نەمەرەڭىز جازعان حات نەمەسە رۋحىڭىزبەن سىرلاسۋ
«اپا, جاعدايىڭىز قالاي؟ ءبىزدىڭ جاعدايىمىز جاقسى. سىزدىكى شە؟ ساباعىمدى جاقسى وقىپ ءجۇرمىن. ءسىزدى قاتتى ساعىندىم. اپا, ءسىز بولماساڭىز اۋىلدا تۇك تە قىزىق جوق».
اناشىم! بۇل شىمكەنت قالاسىنداعى ءو.جولداسبەكوۆ اتىنداعى №9 ليتسەيدە ساباعىن ۇزدىك وقىپ جۇرگەن 7 جاسار قىزىمنىڭ, ءسىزدىڭ ءسۇيىكتى نەمەرەڭىز ىڭكاردىڭ جازعان حاتىن قاز-قالپىندا قايتالاپ وتىرمىن. نەعىلعان حات ەكەنىن ايتايىن. قايسىبىر كۇنى جۇمىستان كەشقۇرىم ءۇيگە كەلسەم, ەركە قىزىم: «كوكە! اۋىلعا قاشان بارامىز؟ اپامنىڭ باسىنا اپارىپ قوياتىن حات جازىپ قويدىم», دەمەسى بار ما؟ نەمەرەڭىزدىڭ مىناداي توسىن ساۋالىنا ءبىردەن جاۋاپ ايتا الماي, ەپتەپ ەسەڭگىرەپ تۇرعانىمدا ءمان-جايدى ءوزى بايانداي جونەلدى. «مەكتەپتە جانات اپاي «كىمدى قاتتى ساعىنساڭدار سوعان ارناپ حات جازىڭدار» دەپ تاپسىرما بەردى. ال مەن اپامدى قاتتى ساعىنعاننان, سوعان حات جازدىم. ەكەۋمىز قىزىق وينايتىن ەدىك قوي. تاماق ىشكەن كەزدە دە پويىز ويناپ وتىراتىنبىز...».
اناشىم! «ءپۇشتاناي» دەپ ەركەلەتەتىن ءتامپىش مۇرىن قىزىمنىڭ انشەيىندە الماتىداعى ءاليا, عاليا ءاپكەلەرىن, راحىمجان اعاسىن, اۋىلداعى قاراشاڭىراقتا قالعان باۋىرىم مالىكتىڭ بالا-شاعاسى نازەركە مەن ماعجاندى
اۋزىنان تاستاماي ايتىپ جۇرەتىنىمەن ىشتەي ءسىزدى – كۇلپارشىن اپاسىن قاتتى اڭسايدى ەكەن-اۋ. «اپا, ءسىز بولماساڭىز اۋىلدا تۇك تە قىزىق جوق» دەگەن ءسوزدىڭ سالماعى ءجۇرەگىمدى قانشالىقتى تىلگىلەپ تاستاعانىن تۇسىنەسىز بە؟
اناشىم! مەنىڭ ەركە قىزىم ءسىزدى وزىنەن 2-3 جاس كىشى باعىنىشتى ادامنان بەتەر باسىنىپ, ايتقانىن ورىنداتىپ, ارمانسىز وينايتىن. شارشاپ, اۋىرىپ تۇرعانىڭىزعا, اۋىراتىن اياعىڭىزبەن, الپامساداي اۋىر, ەتجەڭدى دەنەڭىزبەن ورنىڭىزدان قايتا-قايتا تۇرۋ, وتىرۋ قيىن سوعاتىنىنا قاراماستان ويىن ۇستىندە قانشا ءمارتە قايتالاتسا دا, دەگەنىنە كونەتىنسىز. ىڭكاردىڭ وسى شارتتارىنا اياعىنا دەيىن شىداۋعا, ونىسىن بۇلجىتپاي ورىنداۋعا مويىنسۇنعان سىزدەن وزگە وعان ءالى ەشكىم كەزدەسپەي ءجۇر. كەزدەسپەيدى دە. كىم ءبىلسىن, ەركە قىزىم وسىنى اڭسايتىن شىعار, وسىنى ءتۇسىنەتىن شىعار. مارقۇم اجەم كۇلجاميلا ەكەۋىڭىزدىڭ اراڭىزداعى ەنە مەن كەلىننىڭ سىيلاستىعىن اۋىلداعىلار اۋزىنىڭ سۋى قۇرىپ ايتادى. كەلىن بولىپ ەنەمەن, ەنە بولىپ كەلىنمەن ەشبىر كيكىلجىڭگە بارماي ءومىر ءسۇرۋدىڭ ونەگە تۇتار تۇسى كوپ-اق.
