ارۋلار مەكەنى امال مەرەكەسىن اتاپ ءوتتى

بۇرىن باتىس وڭىرگە ءتان امال مەرەكەسى – كورىسۋ كۇنى قازىرگى تاڭدا ەلىمىزدىڭ ءبىراز ايما­عىنا جۇعىستى بولا باستادى. ۇلتتىق مەرەكە, ءداستۇر, ادەت-عۇرىپقا ەرەكشە ءمان بەرەتىن الماتىداعى قىزدار ۋنيۆەرسيتەتى دە جاقسى مەرەكەنى داستۇرگە اينالدىرىپ ءجۇر. بيىل دا تاڭنان قىزدار ۋنيۆەرسيتەتىنىڭ ۇجىمى ءبىر-بىرىمەن قۇشاق جايا امانداسىپ, ايدان امان, جىلدان ەسەن شىققانىنا قۋانىپ, اق تىلەكتەر ايتىپ, ءان مەن كۇي تەربەلگەن ايرىقشا جاعدايدا اتاپ ءوتتى. قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى دينار نوكەتاەۆا مەرەكەنىڭ ماڭىزدىلىعىنا توقتالىپ, سوڭىنان ەرگەن سىڭلىلەرىنە: – بۇل مەرەكەدە ءداستۇر بويىنشا, اعايىن-اۋلەتتىڭ باس يەسىنە, اۋىل-ايماق اۋىلدىڭ ۇلكەن اقساقالىنا, جاسى كىشىلەر ۇلكەندەرگە ارنايى بارىپ, حال-جاعدايلارىن, وتباسى اماندىعىن سۇراپ, قول بەرىپ كورىسىپ, «ءبىر جاسىمەن» قۇتتىقتاپ, اق باتالارىن العان كەرەمەت ءداستۇر! الىستى جاقىنداتاتىن, وكپەنى كەشىرەتىن, تاتۋلىقتى ارتتىراتىن قانداي تاماشا مەرەكە. ءبىز ءداستۇرىمىزدى ساقتاۋ, ۇلىستىڭ ۇلى كۇنىن قادىرلەۋ ارقىلى ۇلتتىق قۇندىلىقتارىمىزدى, سالت-ءداستۇرىمىزدى ساقتاي وتىرىپ, ۇر­پاق­تان-ۇرپاققا ميراس ەتە الامىز. امال مەرە­كەسىمەن باستالاتىن ناۋرىز ەلىمىزگە قۇت-بەرەكەسىمەن, مولشىلىعىمەن كەلىپ, ءاربىر شاڭىراققا قۋانىش پەن شاتتىق سىي­لاسىن, – دەدى. كورىسۋمەن باستالعان امال مەرەكەسى ءبىر ەمەس, ارۋلار ورداسىنىڭ بىرنەشە عيمارات­تارىندا اتاپ ءوتىلدى. ونەرپاز قىزدار اننەن شاشۋ شاشسا, جىگىتتەر كۇمبىرلەتە كۇي شەرتتى. قىزدار ۋنيۆەرسيتەتىنىڭ اۋزى دۋالى اپا-اجەلەرىمىز قاسيەتتى ادىراسپان شوبىمەن «الاستاۋ» ءراسىمىن جاساپ, «باسىمىزعا بايان­دى باقىت قونسىن!» دەسە, وقۋ ورنىنىڭ اقسا­قالدارى «جاڭبىرمەن جەر كوگەرەر, باتامەن ەل كوگەرەر» دەيتىن دانا حالقىمىزدىڭ سالتىمەنەن جاستارعا اق باتاسىن بەردى. ايناش ەسالي, «ەگەمەن قازاقستان» الماتى