قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ جۋرناليستەرمەن كەزدەسۋىندە تاۋەلسىزدىكتىڭ العاشقى جىلدارىنداعى جاعدايدى ەسكە الدى.
ء"بىرىنشى پارلامەنتىمىز 1992 جىلى سايلاندى. ول كوممۋنيستىك پارلامەنت بولدى. سەبەبى ادامداردىڭ كەڭەس ۇكىمەتىندە قالىپتاسقان وي-ساناسى سول جۇيەدە بولدى. ول كەزدە قازىرگى جاعدايدى بىلمەدىڭ دەپ تە ەشكىمدى كىنالاۋعا بولمايدى. بىراق, بىزگە بۇرىنعى جاعدايدى ارتتا قالدىرىپ, نارىققا ءوتۋ كەرەك بولدى. سول كەزدە ءبىز ەشبىر زاڭ قابىلداي المادىق. پارلامەنتىمىز زاڭ قابىلداۋ كەرەك بولدى. بىراق, قابىلدامادى. تۇسىنبەدى.
مەن كەلىپ, پارلامەنتتە وتىرىپ, ءاربىر زاڭدى ءتۇسىندىردىم. نەگە ولاي جاساۋ كەرەكتىگىمىزدى, باپتار تۋرالى ءبارىن ايتتىم. ءتىپتى, ولار قورىقتى دەسەك تە بولادى. قورىققاندىقتان قابىلداعىسى كەلمەدى. جەكەشەلەندىرۋ تۋرالى ايتساق, ونى قالاي بەرەمىز دەپ ويباي سالدى. سوندىقتان, سول جەردە پارلامەنتتى تاراتۋعا تۋرا كەلدى. سودان كەيىن جاۋاپكەرشىلىكتىڭ بارلىعىن پرەزيدەنت وزىنە الۋعا تۋرا كەلدى.
سول كەزدە مەن 147 زاڭ كۇشى بار جارلىققا قول قويدىم. بۇل جارلىقتاردا نارىقتىق ەكونوميكاعا قاجەتتى ورتا جانە شاعىن بيزنەس, جەكەشەلەندىرۋ, ينۆەستيتسيا ماسەلەلەرى قارالدى. تەك سونىڭ ارقاسىندا عانا تمد-نىڭ باسقا ەلدەرىنىڭ الدىنا تۇستىك. تەك سونىڭ ارقاسىندا عانا ءبىز تمد-نىڭ الدىنا تۇستىك. پرەزيدەنتتىك بيلىك بۇگىنگى جەتىستىكتەرگە جەتۋىمىزگە سەپتىگىن تيگىزدى", دەدى ەلباسى.
سونىمەن قاتار, پرەزيدەنت ءوزىنىڭ وسى ۋاقىت ارالىعىندا ديكتاتورعا دا, اۆتوكراتقا دا اينالماعانىن, بىراق قاجەت كەزدە قاتالدىق تانىتقانىن ايتتى.
"قاتالدىق بولدى. سەبەبى, بارلىق قابىلدانعان باعدارلامالار مەن جۇمىستاردىڭ ورىندالۋىن, ونىڭ ناتيجەسىن باقىلادىم. مىنە, 25 جىلدا وسىنداي ناتيجەگە جەتىپ وتىرمىز. قازىر كەدەيلىك ازايدى, ەڭبەكاقى ارتتى. قازاقستان قازىر وزگەرگەندىكتەن, وكىلەتتىكتەردى ءبولۋ قاجەتتىلىگى تۋدى. مىسالى, مەن بۇرىنعى كونستيتۋتسيا بويىنشا زاڭ قابىلدايتىنمىن نەمەسە ەكونوميكالىق باعدارلامالاردى مەن بەكىتەتىنمىن. زاڭ قابىلداۋ پارلامەنتكە بەرىلدى. ال باعدارلامالاردى ۇكىمەت دايىنداسىن, ءوزى قابىلداسىن دا ءوزى باقىلاسىن. جاۋاپكەرشىلىكتى موينىنا السىن. بيلىك ءبىر ادامنىڭ توڭىرەگىندە بولماۋى كەرەك. بۇل زامان تالابى", دەدى پرەزيدەنت. ەلباسى قازاقستاندا پرەزيدەنتتىك بيلىكتىڭ قالاتىنىن ايتىپ, كونستيتۋتسيالىق وزگەرىستەر ۋاقىتىمەن بولىپ جاتقانىن جانە ول ەلىمىزگە قىزمەت ەتەتىنىن جەتكىزدى.