اناشىم! ۇل-قىزدارىڭىز ءبىرىنەن كەيىن ءبىرى جوعارى وقۋ ورنىن قىزىل ديپلومعا ءبىتىرسە, بىرىنەن كەيىن ءبىرى عىلىم كانديداتتىعىن قورعاپ جاتسا, مۇنىڭ ءبارى ءسىز قامىر يلەپ وتىرىپ, سىپىرانىڭ باسىندا وقىتقان ساباقتىڭ, تاعىلىمدى ءتالىم-تاربيەنىڭ ءناتيجەسىندە قالانعان بەرىك ءىرگەتاس قوي. ستۋدەنت بولىپ ءجۇرگەنىمىزدە ەمتيحانعا باراتىن, سىناق تاپسىراتىن كۇنى ءسىز مىندەتتى تۇردە جەتى شەلپەگىڭىزدى ءپىسىرىپ, كورشى-قولاڭعا تاراتاتىنسىز. قۇران وقىتىپ, پەرزەنتتەرىڭىزگە راحىمىن, شاپاعاتىن توكسىن دەپ, اللا تاعالاعا سىيىنۋدان جالىقپايتىنسىز. سۇيەنەتىن كوكە-جاكەمىز جوق بولعانىمەن, سىيىناتىن اللا تاعالانىڭ قولداۋىنىڭ, ءسىزدىڭ ادال نيەت, شىن تىلەۋىڭىزدىڭ ارقاسى شىعار, تالاي سىناقتان ءسۇرىنبەي وتتىك, ايتەۋىر. تارىداي جەتىستىگىمىزگە جۇرەگى جارىلا جازداپ قۋانىپ, تاۋداي تابىس كورەتىن اق پەيىلىڭىزدى ايتساڭىزشى. اپكەم ءاليانىڭ كافەدرا مەڭگەرۋشىسى, ءىنىم راحىمجاننىڭ عىلىم كانديداتى دەپ جازىلعان كەۋدەگە تاعاتىن بەيدجىگىن قيىلىپ سۇراپ الىپ, اۋىلداعى ءۇيدىڭ تورىنە ءىلىپ قويعانىڭىز سول كەزدە ەرسى كورىنسە, قازىر كوڭىلگە كەرەمەت ىستىق سەزىلەتىن انالىق ماحابباتىڭىزدىڭ باعاسىن كەشتەۋ ءبىلىپ جاتقانىمىز با, قالاي ءوزى؟!
اناشىم! 10 بالانى ومىرگە اكەلگەن ناعىز باتىر اناسىز. باۋىرجان دەيتىن باۋىرىمىز 1,5 ايلىعىندا شەتىنەپتى. قالعان توعىزىمىز, 6 ۇل, 3 قىز امان-ەسەنبىز, قۇدايعا شۇكىرشىلىك. بارلىعىمىز جوعارى ءبىلىم الدىق. ساباقتى جاقسى وقىپ, ادام بولسىن, باسقا جاققا الاڭداماسىن دەپ ءسىز ءبىزدى جۇمساماي, قارا جۇمىستىڭ ءبارىن ءبىر ءوزىڭىز بەل شەشىپ قالاي ىستەگەنىڭىزگە قازىر قاتتى تاڭدانامىن. تاڭدانباعاندا شە؟ مالدىڭ قىستىق ازىعىنا قجەتتى جەم-ءشوپتى تۇگەلدەي جالعىز ءوزىڭىز ازىرلەيتىنسىز. كەزىندە اتشاپتىرىم اۋماقتى قامتيتىن ۇيىرگەلىك جەردىڭ ءشوبىن ءبىر ءوزىڭىز وردىڭىز. ءبىر ءوزىڭىز ورىلعان ءشوپتى ارقانمەن ارقالاپ, قوراعا تاسيتىنسىز. سول ءبىر ءوزىڭىز اتقارعان تىرلىكتى بۇگىندە ءمالىك اعام اۋىلداعى سىنىپتاستارىن, مەن قالادان دوستارىمدى كومەككە شاقىرىپ, اتقا ءسۇيرەتپە جەگىپ ءجۇرىپ ءاۋپىرىممەن ارەڭ اتقارامىز. تاڭ قىلاڭ بەرە قولىڭىزعا وراعىڭىزدى ۇستاپ, ءشوپ ورۋعا كىرىسەتىنىڭىزدى كونەكوزدەر تاڭداي قاعىپ ايتادى. ودان بولەك ءۇيدىڭ ايەلگە تيەسىلى قات-قابات شارۋاسىن دا ىستەپ ۇلگەرىپ, كولحوزدىڭ قارا جۇمىسىنا شىعاتىنىڭىز تاعى بار. سوندا ءسىزدىكى نەعىلعان كۇش-قايرات, نەعىلعان ەرىك-جىگەر, نەعىلعان مىقتىلىق ەدى. ءوزىڭىز ءجيى ايتاتىنداي, راسىندا دا, اناڭىز ءسىزدى «تاستاي ەتىپ تۋعان ەكەن».
