ەلوردادا زاڭسىز قار توككەندەرگە ايىپپۇل سالىندى

جىل باسىنان بەرى قالانىڭ تابيعات قورعاۋ پوليتسياسىنىڭ قىزمەتكەرلەرى كوشەدەگى جانە جولداعى قاردى رۇقسات ەتىلمەگەن جەرلەرگە زاڭسىز توككەن 22 اۆتوكولىك جۇرگىزۋشىسىن اكىمشىلىك جاۋاپكەرشىلىككە تارتتى, دەپ حابارلادى استانا اكىمدىگىنىڭ رەسمي سايتى. استانا قالاسى ءىىد جەرگىلىكتى پوليتسيا قىزمەتىنىڭ حابارلاۋىنشا, جۇرگىزۋشىلەرگە 509 040 تەڭگە كولەمىندە ايىپپۇل سالىندى. «قىسقى كەزەڭدە قالا اۋماعىن جيناۋ ەرەكشەلىكتەرى» اباتتاندىرۋ ەرەجەلەرىنە سايكەس (استانا ق. ءماسليحاتىنىڭ شەشىمىمەن بەكىتىلگەن, 5 ءبولىم, 60 ت.), كوشەدەگى جانە جولداعى قاردى ارنايى دايىندالعان الاڭدارعا شىعارۋ قاجەت. قاردى (قوقىسسىز) مىنا مەكەنجايلار بويىنشا شىعارۋعا رۇقسات ەتىلگەن: «الماتى» اۋدانى – جەلەزنودوروجنىي ت.ا., اسكەري بولىمشەنىڭ سىرتىندا. «سارىارقا» اۋدانى – ن. تىلەنديەۆ داڭعىلى, «تايم» جقس اۋدانى. «ەسىل» اۋدانى – روجدەستۆەنكا تاس جولى, «رۋبەج» بەكەتىنىڭ سىرتىندا, وڭ جاقتا, سونداي-اق, سۋ تازارتقىش قۇرىلىستارىنىڭ اۋدانىندا 27-ءشى كوشەدە بالقىتۋ ستانتسياسى بار.