بۇزاۋدىڭ اۋزىن جاپقان تسەنتنەر
اقمولا وبلىسىنىڭ ەڭبەكشىلدەر اۋدانىنداعى «ماماي» دەگەن كەڭشارعا قابدوللا بيتتىعۇلوۆ دەگەن ازامات ديرەكتور بولىپ, ونىڭ تۇرالاپ قالعان شارۋاشىلىعىن كوتەرۋگە كوپ ەڭبەك ءسىڭىردى. سول كەڭشاردى باسقارۋدىڭ العاشقى جىلىندا وبلىستاعى جينالىستا «ماماي» كەڭشارىن 100 سيىردان 35-اق بۇزاۋ الدى دەپ قاتتى سىناپتى. كەلەسى جىلى القالى جيىندا پرەزيديۋمدا وتىرعان قابدوللانى كورگەن ءبىر ارىپتەسى: – بىلتىر 35 قانا بۇزاۋ الدىڭ دەپ سەنى قاتتى سوگىپ ەدى, بيىل قالاي تورگە وزدىڭ؟ – دەپتى ازىلدەپ. وعان قابەكەڭ ساسپاستان: – گەكتارىنا 25 تسەنتنەر 35 بۇزاۋدىڭ اۋزىن جاپتى عوي, – دەپ جاۋاپ قايتارىپتى.ماماي تىزەڭنەن كەلمەي تۇر ما؟
«ماماي» كەڭشارىندا ءبىر ازاماتتىڭ ايەلى ادۋىندى, ۇرىسقاق بولسا كەرەك. سول بىردە: – ساعان ەرەگىسكەندە يتەمگەنگە بارىپ سۋعا كەتىپ ولەمىن, – دەپ كۇيەۋىن بوپسالاپ قورقىتىپتى. سونى كورىپ تۇرعان قابەكەڭ: – وسى جەردەن 15-18 شاقىرىم يتەمگەنگە جەتكەنشە ابدەن دىڭكەلەپ شارشايسىڭ. مىنا تۇرعان ماماي نە, تىزەڭنەن كەلمەي تۇر ما؟ – دەپتى اۋىلدىڭ ىرگەسىندە جايناپ جاتقان ايدىن كولدى نۇسقاپ.بۇيىرعان ءدام-تۇز دەگەن...
اۋداندا مەكەمە باسشىسى بولعان ساكەن دەگەن اعامىز شالعايداعى ءبىر كەڭشارعا بارىپ جينالىسقا قاتىسىپ, ءسوز سويلەپ, ودان كەيىن جاسالعان داستارقاندا مارە-سارە بولىپ ءبىرشاما وتىرىپ, قونا قالىڭدار دەگەنگە قاراماستان جولعا شىققان عوي. قازان ايىنىڭ اياعى بولسا كەرەك, ءبىرازدان كەيىن قارسى بەتتەن جاپالاقتاپ قالىڭ قار جاۋىپ, جولدى مۇلدە كورسەتپەي قويىپتى. جۇرگىزۋشىسى: – اعا, بۇدان ءارى جۇرگىزە المايمىن, – دەگەن سوڭ ساكەڭ: – قون دەگەندە قونبادىق, ەندى قايتىپ بارۋىمىزدىڭ ءجونى بولماس, ماشينانى ىقتاسىنداتىپ كەرى بۇرىپ قوي, تاڭ اتۋعا دا جاقىن قالدى عوي, ءبىر ازىراق كوز شىرىمىن الايىق, – دەپ ۇيقىعا كىرىسىپ, تاڭ سىبەرلەپ اتىپ كەلە جاتقاندا كولىككە وت الدىرىپ ءجۇرىپ كەتىپتى. ءبىراز جۇرگەننەن كەيىن ەلدى مەكەننىڭ قاراسى كورىنگەنگە انىقتاپ قاراسا, سول وزدەرى شىعىپ كەتكەن كەڭشارعا قايتادان كەلىپ تۇر ەكەن. الدىندا ماشينانى كەرى بۇرىپ قويعانى ەستەرىنەن شىعىپ كەتكەنىن ەكەۋى سوندا عانا ءتۇسىنىپتى. سول جەردە ساكەن اعامىز: – كەشەگى ءۇيدىڭ ءدام-تۇزى ءبىزدى جىبەرمەي تۇر ەكەن, ەندى اتتىڭ باسىن سوندا بۇر, – دەگەن ەكەن ساسپاستان. ورىنباي شايكەنوۆ ءباسپاسوز ارداگەرى استانا
