قازاقستاندا جەكپە-جەك وتكىزگىم كەلەدى – جاقيانوۆ

WBA (Super) نۇسقاسى بويىنشا الەم چەمپيونى جانات جاقيانوۆ استانادا جەكپە-جەك وتكىزگىسى كەلەتىنىن ايتتى, دەپ حابارلادى vesti.kz. «EXPO كەزىندە وتەتىن بوكس كەشىندە شارشى الاڭعا شىعۋىم جونىندە كەلىسسوزدەر ءوتىپ جاتىر. ەگەر ءبارى وڭىنان شەشىلسە, ءوز ەلىمدە بەلبەۋىمدى قورعاعىم كەلەدى», – دەدى جانات جاقيانوۆ. جاقيانوۆ اقش-تىڭ تولەدو قالاسىندا امەريكالىق روۋشي ۋوررەندى جەڭىپ, ەلگە ورالعاننان كەيىن قازاقستاندا جەكپە-جەك ۇيىمداستىرعىسى كەلەتىنىن ايتقان بولاتىن. ال ەلىمىزدىڭ كاسىپقوي بوكس فەدەراتسياسىنىڭ ۆيتسە-پرەزيدەنتى ۆيكتور دەميانەنكو ۋوررەنمەن رەۆانش وتكىزسە, EXPO-2017 كورمەسىنىڭ ءسانىن كىرگىزەتىنىن مالىمدەدى. وسىعان دەيىن مادەنيەت جانە سپورت ءمينيسترى ارىستانبەك مۇحامەدي ۇلى استانادا وتەتىن EXPO كەزىندە بوكس كەشى ۇيىمداستىرىلاتىنىن راستاعان بولاتىن. ايتا كەتەيىك, بۇگىن جاناتتىڭ IBO تيتۋلىنان ايىرىلعانى حابارلاندى. الايدا, بوكسشى ارتىق شىعىندالماۋدى ءجون كورگەندىكتەن ءوز ەركىمەن بۇل بەلبەۋدەن باس تارتقانىن مالىمدەدى.