تاسماعامبەتوۆ پۋتينگە سەنىم گراموتاسىن تاپسىردى

رەسەي فەدەراتسياسىنداعى قازاقستان رەسپۋبليكاسىنىڭ توتەنشە جانە وكىلەتتى ەلشىسى يمانعالي تاسماعامبەتوۆ رف پرەزيدەنتى ۆلاديمير پۋتينگە سەنىم گراموتاcىن تابىستادى, دەپ حابارلايدى «قازاقپارات». 18 شەت مەملەكەتتەن كەلگەن ەلشىلەردىڭ قاتىسۋىمەن وتكەن رەسمي سالتاناتتى شارا ۇلكەن كرەمل سارايىنىڭ الەكساندر زالىندا ءوتتى. ءداستۇر بويىنشا پۋتين 18 مەملەكەتتىڭ ەلشىسىنە رەسەيدىڭ قارىم-قاتىناسى تۋرالى قىسقاشا ايتىپ ءوتتى. قازاقستان تۋرالى رف پرەزيدەنتى ءححى عاسىرداعى تاتۋ كورشىلىك پەن وداقتاستىق تۋرالى شارت نەگىزىندە ءتۇرلى سالالارداعى ىنتىماقتاستىقتى نىعايتۋداعى ەكىجاقتى ۇمتىلىستى اتادى. «قازاقستان - ءبىزدىڭ سەنىمدى دوسىمىز جانە ستراتەگيالىق وداقتاسىمىز. جاقىندا پرەزيدەنت نۇرسۇلتان ءابىش ۇلى نازارباەۆپەن بولعان كەلىسسوزدەر بارىسىندا ءححى عاسىرداعى تاتۋ كورشىلىك پەن وداقتاستىق تۋرالى شارت نەگىزىندە ءتۇرلى سالالارداعى ىنتىماقتاستىقتى نىعايتۋداعى ەكىجاقتى ۇمتىلىس ماقۇلداندى», - دەپ پۋتين تمد, ەۋرازيالىق ەكونوميكالىق وداق, ۇقشۇ جانە شانحاي ىنتىماقتاستىق ۇيىمى اياسىندا بەلسەندى بىرلەسكەن جۇمىستار جۇرگىزىلىپ جاتقانىن اتاپ ءوتتى. «پوستكەڭەستىك كەڭىستىكتىڭ ينتەگراتسيالىق پروتسەستەرىندەگى پرەزيدەنت نازارباەۆتىڭ كوشباسشىلىق ءرولىن جوعارى باعالايمىز», - دەدى رف پرەزيدەنتى.