قر پارلامەنتى رەسەيدىڭ قازاقستانعا جەردى قايتارۋى تۋرالى حاتتامانى راتيفيكاتسيالادى

بۇگىن قر پارلامەنتى سەناتىنىڭ جالپى وتىرىسىندا پالاتا دەپۋتاتتارى «1995 جىلعى 20 قاڭتارداعى قر مەن رف اراسىنداعى ەمبى پوليگونىن پايدالانۋ جانە جالعا بەرۋ شارتتارى تۋرالى كەلىسىمىنىڭ جانە 1996 جىلعى 18 قازانداعى قازاقستان ۇكىمەتى مەن رەسەي ۇكىمەتى اراسىنداعى ەمبى سىناق پوليگونىن جالداۋ تۋرالى شارتتىڭ قولدانىسىن توقتاتۋ جونىندەگى شارالار تۋرالى قر مەن رف اراسىنداعى حاتتامانى راتيفيكاتسيالاۋ تۋرالى» زاڭ جوباسىن قابىلدادى, دەپ حابارلايدى قازاقپارات. «حاتتاماعا 2016 جىلعى 20 قازاندا ماسكەۋدە قول قويىلدى. قۇجاتتا ەمبى سىناق پوليگونىن جالداۋ جانە پايدالانۋ ءتارتىبىن رەتتەيتىن حالىقارالىق شارتتاردىڭ قولدانىسى توقتاتىلادى. سونداي-اق, رەسەيگە ۋاقىتشا پايدالانۋعا بەرىلگەن جەر تەلىمدەرىن, جىلجىمالى نەمەسە جىلجىمايتىن م ۇلىكتەردى قابىلداۋ جونىندەگى قاجەتتى شارالاردى جۇرگىزۋ كوزدەلگەن», - دەدى قر قورعانىس ءمينيسترىنىڭ ورىنباسارى وقاس ساپاروۆ زاڭ جوباسى بويىنشا بايانداماسىندا. قورعانىس ءمينيسترلىنىڭ مالىمەتىنشە, پوليگوننىڭ جەر ۋچاسكەلەرى ارى قاراي پايدالانۋ ءۇشىن جارامدى جاعدايدا. رەسەي تاراپىنان پوليگوندى پايدالانۋ بويىنشا ءتيىستى مىندەتتەردى ورىنداۋعا قاتىستى شاعىم جوق. پوليگوندى جالداۋدان شىعارۋ ايماقتىق ەكونوميكالىق دامۋعا قولايلى اسەر ەتەدى دەپ كۇتىلۋدە. ونىڭ ىشىندە قايتارىلعان جەرلەردە ارى قاراي پايدالى قازبالاردى بارلاۋ, اۋىل شارۋاشىلىعىمەن اينالىساتىن كاسىپكەرلەردىڭ, ۇيىمداردىڭ مۇددەسىندە پايدالانىلاتىنى بەلگىلى. سونىمەن قاتار, پوليگوننىڭ ۋچاسكىلەرى اقتوبە وبلىسىنداعى الەۋمەتتىك ماڭىزى زور ينفراقۇرىلىمدىق جوبالاردىڭ قۇرىلىسى ءۇشىن پايدالانىلۋى مۇمكىن. بۇدان بۇرىن حابارلانعانداي, اتالعان پوليگون يادرولىق سىناق الاڭى ساناتىنا جاتپايدى, سوندىقتان دا تۇرعىندار مەن جەرگىلىكتى بيلىك ورگاندارى تاراپىنا قانداي دا ءبىر اۋرۋلاردىڭ تۋىنداۋىنا بايلانىستى شاعىمدار تۇسپەگەن كورىنەدى.