سىبايلاس جەمقورلىقپەن بۇكىل ەل بولىپ كۇرەسۋىمىز كەرەك - نازارباەۆ

جۋرناليستەرمەن سۇحبات كەزىندە قازاقستان پرەزيدەنتى نۇرسۇلتان نازارباەۆ جەمقورلىقپەن كۇرەس, ونىڭ جەڭۋ جولدارى تۋرالى ويلارىن ايتتى. "جەمقورلىقپەن بۇكىل الەمدە كۇرەسىپ جاتىر. بىراق ءالى ەشبىر ەل ونى تولىق جەڭدىك دەپ ايتا المايدى. شەگىنەن شىققان كەزدە كوررۋپتسيا مەملەكەتتىڭ قاۋىپسىزدىگىنە قاتەر توندىرەدى. اسىرەسە, ەكونوميكاسىن جاڭا دامىتىپ جاتقان جاس ەلدەر ءۇشىن بۇل ۇلكەن پروبلەما. قىتايدا ول ءۇشىن قانشاما ادام وسى ۋاقىتقا دەيىن اتۋ جازاسىنا كەسىلدى. بىراق كۇرەس ءبارىبىر توقتامايدى. جەمقورلىقتى جەڭۋ ءۇشىن اتقاراتىن شارۋا كوپ. مەملەكەتتىك قىزمەتتىڭ جالاقىسىن ءوسىرۋ كەرەك, ول ءوزىن جانە وتباسىن ەركىن اسىراي الاتىن بولۋى كەرەك. قازىر مەملەكەتتىك قىزمەتكەرلەر قاتاڭ بايقاۋدان وتەدى. ياعني, ادامدى كوشەدەن اكەپ قىزمەتكە قويۋ سالۋ دەگەن بولمايدى. ەڭ مىقتىلار, ەڭ ۇزدىكتەر تاڭدالادى. ءبىز تۇرعىندارعا ايتقىمىز كەلەدى. ءبىز بۇكىل ەل بولىپ قانا بۇل دەرتتى جەڭە الامىز. ول نە دەگەن ءسوز؟ ول ۇرلىقپەن, جەمقورلىقپەن بارشا حالىق بولىپ كۇرەسۋ دەگەن ءسوز. سينگاپۋردە مىناداي تاجىريبە بار. ەگەر ۇجىمدا ءبىر قىزمەتكەر پارا العىسى كەلسە, ونى بىلگەن جاعدايدا ارىپتەسى حابارلاسۋى كەرەك. ايتپەسە, ول پاراقورمەن بىرگە جازالانادى. ارينە, بۇل ءبىز ءۇشىن تىم قاتاڭ جازا بولار ەدى. «بولاشاق» باعدارلاماسىمەن وقىعان جاس مينيستر ۇستالدى.  ول دوستارىمەن بىرلەسىپ سىبايلاس توپ قۇرعان. قازىر تەكسەرۋ ءجۇرىپ جاتىر. ارينە, سوت شەشىمى شىققان جوق. بىراق بۇل ءىس توقتامايدى. قىلمىسكەرلەر جازاسىن الادى, ۇرلانعان قارجى مەملەكەتكە قايتارىلادى.