اناشىم! اكەمىز قامىتبەكتىڭ كولحوزدا ۇلكەندى-كىشىلى باسشىلىق قىزمەتتەر اتقارعاندىقتان ات ۇستىنەن ءتۇسپەي جۇمىس ىستەپ, ءۇي شارۋاسىنا بەرتىندە عانا ارالاسا باستادى. بىردە-ءبىر رەت بەتىنە قارسى كەلگەنىڭىزدى كورگەن ەمەسپىز. كەرىسىنشە, ءاردايىم اكەمىزدى جاقتاپ سويلەپ, بەدەلىن ارتتىرۋعا ۇمتىلاتىنسىز. وتباسىندا وتاعاسىنا قانداي سىي-قۇرمەتپەن قاراۋ قاجەتتىگىن جاقسىلاپ سانالارىنا ءسىڭىرسىن دەپ ۇدايى ءبىرىنشى كەزەكتە اكەمىزگە كوڭىل ءبولۋگە باۋلىدىڭىز. وسىدان دا شىعار, اكەمىزدى اۋرۋحاناعا, شيپاجايعا اپارعاندا قاسىندا كۇتىم جاساۋ ءۇشىن قوساقتالىپ ءجۇرىپ, قوسىمشا ەم-دوم الاتىنىڭىز بولماسا ءسىزدىڭ دەنساۋلىعىڭىزدى تەكسەرتۋگە ارنايى نازار اۋدارمايتىنىمىز نەتكەن ەنجارلىق ەدى, دەسەڭىزشى. اقىرى, مىنە, نە بولدى؟.. سىڭارىنان ايىرىلعان اققۋ سىندى كۇي كەشىپ, قايعىدان قان جۇتقان اكەمىزدىڭ قۇلازىعان, جابىرقاعان, جاسىعان كوڭىلىن كوتەرۋدىڭ, كوكەيىندەگىسىن ءدوپ باسۋدىڭ ەشبىر ەبىن تاپپاي, بابىن بىلمەي, ابدەن الەك-شالەگىمىز شىعىپ, ۋاقىت جىلجىعان سايىن ءسىزدىڭ قادىرىڭىز سەزىلە تۇسۋدە.
اناشىم! ءسىز مەنى «ايىمتاي» دەيتىنسىز. قايتىس بولارىڭىزدان بۇرىن ايىمتايىڭىزدىڭ ۇيىنە ادەتتەگىدەي اكەم الدىندا, ءسىز ارتىندا اۋىلدىڭ ءدام-تۇزىمەن ارقالانىپ كەلدىڭىز. بىرەر كۇن ءۇيدە بولىپ, اۋىلعا قايتاردا راۋشان كەلىنىڭىز بەن زاڭعار نەمەرەڭىزبەن قوشتاسىپ تۇرىپ ءبىراز قادام اتتاعان سوڭ قايتا اينالىپ كەلىپ, تاعى بەتىنەن ءسۇيىپسىز. «وي, وسى اپامنىڭ ادەتى-اي دەپ قانا قابىلدادىم, قايتا-قايتا قوشتاسقانىن ەشقانداي جاماندىققا جورىماعان ەدىم» دەيدى كەلىنىڭىز. راسىندا دا, ءسىزدىڭ ءبىر ادەتىڭىز, قايتا-قايتا بەتىمىزدى سۇيە بەرەتىنسىز. ءۇيگە كىرسەك تە, شىقساق تا. «قىزىقسىز, قازىر عانا ۇيدەن شىعىپ نان اكەلۋگە دۇكەنگە بارىپ كەلدىم عوي. ەسىكتى اشىپ, تاعى بەت ءسۇيىپ جاتىرسىز» دەپ ازداپ قارسىلىق تا كورسەتەتىنبىز. ءسىز جاۋاپ قاتپاي كۇلە سالاتىنسىز. ەندى, مىنە, كۇلكىڭىزدى, بەتىمىزدەن قايتا-قايتا ءسۇيگەنىڭىزدى ساعىنىپ, ءبىر جىلدان بەرى زارىعىپ بىتتىك.
