تەلەۆيزياداعى تۇڭعىش «تۇمار» جۇلدەسى تابىستالدى

اقپارات جانە كوممۋنيكاتسيالار مينيسترلىگىنىڭ قولداۋىمەن «قازمەديا» ورتالىعىنىڭ كونتسەرت زالىندا «تۇمار» ءى ۇلتتىق تەلەۆيزيالىق جۇلدەسى تاپسىرىلدى. قى­زىلدى-جاسىلدى كيىم كيىپ قىرمىزىداي قۇلپىرعان تەلە­ۆي­زيا­داعى قىز-كەلىنشەكتەر مەن شال­بارلارىنىڭ قىرى سىنباعان ەر ازاماتتار «تۇمار» جۇلدە­سىنىڭ تاپسىرىلۋ راسىمىنە ايرىق­شا دايىندالىپ كەلگەندەرى كورى­نىپ تۇردى. ولار قىزىل كىلەم­نىڭ ۇستىنەن تۇپ-تۋرا ەكى ساعاتتا ءجۇرىپ وتكەن سوڭ جۇلدەنى تاپسىرۋ سالتاناتى دا باستالىپ كەتتى. «تۇمار» جۇلدەسى وتاندىق تەلەۆيزيا تاريحىندا تۇڭعىش رەت تاعايىندالىپ وتىر. كىم الادى دەگىزىپ كوپشىلىكتى تىقىرشىتقان جۇلدە 12 اتالىم بويىنشا تاپسىرىلىپ, «تۇمار» ەسكەرتكىش مۇسىنشەلەرى ۇسىنىلدى. ەڭ الدىمەن ساراپشىلار 12 اقپاننان باستاپ وسى جۇلدەنى الۋ ءۇشىن جولدانعان ماتەريالداردى قاراپ, باعالاپ, ەڭ سوڭىندا لايىقتى شەشىم شىعارعانىن اتاپ ءوتۋىمىز قاجەت. ءبىر ايدىڭ كولەمىندە ۇيىم­داستىرۋ كوميتەتىنە تەلەارنالار مەن پروداكشن-ستۋديالاردان 200-دەن استام ءوتىنىم كەلىپ تۇسكەن. ال پارلامەنت سەناتىنىڭ دە­پۋ­تاتى جابال ەرعاليەۆ, «قازاق­ستان رەسپۋبليكاسى پرەزيدەنتىنىڭ تەلە­راديوكەشەنى» اق باس دي­رەك­­تورى ەرلان بەكحوجين, قا­زاق­­ستان ءباسپاسوز كلۋبىنىڭ پرەزي­دەنتى اسەل قاراۋىلوۆا, «ميلو­سەرديە» قايىرىمدىلىق قورى­نىڭ دي­رەكتورى ارۋجان ساين, تەلە­ۆيزيا سالاسىنىڭ تانىمال جۋر­نا­ليستەرى يمانعالي ءنۇرتى­لەۋ­ ۇلى, بي­بىگۇل جەكسەنباي, الەك­ساندر اك­سيۋتيتس, ت.ب بىرقاتار مامان­دار­دان قۇرالعان قازىلار القاسى ءوتى­نىمدەردىڭ اراسىنان 12 اتالىم بو­يىنشا جەڭىمپازداردى انىقتادى. سونىمەن, جابىق داۋىس بەرۋ ارقىلى ەلىمىزدەگى بۇكىل رەسپۋب­ليكالىق تەلەارنالار اراسىنداعى بايگەدە «ەڭ ۇزدىك الەۋمەتتىك جوبا» اتالىمى بويىنشا «قا­زاق­ستان» ۇلتتىق ارناسىنىڭ «اي­تۋعا وڭاي» باعدارلاماسى ءجۇل­دەگەر اتاندى. «ەڭ ۇزدىك ايماقتىق الەۋ­مەتتىك باعدارلاما» اتالىمىندا اقتوبە قالاسىنداعى «ريكا تۆ» ارناسىنىڭ «گورود سەگودنيا» باعدارلاماسى توپ جاردى. «ەڭ ۇزدىك اقپاراتتىق باعدارلاما» اتالىمىندا «31 ارنانىڭ» قازاق جانە ورىس تىلدەرىندەگى «ينفورم­بيۋرو» جاڭالىقتار قىزمەتىنە جۇلدە تاپسىرىلدى. ال «ەڭ ۇزدىك ايماقتىق اقپا­رات­تىق باعدارلاما» رەتىندە «قا­زاقستان-اتىراۋ» تەلەارناسىنىڭ «اداسقاندار» باعدارلاماسى «تۇمار» جۇلدەسىمەن ماراپاتتال­دى. «ەڭ ۇزدىك ءازىل-سىقاق باع­دار­لاماسى» اتالىمىنداعى جۇلدەنى «بالاپان» ارناسىنىڭ «كۇلەگەش» باع­دارلاماسى جەڭىپ السا, «قا­­­زاقستان» ۇلتتىق ارناسىنىڭ «اكە» تەلەسەريالى «ەڭ ۇزدىك تە­لە­­­ۆي­زيالىق تەلەحيكايا» دەپ تانىل­دى. «ەڭ ۇزدىك مۋزىكالىق باع­دار­لاما» اتالىمىندا «TV Key» كومپانياسىنىڭ «مۋزىكالنىي پەرفورمانس» باعدارلاماسى موينى وزىق شىقسا, «ەڭ ۇزدىك توك-شوۋ» رەتىندە كتك تەلەارناسىنىڭ «ناشا پراۆدا: «سۋدبا چەلوۆەكا» باعدارلاماسى بايگەدەن كەلدى. «ەڭ ۇزدىك اقپاراتتىق-تالدامالى» باعدارلاما اتالىمىندا «قازاق­ستان» ۇلتتىق ارناسىنىڭ «Apta.kz» باعدارلاماسى, «ەڭ ۇزدىك دە­رەك­­تى كينو» اتالىمىندا «حابار» اگەنتتىگىنىڭ «تاينى ي سۋدبى ۆەليكيح كازاحوۆ» ءفيلمى «تۇمار» جۇلدەسىمەن ماراپاتتالدى. «تەلەۆيزيالىق ماۋسىمنىڭ ەڭ ۇزدىك وقيعاسى» «Atameken busi­ness channel» ارناسىنىڭ اشى­لۋى بولسا, «تەلەۆيزيانىڭ دا­مۋىنا قوس­قان ۇلەسى ءۇشىن» اتالىمى بويىن­شا قوعام قايراتكەرى, بەلگىلى كوسەم­سوزشى سۇلتان ورازا­لى ماراپات­تالدى. تەلەۆيزيا سالاسىنا ارنالعان سالتاناتتى شارانىڭ سوڭىن الا قۇتتىقتاۋ ءسوز سويلەگەن اقپارات جانە كوممۋنيكاتسيالار ءمينيسترى داۋرەن اباەۆ مەرزىمدى ءباسپاسوز بەن ينتەرنەت-جۋرناليستيكا سالاسىندا دا وسى تەكتەس سىيلىق تاعايىندالاتىنىن ايتىپ ءوتتى. «بۇگىن اقپارات جانە كوممۋنيكاتسيالار مينيسترلىگىنىڭ اتىنا كوپتەگەن جاقسى سوزدەر ايتىلدى. بۇل – ءبىز ءۇشىن ۇلكەن ابىروي. ەندىگى جۇلدە ءباسپاسوز سالاسى مەن ينتەرنەت-جۋرناليستيكاعا, ونلاين-باسىلىمدارعا ارنالادى», – دەدى ول. ايگۇل سەيىلوۆا, «ەگەمەن قازاقستان» سۋرەتتى تۇسىرگەن ورىنباي بالمۇرات, «ەگەمەن قازاقستان»