ءدىني احۋالدى ساۋىقتىرۋ وتە ماڭىزدى

قاراعاندىدا وبلىستىق پروكۋراتۋرانىڭ جانىنداعى زاڭدىلىقتى قامتاماسىز ەتۋ جونىندەگى كونسۋلتاتيۆتىك كەڭەستىڭ وتىرىسى ءوتتى. ونىڭ جۇمىسىنا بارلىق مەملەكەتتىك ورگانداردىڭ, ۇكىمەتتىك ەمەس ۇيىمداردىڭ, بيزنەس قاۋىمداستىقتارى جانە ءدىن وكىلدەرى قاتىستى. وبلىس اكىمدىگىندە وتكەن جيىندى قاراعاندى ەكونوميكالىق ۋنيۆەرسيتەتىنىڭ رەكتورى ەرقارا ايماعامبەتوۆ جۇرگىزدى. ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا بەرىلگەن, قوعامدا راديكالدىق كورىنەستەرگە مۇلدەم توزبەۋشىلىك كوزقاراسىن قالىپتاستىرۋ تۋرالى تاپسىرماسىنا سايكەس, وبلىس پروكۋراتۋراسى الەۋمەتتىك-ەكونوميكالىق پروبلەمالاردى شەشۋگە باعىتتالعان «تۇرعىنداردىڭ سەنىمى» جوباسىن جۇزەگە اسىرۋدا. – قۇقىق قورعاۋ ورگ اندارىنىڭ حالىقپەن ءوزارا قارىم-قاتىناسىن نىعايتۋ − ءبىزدىڭ باستى ماقساتىمىز. ازاماتتارعا ءتارتىپ تەك پوليتسياعا عانا ەمەس, ارقايسىمىزعا بايلانىستى ەكەنىن جەتكىزۋ. قۇقىق بۇزۋشىلىق تۋرالى كەز كەلگەن حابارلاما ماڭىزدى. وسىعان دەيىن اتالعان ماسەلەلەر بويىنشا 150-دەن استام شارا وتكىزىلدى. ۇيلەر بويىنشا باسشىلاردى بەلگىلەپ, اۋدانداردى سەكتورلارعا ءبولىپ, ءار سەكتورعا ۋچاسكەلىك ينسپەكتور بەكىتتىك. جالعا بەرىلەتىن پاتەرلەر, داستۇردەن تىس ءدىني اعىمداردىڭ مۇشەلەرى, كۇدىكتى ادامدار جينالاتىن ورىندار, جاعدايسىز وتباسىلارى تۋرالى 600-دەن استام حابارلاما ءتۇستى, – دەيدى وبلىس پروكۋرورىنىڭ ورىنباسارى م.تاۋتەنوۆ. جيىندا ءسوز بولعانداي, ءوڭىردىڭ الەۋمەتتىك-ەكونوميكالىق جانە ءدىني جاعدايلارىن ساۋىقتىرۋ ماسەلەلەرى بويىنشا 350-دەن استام شارا وتكىزىلىپ, 100-دەن استام تۇرعىنعا كومەك كورسەتىلگەن. سونىمەن قاتار, دەربەس پروفيلاكتيكالىق شارالار وتكىزۋ بارىسىندا, قويىلعان ماقساتتارعا جەتۋ ءۇشىن قۇرامىنا بىلىكتى ماماندار كىرگەن توپتار قۇرىلعان. ولاردىڭ كوپشىلىگى مەملەكەتتىك قىزمەتشىلەر ەمەس, دارىگەرلەر, تەولوگتار, پسيحولوگتار, بيزنەس-قوعامداستىقتىڭ جانە ءدىن وكىلدەرى. كەڭەسكە قاتىسۋشىلار وبلىس پروكۋرا­تۋرا­سىنىڭ باستامالارىنا قولداۋ كورسەتتى. الەۋمەتتىك پروبلەمالاردى شەشۋ قوعامدىق تۇراق­تىلىققا جاعىمدى ىقپال ەتەتىنى اتالدى. تالقىلاۋ بارىسىندا وتكىزىلىپ جاتقان جۇمىس­تاردىڭ تيىمدىلىگىن ارتتىرۋعا باعىتتالعان كەڭەستەر مەن ۇسىنىستار ايتىلدى. ميراس اسان, «ەگەمەن قازاقستان» قاراعاندى