ەكى ەلگە ورتاق «كومپوزيتور»

2017 جىلدىڭ العاشقى فيل­مىن ءتۇسىرۋ جۇمىسى قولعا الىندى. ش.ايمانوۆ اتىنداعى «قازاق­فيلم» كينوستۋدياسى قىتاي كينەما­توگرا­فيستەرىمەن بىرلەسىپ «كومپو­زيتور» (جۇمىس اتاۋى) اتتى فيلم تۇسىرمەك. اتالعان ءفيلمنىڭ ءتۇسىرۋ جۇمىستارى بو­يىن­شا كەزدەسۋ وتكىزۋ ءۇشىن قحر-دىڭ تانىمال رەجيسسەرى شەريزات ياكۋب باستاعان Shineworks كينو­كوم­پانياسىنىڭ ءتۇسىرۋ توبى الماتىعا ارنايى كەلدى. بىرلەسكەن جوبانى جۇزەگە اسىرۋ تۋرالى تالقىلاۋلار 2015 جىلى قىتايدىڭ فۋچجوۋ  قا­­لا­سىندا وتكەن «جىبەك جولى» كينو­فەستيۆالىندە باس­­تالعان بولاتىن. ال 2016 جىلى «قازاقفيلم» كينو- س­تۋ­دياسى جانە قىتايدىڭ Shineworks كينوكومپانياسى ارا­سىندا «كومپوزيتور» اتتى ءفيلمدى بىرلەسىپ شىعارۋ جانە قارجىلاندىرۋ, سونىمەن قاتار,  ورتاقتاسا وتىرىپ پروكاتقا شى­عا­رۋ جونىندە كەلىسىمگە قول قويىلدى. بۇل فيلم الەمدىك ونەرگە ەلەۋلى ۇلەس قوسقان قىتايدىڭ تانىمال كومپوزيتورى سي سينحاي­دىڭ ءومىرى مەن ونەر جولىنا ارنالماق. ۇلى وتان سوعىسى جىل­دارىندا (1941-1943) كومپوزيتور قازاقستاندا تۇرىپ,  قازاق­تىڭ تالانتتى كومپوزيتورى باقىتجان بايقاداموۆپەن دوس بولعان. كارتينا ەكى ەل اراسىن­داعى ىنتىماقتاستىق پەن كومپو­زيتورلاردىڭ دوستىعى تۋرالى سىر شەرتەدى. – بۇگىنگى كۇنگە دەيىن ءبىراز جۇمىس اتقارىلدى. قازاقستان جاعىنان سەرىك­تەستەرىمىزگە العى­سى­مىز شەكسىز. قىتايدا سي سين­حاي تۋرالى, ونىڭ ءار جىلدارى ءومىرى تۋرالى باياندايتىن فيلمدەر كوپ, بىراق كومپوزيتوردىڭ قازاقستانعا كەلىپ, از ۋاقىت بولسا دا وسىندا ءومىر ءسۇرىپ, الماتىدا جۇمىس ىستەگەنى تۋرالى كوپشىلىك بىلە بەرمەيدى. كومپوزيتوردى قا­زاقستاندا جىلى قارسى الىپ, ونىڭ شىعارماشىلىعىنا قولداۋ كورسەتكەنى تۋرالى ايتىپ بەرۋ – ءبىز ءۇشىن وتە ماڭىزدى, – دەيدى ءفيلمنىڭ رەجيسسەرى  شەريزات ياكۋب «قازاقفيلم» وكىلدەرىمەن كەزدەسۋ بارىسىندا. ش.ايمانوۆ اتىنداعى «قازاق­فيلم» اق پرەزيدەنتى باقىت قايىر­­بەكوۆ:  – «قازاقفيلم» ءۇشىن بۇل – قىتاي كينوگەرلەرىمەن جاسالعالى وتىرعان العاشقى جوبا. سوندىقتان دا, ءبىزدىڭ تاراپ­­تان بۇل جوباعا بىلىكتى ما­مان­دار تارتىلىپ وتىر. ەكى ەل ارا­سىن­داعى ونەر بايلانىسىن ارتتىرا ءتۇسۋ ماقساتىندا قولعا الىنعان ءفيلمدى ابىرويمەن اتقارىپ شىعامىز دەگەن ويدامىن, – دەدى. ورتاق كينوتۋىندى بولسا دا, شەكاراسى جوق ونەر تۋرالى تەرەڭ ويعا تياناقتالعان ءتۇسىرىلىمنىڭ نەگىزگى بولىگى قازاقستاندا وتپەك. ايگۇل احانبايقىزى, «ەگەمەن قازاقستان» الماتى