الماتىدا يت پەن مىسىققا چيپ سالىنادى

الماتىدا ءۇي جانۋارلارىنا سايكەستەندىرۋ جۇمىستارى جۇرگىزىلمەك. قالالىق اۋىل شارۋاشىلىعى باسقارماسى ماماندارىنىڭ ايتۋىنشا, الداعى ۋاقىتتا يەسى بار يت پەن مىسىقتىڭ بارلىعىنا ارنايى ميكروچيپ تاعىلاتىن بولادى. بۇل قۇرىلعىنىڭ كومەگىمەن قالاداعى ءۇي جانۋار­لارىنىڭ تسيفرلى ەلەكتروندى دەرەكتەرى جيناقتالادى. دەرەكتەر قورىنا يت پەن مىسىقتىڭ ءتۇر-ءتۇسى, جاسى, وعان قاتىستى بارلىق اقپاراتتار ءتىپتى قوجايىنىنىڭ اتى-جونىنە دەيىن تۇگەل جازىلادى. – مۇنداعى ماقسات – الماتى قالاسىنداعى جانۋار­لاردىڭ, ءۇي جانۋارلارىنىڭ ناقتى ەسەبىن انىقتاۋ. بۇل − تەندەر بويىنشا وتكىزىلەتىن ءىس-شارا. سايكەستەندىرۋگە 73 ميلليونداي اقشا قاراستىرىلىپ وتىر, – دەيدى الما­تى قالالىق اۋىل شارۋاشىلىعى جانە ۆەتەريناريا باسقارماسى باسشىسىنىڭ ورىنباسارى باۋىرجان ابىزباەۆ. مامانداردىڭ ايتۋىنشا, بۇل باستاما ءۇي جانۋارلارىن اسىراپ وتىرعان ازاماتتاردىڭ قوعام الدىنداعى جاۋاپكەرشىلىگىن ارتتىرىپ, تازالىق پەن قاۋىپسىزدىك ماسەلەسىنىڭ ساقتالۋىنا ءوز ۇلەسىن تيگىزەدى. ويتكەنى, ميكروچيپتە ءار جانۋارعا جۇرگىزىلگەن ۆەتەرينارلىق ەم-شارالار تۋرالى اقپاراتتار دا تولىق ساقتالادى. ماماندار «ءاربىر ءۇش اي سايىن يت پەن مىسىقتارعا ەكپە ەگىلىپ تۇرعان جاعدايدا, ادامعا جۇعاتىن لەپتوسپيروز, قۇتىرما جانە باسقا اۋرۋلاردىڭ الدىن الۋعا بولادى» دەيدى. «يت پەن مىسىقتى اسىراي الماي قاڭعىتىپ جىبەرەتىندەر كوپ.سولاردىڭ سالدارىنان يەسىز قاڭعىباس يتتەر پايدا بولادى. الماتى قالاسىندا تىركەلگەن 140 مىڭ ءۇي بار. ءار ۇيدە 2-3 يت ۇستايدى», دەيدى الماتى قالاسى ۆەتەريناريا ورتالىعى باسشىسىنىڭ ورىنباسارى جىلكەلدى تىلەسباەۆ. جالپى, يت پەن مىسىقتىڭ ءجون-جوسىقسىز كوبەيۋىن توقتاتۋ ماقساتىندا زالالسىزداندىرۋ جۇمىستارىنا 117 ميلليون تەڭگە بولىنگەن. جوعارىدا ايتىلعان سايكەستەندىرۋ شاراسى الداعى 1-1,5 اي ىشىندە ىسكە اسپاق. ارمان وكتيابر, جۋرناليست