اناشىم! ءسىز ىشتەي ىرىم عىپ, زەينەتاقىڭىزدى جيناپ ءجۇرىپ تاپقان قارجىڭىزعا تاڭداعان سىرعاسىن اپەرىپ, الماتىداعى راحىمجان بالاڭىزدىڭ كوڭىلى قالاعان بولاشاق كەلىننىڭ قۇلاعىنا تاعىپ قايتۋ ءۇشىن, قۇدالىقتىڭ, تويدىڭ كۇنىن بەلگىلەۋ ءۇشىن 22 ناۋرىزدا – ۇلىستىڭ ۇلى كۇنىندە اكەمىز ەكەۋىڭىز سول جاقتا بولۋدى ۇيعارعان ەدىڭىزدەر. ال 17 ناۋرىزدا ءسىزدىڭ 68 جاسقا تولعان تۋعان كۇنىڭىزگە ءبارىمىز جينالىپ, اكەمىزدىڭ 70 جىلدىعى مەن ەكەۋىڭىزدىڭ وتاۋ قۇرعاندارىڭىزعا 50 جىل تولعان «التىن تويدى» قالاي اتاپ ءوتۋدى اقىلداسۋدى جوسپارلاعان بولاتىنبىز. امال قانشا, ءسىز اۋىلعا قايتقان كۇننىڭ ەرتەڭىنە, ايىمتايىڭىزدىڭ تۋعان كۇنى – 12 ناۋرىزدا قان قىسىمىڭىزدىڭ قاتتى كوتەرىلىپ كەتۋى سالدارىنان ءبىردەستەن ەس-ءتۇسسىز قۇلادىڭىز. «جەدەل جاردەم» كولىگى اۋداندىق اۋرۋحانانىڭ جان ساقتاۋ ءبولىمىنە اپارعانىمەن, كوماگا تۇسكەن كۇيى ءبىر اۋىز قايتا ءتىلگە كەلمەستەن, تىم بولماسا كوزىڭىزدى ءبىر اشپاستان, نەبارى ءبىر جارىم تاۋلىك جاتىپ ءتۇس كورگەندەي حال كەشتىرىپ, ويدا-جوقتا ءسىزدى باقيلىققا اتتانىپ كەتە بارادى دەپ كىم ويلاعان؟ ءسىزدى اۋرۋدى جەڭىپ, اياعىڭىزدان تۇرىپ كەتەتىنىڭىزگە ءۇمىت ارتپاساق تا, تىلگە كەلىپ, داۋىسىڭىزدى ەستۋدى, تىم بولماسا كوزىڭىزدى ءبىر اشقاندى قالاي كۇتتىك, قالاي اڭسادىق, قالاي ارماندادىق, دەسەڭىزشى. وكىنىشكە قاراي, ارمان شىركىن الدامشى بولىپ شىقتى. تاڭعا قاراي ءفاني ءدۇنيەدەگى تالقانىڭىز تاۋسىلدى. كىم ءبىلسىن, شارشاماۋدىڭ, قاباعىن كىربىڭ شالسا دا قاباق شىتپاۋدىڭ, اۋىرماۋدىڭ, ەركەكتىڭ دە, ايەلدىڭ دە جۇمىسىن قاتار اتقارعان ەر مىنەزدىلىكتىڭ وتەۋى وسىلاي وتەلگەن شىعار.
پەيىشتە نۇرىڭىز شالقىسىن, اناشىم!
رۋحىڭىزبەن سىرلاسىپ, ىشتەگى شەردى تارقاتقان ۇلىڭىز – ايىمتايىڭىز – عالىمجان ەلشىباي
2010 جىل
P.S. اۆتوردان: 17 ناۋرىز اياۋلى انامىز كۇلپارشىننىڭ تۋعان كۇنى. اتتەڭ, تىرشىلىكتەگى تالقانى تاۋسىلماعاندا 75 جاسىن ارقا-جارقا اتاپ وتەتىن ەدىك. اللا وسىلاي جازسا, تاعدىرى وسىلاي بولسا, امال نە... اناشىم! تۋعان كۇنىڭىزگە بايلانىستى تۋىنداعان تولعانىسىمنان, تولقىنىسىمنان ارۋاعىڭىز ءبىر اۋناپ ءتۇسىپ جاتسا, اللاعا ريزاشىلىعىمىز شەكسىز. 7 جىل بۇرىن رۋحىڭىزبەن سىرلاسىپ جازىلعان حاتتى وزگەرتپەي, وڭدەمەي, قاز-قالپىندا قايتا ۇسىنۋدى ۇيعاردىم.
