتوقسان ارالىعىنداعى ءوندىرىس كولەمىنىڭ قانداي بولاتىنىن تالقىلاۋى كەرەك. ەگەر, ءبىرىنشى جارتىجىلدىقتا اتالعان مىندەتتەمەنى ءار ەل مۇلتىكسىز ورىنداسا, شيكىزات نارىعى ءبىر قالىپقا تۇسپەك. دەگەنمەن, ساراپشىلار, وپەك-ءتىڭ ءوندىرىستى ازايتۋى اقش-تاعى سلانتستىق مۇناي ءوندىرىسىن كوبەيتۋگە الىپ سوعۋى مۇمكىن ەكەنىن ايتۋدا. ويتكەنى, وپەك كەلىسىمىنىڭ اقش وندىرىسىنە كۇشى جۇرمەيدى. سونىمەن قاتار ساراپشىلار اتالعان كەلىسىمشارت مىندەتتەمەلەرىنىڭ باسقا ەلدەردى بىلاي قويعاندا, وپەك-ءتىڭ ءوزىنىڭ ورىندايتىنىنا كۇمانمەن قارايدى. ويتكەنى اتالعان ۇيىم ەشقانداي دا رەسمي كۇشكە يە ەمەس. قالاي دەگەندە دە, وسى اپتادا مۇناي نارىعى وتكەن اپتاداعى شەشىمنىڭ العاشقى ناتيجەلەرىن كورسەتپەك. ال سەيسەنبى, سارسەنبى, جۇما كۇندەرى اقش-تاعى مۇناي قورى ينستيتۋتى مەن Baker Hughes ۇيىمى اپتا سايىنعى مالىمەتتەرىن جاڭارتادى. باۋىرجان مۇقانوۆ