قوستانايدا ل.تولستوي اتىنداعى وبلىستىق امبەباپ كىتاپحانادا ناۋرىز مەرەكەسىنە وراي ستۋدەنتتەر اراسىندا قازاق حالقىنىڭ داستۇرلەرى تۋرالى بايقاۋ ءوتتى. وعان قالاداعى جوعارى وقۋ ورىندارىنىڭ, كوللەدجدەردىڭ ستۋدەنتتەرى قاتىستى. بايقاۋعا قاتىسقان ستۋدەنت جاستار - وبلىستىق كىتاپحانانىڭ وقىرماندارى.
جاستار بايقاۋدىڭ شارتى بويىنشا وزدەرىن تانىستىرىپ, قازاق حالقىنىڭ تۇساۋ كەسۋ, بەسىككە سالۋ, قىز ۇزاتۋ, كەلىن ءتۇسىرۋ سەكىلدى سالت-داستۇرلەرىن كورسەتتى.
"ارينە, قازىر ۇلتىمىزدىڭ سالت-داستۇرلەرىن كىم بىلمەيدى؟» دەۋشىلەر دە تابىلادى. ال جاستاردى اڭگىمەگە تارتا كەلگەندە بىلمەيتىندەرى كوپ بولىپ شىقتى. سوندىقتان وسى بايقاۋدى وتكىزدىك", - دەيدى بايقاۋدىڭ دەمەۋشىسى ءارى ۇيىمداستىرۋشىلاردىڭ ءبىرى «شاڭىراق-قوستاناي» قوعامدىق بىرلەستىگىنىڭ ءتورايىمى قارلىعاش بالاپانوۆا.
«ءبىز وقىرمان جاستارعا بايقاۋ تۋرالى حابارلاندىرۋ ايتقانىمىزدا, ولار قۋانا كەلىستى. ءداستۇردى جاقسى بىلەتىندىكتەرىن ايتتى. بىراق حالقىمىزدىڭ ۇمىتىلىپ كەتكەن داستۇرلەرى دە جەتەرلىك ەكەن. ولار تۋرالى از بىلەتىنىن جاستار بايقاۋ كەزىندە عانا سەزدى», دەيدى وبلىستىق امبەباپ كىتاپحانانىڭ سەكتور مەڭگەرۋشىسى زارىپگۇل سماعۇلوۆا.
جاستار اسىرەسە, ۆيكتورينالىق سۇراقتار كەزىندە كوپ ءمۇدىردى. قازاقتىڭ «ۇيقىاشار, سەلتەتكىزەر, قازان جارىس, كوبەنتۇپ» سەكىلدى تولىپ جاتقان سالتتارى قازىر بايقالا بەرمەيتىنى دە ايتىلدى. دەگەنمەن, جاستاردىڭ بايقاۋعا جاقسى دايىندالىپ, كوپ ىزدەنگەنى بايقالدى. قازىلار القاسى باس جۇلدەنى قوستاناي پەداگوگيكا ينستيتۋتى فيلولوگيا فاكۋلتەتىنىڭ كومانداسى مەن جانار جۇمابايعا بەردى. ءبىرىنشى ورىندى ا.بايتۇرسىنوۆ اتىنداعى قوستاناي مەملەكەتىك ۋنيۆەرسيتەتى قازاق ءتىلى مەن ادەبيەتى كافەدراسىنىڭ ستۋدەنتتەرى كومانداسى مەن الماگۇل اقىلبەك, ەكىنشى ورىندى گۋمانيتارلىق كوللەدج كومانداسى مەن بالجان انۋاربەك, ءۇشىنشى ورىندى قوستاناي پەداگوگيكا كوللەدجى مەن ءاليزا سەيداحمەت الدى.
ءنازيرا جارىمبەتوۆا, «ەگەمەن قازاقستان»