«اپا, جاعدايىڭىز قالاي؟ ءبىزدىڭ جاعدايىمىز جاقسى. سىزدىكى شە؟ ساباعىمدى جاقسى وقىپ ءجۇرمىن. ءسىزدى قاتتى ساعىندىم. اپا, ءسىز بولماساڭىز اۋىلدا تۇك تە قىزىق جوق».
اناشىم! بۇل شىمكەنت قالاسىنداعى ءو.جولداسبەكوۆ اتىنداعى №9 ليتسەيدە ساباعىن ۇزدىك وقىپ جۇرگەن 7 جاسار قىزىمنىڭ, ءسىزدىڭ ءسۇيىكتى نەمەرەڭىز ىڭكاردىڭ جازعان حاتىن قاز-قالپىندا قايتالاپ وتىرمىن. نەعىلعان حات ەكەنىن ايتايىن. قايسىبىر كۇنى جۇمىستان كەشقۇرىم ءۇيگە كەلسەم, ەركە قىزىم: «كوكە! اۋىلعا قاشان بارامىز؟ اپامنىڭ باسىنا اپارىپ قوياتىن حات جازىپ قويدىم», دەمەسى بار ما؟ نەمەرەڭىزدىڭ مىناداي توسىن ساۋالىنا ءبىردەن جاۋاپ ايتا الماي, ەپتەپ ەسەڭگىرەپ تۇرعانىمدا ءمان-جايدى ءوزى بايانداي جونەلدى. «مەكتەپتە جانات اپاي «كىمدى قاتتى ساعىنساڭدار سوعان ارناپ حات جازىڭدار» دەپ تاپسىرما بەردى. ال مەن اپامدى قاتتى ساعىنعاننان, سوعان حات جازدىم. ەكەۋمىز قىزىق وينايتىن ەدىك قوي. تاماق ىشكەن كەزدە دە پويىز ويناپ وتىراتىنبىز...».
اناشىم! «ءپۇشتاناي» دەپ ەركەلەتەتىن ءتامپىش مۇرىن قىزىمنىڭ انشەيىندە الماتىداعى ءاليا, عاليا ءاپكەلەرىن, راحىمجان اعاسىن, اۋىلداعى قاراشاڭىراقتا قالعان باۋىرىم مالىكتىڭ بالا-شاعاسى نازەركە مەن ماعجاندى
اۋزىنان تاستاماي ايتىپ جۇرەتىنىمەن ىشتەي ءسىزدى – كۇلپارشىن اپاسىن قاتتى اڭسايدى ەكەن-اۋ. «اپا, ءسىز بولماساڭىز اۋىلدا تۇك تە قىزىق جوق» دەگەن ءسوزدىڭ سالماعى ءجۇرەگىمدى قانشالىقتى تىلگىلەپ تاستاعانىن تۇسىنەسىز بە؟
اناشىم! مەنىڭ ەركە قىزىم ءسىزدى وزىنەن 2-3 جاس كىشى باعىنىشتى ادامنان بەتەر باسىنىپ, ايتقانىن ورىنداتىپ, ارمانسىز وينايتىن. شارشاپ, اۋىرىپ تۇرعانىڭىزعا, اۋىراتىن اياعىڭىزبەن, الپامساداي اۋىر, ەتجەڭدى دەنەڭىزبەن ورنىڭىزدان قايتا-قايتا تۇرۋ, وتىرۋ قيىن سوعاتىنىنا قاراماستان ويىن ۇستىندە قانشا ءمارتە قايتالاتسا دا, دەگەنىنە كونەتىنسىز. ىڭكاردىڭ وسى شارتتارىنا اياعىنا دەيىن شىداۋعا, ونىسىن بۇلجىتپاي ورىنداۋعا مويىنسۇنعان سىزدەن وزگە وعان ءالى ەشكىم كەزدەسپەي ءجۇر. كەزدەسپەيدى دە. كىم ءبىلسىن, ەركە قىزىم وسىنى اڭسايتىن شىعار, وسىنى ءتۇسىنەتىن شىعار. مارقۇم اجەم كۇلجاميلا ەكەۋىڭىزدىڭ اراڭىزداعى ەنە مەن كەلىننىڭ سىيلاستىعىن اۋىلداعىلار اۋزىنىڭ سۋى قۇرىپ ايتادى. كەلىن بولىپ ەنەمەن, ەنە بولىپ كەلىنمەن ەشبىر كيكىلجىڭگە بارماي ءومىر ءسۇرۋدىڭ ونەگە تۇتار تۇسى كوپ-اق.
