ن. نوعاەۆ اتىراۋلىقتارعا مۇناي-گازدان باسقا دا سالالاردا جۇمىس ىستەۋگە شاقىردى

اتىراۋ وبلىسىنىڭ اكىمى نۇرلان نوعاەۆ تابىسى كوپ جۇمىسقا تەز تۇرۋدىڭ جولىن ايتتى. بۇل تۋرالى بۇگىن وبلىسقا جۇمىس ساپارىمەن كەلگەن ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆامەن كەزدەسۋ كەزىندە بەلگىلى بولدى, - دەپ حابارلايدى Tengrinews.kz. بيىلدان باستالعان "ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى" اياسىندا ايماقتا بيىل 250 ادامعا تەگىن كاسىپتىك ءبىلىم بەرىلەتىنى, 750 ادامعا بيزنەسپەن اينالىسۋ نەگىزدەرى ۇيرەتىلەتىنى جانە دە 500 ادام قىسقا مەرزىمدى كۋرستاردان ءوتىپ, باعدارلاما اياسىندا 5000 مىڭنان استام جۇمىس ورنى اشىلاتىنى ايتىلدى. جيىن كەزىندە وبلىس اكىمى تۇرعىنداردى تەك مۇناي-گاز سالاسىنا قىزىعىپ وتىرا بەرمەي, باعدارلامانىڭ مۇمكىندىكتەرىن پايدالانىپ قالۋعا شاقىردى. "وبلىس تۇرعىندارىنىڭ كوبى مۇناي مەن گاز سالاسىندا جۇمىس ىستەگىسى كەلەدى. ال تەكسەرىپ قاراساڭ, كەيبىر سالادا جۇمىس ىزدەپ جۇرگەن ادام كوپ تە, كەيبىر سالادا تىپتەن از. ال جۇمىس ىستەيتىن بىلىكتى مامان تابا الماي جۇرگەن كومپانيالار قانشاما. تۇرعىندار بۇل جاعدايدى پايدالانىپ, ءتيىستى ءبىلىم الۋعا تالپىنسىن. باعدارلاما اياسىندا ادام جەتىسپەيتىن ماماندىقتاردى تەگىن وقىتامىز. بۇل - ۇلكەن مۇمكىندىك", - دەدى ايماق باسشىسى. سونىمەن قاتار, بيىل ميكرونەسيە بەرۋگە 840 ميلليون, نەسيەگە كەپىلدىك بەرۋگە 100 ميلليون تەڭگەگە جۋىق اقشا قاراستىلىپ وتىرعانى بەلگىلى بولدى.