المات ءيسادىلدىڭ شىعارماشىلىق كەشى ءوتتى

...بارىنە مەنى ۇيرەتكەن – اكەمنەن قالعان جىلىلىق, شەشەمنەن قالعان جىلىلىق. جانە دە ولەڭنەن قالعان ۇلىلىق, - دەپ جىرلاپ, سول ولەڭگە دەگەن ۇلىلىقتىڭ جەتەگىمەن بۇگىنگى قازاق پوەزياسى كوشىنىڭ الدىڭعى قاتارىنا شىققان اقىن المات ءيسادىلدىڭ «اسپانتاۋ», «ءبىر تامشى» جىر جيناقتارىنىڭ تۇساۋكەسەرىنە وراي, «ەلىم باردا...» اتتى تاۋەلسىزدىكتىڭ 25 جىلدىعىنا ارنالعان شىعارماشىلىق كەشى ءوتتى. م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ لىق تولى ۇلكەن زالىنان ورىن جەتپەسە دە, كەش سوڭىنا دەيىن تاپجىلماستان تىك تۇرىپ جىر تىڭداعان ولەڭسۇيەر قاۋىمعا قاراپ, جۇرتشىلىقتىڭ شىنايى پوەزياعا, ناعىز اقىن جىرلارىنا سۋساعان كوڭىلىن كورگەندەي بولدىق. قالانىڭ قىم-قۋىت كۇيبەڭ تىرلىگىنەن ءبىر ساتكە قول ءۇزىپ, كەشقۇرىم شاقتا المات اقىننىڭ كەشىنە اعىلعاندار كوڭىل تۇكپىرىندەگى كومەسكى تارتقان الدەبىر قۇندى اسىلدارىن قايتا تاۋىپ, قوڭىرسالقىن تارتقان جۇرەككە جىر تەڭىزىنەن ولەڭ-قاسىقپەن ىستىق اعىس قۇيىپ قايتقانداي عاجاپ اسەرگە بولەندى دەسەك ارتىق ايتپاسپىز. قازاقستان جازۋشىلار وداعىنىڭ جانە قازاقستان جۋرناليستەر وداعىنىڭ مۇشەسى, اقىن, اۋدارماشى, جۋرناليست, قازاق ۇلتتىق اگرارلىق ۋنيۆەرسيتەتىنىڭ قوعاممەن بايلانىس جانە رەداكتسيالىق قىزمەت باسقارماسىنىڭ ديرەكتورى المات مۇرات ۇلى ءيسادىلدىڭ بۇعان دەيىن دە «جولدار, جولدار...», «كوڭىلالاڭ», «كوكجيەككە سىڭگەن جول» اتتى جىر كىتاپتارى مەن «مەن – قازاقتىڭ بالاسى» بالالارعا ارنالعان ولەڭدەر جيناعى شىققان بولاتىن. وسى كەشتە ۇلىقبەك ەسداۋلەت, عالىم جايلىباي سياقتى ايتۋلى اقىندار, نۇرتىلەۋ يمانعالي سياقتى تانىمال جۋرناليستەر اقىننىڭ «اسپانتاۋ» جانە «ءبىر تامشى» اتتى ەكى بىردەي كىتابىنىڭ تۇساۋىن كەستى. «المات ءيسادىل – قازىرگى قازاق پوەزياسىنىڭ بۇگىنگى ۇكىلەگەن ءۇمىتى, ەرتەڭگى ۇلكەن سەنىمى» – دەپ, ءىنى-اقىنعا ءوز باعاسىمەن بىرگە باتاسىن دا بەردى اعا-اقىن ۇلىقبەك ەسداۋلەت. «ءاردايىم كوز تىگىپ زاڭعارعا, سۇيەنىپ ءوستىم مەن تاۋلارعا. تاۋلاردان ۇيرەندىم ءتوزۋدى, تاعدىرىم تالكەككە سالعاندا...» – دەپ, حانتاڭىرىدەي اسپانتاۋلى ولكەسىن, تاۋەلسىز ەلىنىڭ كەشەگى مەن بۇگىنگى جەتىستىگىن, ەرتەڭگى ءۇمىتىن, ازاماتتىق پەن ادامگەرشىلىكتى سىنعا سالىپ تۇرار قاتال ءومىردىڭ ۋىتتى ساتتەرى مەن قىمبات تا ءتاتتى شاقتارىن شىعارمالارىنا وزەك ەتكەن اقىن كوزى قاراقتى وقىرمانعا تالانتتى اۋدارماشى رەتىندە دە تانىس. ولجاس سۇلەيمەنوۆتەي ءبىرتۋار اقىننىڭ ءبىراز ولەڭىن قازاقشاعا شەبەر اۋدارعان المات ءيسادىل ا.پۋشكين, س.ەسەنين, م.لەرمونتوۆ, ي.سەۆەريانين سياقتى ورىس اقىندارىنىڭ, بىرقاتار تۇرىك شايىرلارىنىڭ تۋىندىلارىن قازاق تىلىندە سويلەتىپ قانا قويماي, قازاق پوەزياسىنىڭ كەيىنگى وكىلدەرىنىڭ شىعارمالارىن ورىس تىلىنە دە اۋدارۋمەن اينالىسىپ ءجۇر. حالىقارالىق «شابىت» فەستيۆالىنىڭ ديپلومانتى, بىرنەشە جىر ءمۇشايرالارىنىڭ جۇلدەگەرى, قازاق ادەبيەتى جانە جۋرناليستيكا سالاسىنداعى جەتىستىكتەرى ارقىلى 2013 جىلى «ەرەن ەڭبەگى ءۇشىن» مەملەكەتتىك مەدالىمەن ماراپاتتالعان المات ءيسادىل شىعارماشىلىعىن باعالاي بىلگەن جەرلەستەرى,  الماتى وبلىسى رايىمبەك اۋدانى اكىمدىگى اقىنعا «رايىمبەك اۋدانىنىڭ قۇرمەتتى ازاماتى» دەگەن اتاق بەرىپ, كەشكە ارنايى الىپ كەلگەن سىي-سياپاتتارىن تابىس ەتتى. قازاقتىڭ قاسيەتتى قارا ولەڭىن جانىنا سەرىك ەتكەن اقىننىڭ بىرقاتار ولەڭدەرىنە جازىلعان اندەر ادەمى كەشتىڭ, اسەرلى كەشتىڭ شىرايىن كەلتىرە ءتۇستى. ميرا بايبەك, «ەگەمەن قازاقستان» الماتى سۋرەتتى تۇسىرگەن مامىرجان بوتابەكوۆ