اناشىم! ۇل-قىزدارىڭىز ءبىرىنەن كەيىن ءبىرى جوعارى وقۋ ورنىن قىزىل ديپلومعا ءبىتىرسە, بىرىنەن كەيىن ءبىرى عىلىم كانديداتتىعىن قورعاپ جاتسا, مۇنىڭ ءبارى ءسىز قامىر يلەپ وتىرىپ, سىپىرانىڭ باسىندا وقىتقان ساباقتىڭ, تاعىلىمدى ءتالىم-تاربيەنىڭ ءناتيجەسىندە قالانعان بەرىك ءىرگەتاس قوي. ستۋدەنت بولىپ ءجۇرگەنىمىزدە ەمتيحانعا باراتىن, سىناق تاپسىراتىن كۇنى ءسىز مىندەتتى تۇردە جەتى شەلپەگىڭىزدى ءپىسىرىپ, كورشى-قولاڭعا تاراتاتىنسىز. قۇران وقىتىپ, پەرزەنتتەرىڭىزگە راحىمىن, شاپاعاتىن توكسىن دەپ, اللا تاعالاعا سىيىنۋدان جالىقپايتىنسىز. سۇيەنەتىن كوكە-جاكەمىز جوق بولعانىمەن, سىيىناتىن اللا تاعالانىڭ قولداۋىنىڭ, ءسىزدىڭ ادال نيەت, شىن تىلەۋىڭىزدىڭ ارقاسى شىعار, تالاي سىناقتان ءسۇرىنبەي وتتىك, ايتەۋىر. تارىداي جەتىستىگىمىزگە جۇرەگى جارىلا جازداپ قۋانىپ, تاۋداي تابىس كورەتىن اق پەيىلىڭىزدى ايتساڭىزشى. اپكەم ءاليانىڭ كافەدرا مەڭگەرۋشىسى, ءىنىم راحىمجاننىڭ عىلىم كانديداتى دەپ جازىلعان كەۋدەگە تاعاتىن بەيدجىگىن قيىلىپ سۇراپ الىپ, اۋىلداعى ءۇيدىڭ تورىنە ءىلىپ قويعانىڭىز سول كەزدە ەرسى كورىنسە, قازىر كوڭىلگە كەرەمەت ىستىق سەزىلەتىن انالىق ماحابباتىڭىزدىڭ باعاسىن كەشتەۋ ءبىلىپ جاتقانىمىز با, قالاي ءوزى؟!
اناشىم! 10 بالانى ومىرگە اكەلگەن ناعىز باتىر اناسىز. باۋىرجان دەيتىن باۋىرىمىز 1,5 ايلىعىندا شەتىنەپتى. قالعان توعىزىمىز, 6 ۇل, 3 قىز امان-ەسەنبىز, قۇدايعا شۇكىرشىلىك. بارلىعىمىز جوعارى ءبىلىم الدىق. ساباقتى جاقسى وقىپ, ادام بولسىن, باسقا جاققا الاڭداماسىن دەپ ءسىز ءبىزدى جۇمساماي, قارا جۇمىستىڭ ءبارىن ءبىر ءوزىڭىز بەل شەشىپ قالاي ىستەگەنىڭىزگە قازىر قاتتى تاڭدانامىن. تاڭدانباعاندا شە؟ مالدىڭ قىستىق ازىعىنا قجەتتى جەم-ءشوپتى تۇگەلدەي جالعىز ءوزىڭىز ازىرلەيتىنسىز. كەزىندە اتشاپتىرىم اۋماقتى قامتيتىن ۇيىرگەلىك جەردىڭ ءشوبىن ءبىر ءوزىڭىز وردىڭىز. ءبىر ءوزىڭىز ورىلعان ءشوپتى ارقانمەن ارقالاپ, قوراعا تاسيتىنسىز. سول ءبىر ءوزىڭىز اتقارعان تىرلىكتى بۇگىندە ءمالىك اعام اۋىلداعى سىنىپتاستارىن, مەن قالادان دوستارىمدى كومەككە شاقىرىپ, اتقا ءسۇيرەتپە جەگىپ ءجۇرىپ ءاۋپىرىممەن ارەڭ اتقارامىز. تاڭ قىلاڭ بەرە قولىڭىزعا وراعىڭىزدى ۇستاپ, ءشوپ ورۋعا كىرىسەتىنىڭىزدى كونەكوزدەر تاڭداي قاعىپ ايتادى. ودان بولەك ءۇيدىڭ ايەلگە تيەسىلى قات-قابات شارۋاسىن دا ىستەپ ۇلگەرىپ, كولحوزدىڭ قارا جۇمىسىنا شىعاتىنىڭىز تاعى بار. سوندا ءسىزدىكى نەعىلعان كۇش-قايرات, نەعىلعان ەرىك-جىگەر, نەعىلعان مىقتىلىق ەدى. ءوزىڭىز ءجيى ايتاتىنداي, راسىندا دا, اناڭىز ءسىزدى «تاستاي ەتىپ تۋعان ەكەن».
اناشىم! اكەمىز قامىتبەكتىڭ كولحوزدا ۇلكەندى-كىشىلى باسشىلىق قىزمەتتەر اتقارعاندىقتان ات ۇستىنەن ءتۇسپەي جۇمىس ىستەپ, ءۇي شارۋاسىنا بەرتىندە عانا ارالاسا باستادى. بىردە-ءبىر رەت بەتىنە قارسى كەلگەنىڭىزدى كورگەن ەمەسپىز. كەرىسىنشە, ءاردايىم اكەمىزدى جاقتاپ سويلەپ, بەدەلىن ارتتىرۋعا ۇمتىلاتىنسىز. وتباسىندا وتاعاسىنا قانداي سىي-قۇرمەتپەن قاراۋ قاجەتتىگىن جاقسىلاپ سانالارىنا ءسىڭىرسىن دەپ ۇدايى ءبىرىنشى كەزەكتە اكەمىزگە كوڭىل ءبولۋگە باۋلىدىڭىز. وسىدان دا شىعار, اكەمىزدى اۋرۋحاناعا, شيپاجايعا اپارعاندا قاسىندا كۇتىم جاساۋ ءۇشىن قوساقتالىپ ءجۇرىپ, قوسىمشا ەم-دوم الاتىنىڭىز بولماسا ءسىزدىڭ دەنساۋلىعىڭىزدى تەكسەرتۋگە ارنايى نازار اۋدارمايتىنىمىز نەتكەن ەنجارلىق ەدى, دەسەڭىزشى. اقىرى, مىنە, نە بولدى؟.. سىڭارىنان ايىرىلعان اققۋ سىندى كۇي كەشىپ, قايعىدان قان جۇتقان اكەمىزدىڭ قۇلازىعان, جابىرقاعان, جاسىعان كوڭىلىن كوتەرۋدىڭ, كوكەيىندەگىسىن ءدوپ باسۋدىڭ ەشبىر ەبىن تاپپاي, بابىن بىلمەي, ابدەن الەك-شالەگىمىز شىعىپ, ۋاقىت جىلجىعان سايىن ءسىزدىڭ قادىرىڭىز سەزىلە تۇسۋدە.
اناشىم! ءسىز مەنى «ايىمتاي» دەيتىنسىز. قايتىس بولارىڭىزدان بۇرىن ايىمتايىڭىزدىڭ ۇيىنە ادەتتەگىدەي اكەم الدىندا, ءسىز ارتىندا اۋىلدىڭ ءدام-تۇزىمەن ارقالانىپ كەلدىڭىز. بىرەر كۇن ءۇيدە بولىپ, اۋىلعا قايتاردا راۋشان كەلىنىڭىز بەن زاڭعار نەمەرەڭىزبەن قوشتاسىپ تۇرىپ ءبىراز قادام اتتاعان سوڭ قايتا اينالىپ كەلىپ, تاعى بەتىنەن ءسۇيىپسىز. «وي, وسى اپامنىڭ ادەتى-اي دەپ قانا قابىلدادىم, قايتا-قايتا قوشتاسقانىن ەشقانداي جاماندىققا جورىماعان ەدىم» دەيدى كەلىنىڭىز. راسىندا دا, ءسىزدىڭ ءبىر ادەتىڭىز, قايتا-قايتا بەتىمىزدى سۇيە بەرەتىنسىز. ءۇيگە كىرسەك تە, شىقساق تا. «قىزىقسىز, قازىر عانا ۇيدەن شىعىپ نان اكەلۋگە دۇكەنگە بارىپ كەلدىم عوي. ەسىكتى اشىپ, تاعى بەت ءسۇيىپ جاتىرسىز» دەپ ازداپ قارسىلىق تا كورسەتەتىنبىز. ءسىز جاۋاپ قاتپاي كۇلە سالاتىنسىز. ەندى, مىنە, كۇلكىڭىزدى, بەتىمىزدەن قايتا-قايتا ءسۇيگەنىڭىزدى ساعىنىپ, ءبىر جىلدان بەرى زارىعىپ بىتتىك.
اناشىم! ءسىز ىشتەي ىرىم عىپ, زەينەتاقىڭىزدى جيناپ ءجۇرىپ تاپقان قارجىڭىزعا تاڭداعان سىرعاسىن اپەرىپ, الماتىداعى راحىمجان بالاڭىزدىڭ كوڭىلى قالاعان بولاشاق كەلىننىڭ قۇلاعىنا تاعىپ قايتۋ ءۇشىن, قۇدالىقتىڭ, تويدىڭ كۇنىن بەلگىلەۋ ءۇشىن 22 ناۋرىزدا – ۇلىستىڭ ۇلى كۇنىندە اكەمىز ەكەۋىڭىز سول جاقتا بولۋدى ۇيعارعان ەدىڭىزدەر. ال 17 ناۋرىزدا ءسىزدىڭ 68 جاسقا تولعان تۋعان كۇنىڭىزگە ءبارىمىز جينالىپ, اكەمىزدىڭ 70 جىلدىعى مەن ەكەۋىڭىزدىڭ وتاۋ قۇرعاندارىڭىزعا 50 جىل تولعان «التىن تويدى» قالاي اتاپ ءوتۋدى اقىلداسۋدى جوسپارلاعان بولاتىنبىز. امال قانشا, ءسىز اۋىلعا قايتقان كۇننىڭ ەرتەڭىنە, ايىمتايىڭىزدىڭ تۋعان كۇنى – 12 ناۋرىزدا قان قىسىمىڭىزدىڭ قاتتى كوتەرىلىپ كەتۋى سالدارىنان ءبىردەستەن ەس-ءتۇسسىز قۇلادىڭىز. «جەدەل جاردەم» كولىگى اۋداندىق اۋرۋحانانىڭ جان ساقتاۋ ءبولىمىنە اپارعانىمەن, كوماگا تۇسكەن كۇيى ءبىر اۋىز قايتا ءتىلگە كەلمەستەن, تىم بولماسا كوزىڭىزدى ءبىر اشپاستان, نەبارى ءبىر جارىم تاۋلىك جاتىپ ءتۇس كورگەندەي حال كەشتىرىپ, ويدا-جوقتا ءسىزدى باقيلىققا اتتانىپ كەتە بارادى دەپ كىم ويلاعان؟ ءسىزدى اۋرۋدى جەڭىپ, اياعىڭىزدان تۇرىپ كەتەتىنىڭىزگە ءۇمىت ارتپاساق تا, تىلگە كەلىپ, داۋىسىڭىزدى ەستۋدى, تىم بولماسا كوزىڭىزدى ءبىر اشقاندى قالاي كۇتتىك, قالاي اڭسادىق, قالاي ارماندادىق, دەسەڭىزشى. وكىنىشكە قاراي, ارمان شىركىن الدامشى بولىپ شىقتى. تاڭعا قاراي ءفاني ءدۇنيەدەگى تالقانىڭىز تاۋسىلدى. كىم ءبىلسىن, شارشاماۋدىڭ, قاباعىن كىربىڭ شالسا دا قاباق شىتپاۋدىڭ, اۋىرماۋدىڭ, ەركەكتىڭ دە, ايەلدىڭ دە جۇمىسىن قاتار اتقارعان ەر مىنەزدىلىكتىڭ وتەۋى وسىلاي وتەلگەن شىعار.
پەيىشتە نۇرىڭىز شالقىسىن, اناشىم!
رۋحىڭىزبەن سىرلاسىپ, ىشتەگى شەردى تارقاتقان ۇلىڭىز – ايىمتايىڭىز – عالىمجان ەلشىباي
2010 جىل
P.S. اۆتوردان: 17 ناۋرىز اياۋلى انامىز كۇلپارشىننىڭ تۋعان كۇنى. اتتەڭ, تىرشىلىكتەگى تالقانى تاۋسىلماعاندا 75 جاسىن ارقا-جارقا اتاپ وتەتىن ەدىك. اللا وسىلاي جازسا, تاعدىرى وسىلاي بولسا, امال نە... اناشىم! تۋعان كۇنىڭىزگە بايلانىستى تۋىنداعان تولعانىسىمنان, تولقىنىسىمنان ارۋاعىڭىز ءبىر اۋناپ ءتۇسىپ جاتسا, اللاعا ريزاشىلىعىمىز شەكسىز. 7 جىل بۇرىن رۋحىڭىزبەن سىرلاسىپ جازىلعان حاتتى وزگەرتپەي, وڭدەمەي, قاز-قالپىندا قايتا ۇسىنۋدى ۇيعاردىم.
