وتكەن جىلعا وكپە جوق. 2016 جىلى قازاقستان رەسپۋبليكاسى تاۋەلسىزدىگىنىڭ 25 جىلدىعىن اتاپ وتتىك. ەلىمىزدىڭ باس باسىلىمى – «ەگەمەن قازاقستان» گازەتى دە تاۋەلسىز مەملەكەت رەتىندە قالىپتاسۋدىڭ العاشقى شيرەگىندە اتقارىلعان وراسان ەڭبەكتى تاريح جادىنا ساقتاۋعا, ۇرپاقتار ەسىندە ماڭگى قالدىرۋعا قالتقىسىز قىزمەت ەتتى. ەندى ساناۋلى كۇندەردەن كەيىن الاتاۋ باۋرايىندا الاۋى جاعىلاتىن قىسقى ۋنيۆەرسيادا ويىندارى, استانا تورىندە وتەتىن ەكسپو-2017 كورمەسى, قازاقستاننىڭ بۇۇ قاۋىپسىزدىك كەڭەسىنە تۇراقتى ەمەس مۇشە رەتىندە قىزمەتكە كىرىسۋى سياقتى الەمدىك دەڭگەيدەگى ايتۋلى وقيعالاردىڭ بارىسى مەن الاش قوزعالىسىنىڭ 100 جىلدىعى سياقتى ۇلت رۋحانياتى مەن تاريحىنداعى ماڭىزدى ءىس-شارالاردىڭ اتالىپ ءوتىلۋى دە باسىلىم جۇمىسىنىڭ نەگىزگى باعدارى بولادى. جىلدى جەمىستى قورىتىندىلادىق. باسىلىمنىڭ جۇمىسىنا جاڭا باسقارۋ مەنەدجەمەنتىن ەنگىزۋمەن قاتار, گازەتتىڭ بەدەرى مەن بەينەسىن ءداستۇردى ساقتاي وتىرىپ جەتىلدىرۋدى قولعا الىپ, ءساتتى جۇرگىزدىك. ناتيجەسىندە گازەت بەتىندە ارنايى ايدارلار, بەتتەر اشىلىپ, ساراپشى ماماندار مىنبەرى وقىرمانعا جول تارتتى. «ەگەمەن قازاقستاندا» الەمدىك تاجىريبەگە نەگىزدەلگەن, كولۋمنيست-ساراپشىلار مەن اۆتورلار باعانى جارىق كوردى. باسىلىمنىڭ مازمۇندىق ساپاسى ارتىپ, جەدەل ءارى سەنىمدى اقپارات تاراتۋ تالابى جولعا قويىلدى. مىنە, ەلباسىنىڭ ماقۇلداۋىمەن, اقپارات جانە كوممۋنيكاتسيالار مينيسترلىگىنىڭ قولداۋىمەن گازەت فورماتىنا زامانعا ساي وزگەرىس ەنگىزىلدى.
قولدارىڭىزداعى «ەگەمەننىڭ» كەزەكتى ءنومىرى ەۋروپالىق ۇلگىدە باسىلدى. بۇل – ءارى ىقشام, وقۋعا, الىپ جۇرۋگە ىڭعايلى گازەت فورماتى رەتىندە الەمدە مويىندالعان, دۇنيە جۇزىنە تانىمال The Financial Times نەمەسە The New York Times سياقتى گازەتتەر الدەقاشاننان جارىق كورەتىن ۇزدىك فورمات. باسىلىمداعى وزگەرىستەر «ەگەمەننىڭ» شىعارماشىلىق ۇجىمىنا, گازەت باسشىلىعىنا ۇلكەن سەنىم مەن جاۋاپكەرشىلىك جۇكتەيدى. ءبىز ءوز تاراپىمىزدان گازەتتىڭ مازمۇندى, ساپالى, وقىرمان ءۇشىن قىزىقتى بولىپ شىعۋىنا كۇش سالاتىن بولامىز. وسى ماقساتتا ساليقالى سۇحباتتار, سالماقتى ساراپتامالار, تۇشىمدى تاقىرىپتاردى تارازىلاپ جازۋ ءداستۇرى جالعاسا بەرەدى. قازىردىڭ وزىندە وقىرمان ءىلتيپاتىنا بولەنگەن ء«بىلىم», ء«تالىم» سياقتى ارناۋلى بەتتەردىڭ مازمۇنى بايىتىلىپ, قوعامداعى مۇعالىم مارتەبەسىنىڭ لايىقتى باعاسىن الۋعا ءارى قاراي قىزمەت ەتەدى. گازەتتىڭ «رۋحانيات», «الەۋمەت», «سپورت» سياقتى تۇراقتى ايدارلارىمەن قاتار قاراپايىم وقىرمانعا ەتەنە جاقىن باسقا دا تۇرمىستىق, تانىمدىق قوسىمشا بەتتەردىڭ تۇساۋى كەسىلمەكشى. «قازپوشتا» اق مالىمەتتەرى بويىنشا, ەلىمىزدىڭ تۇكپىر-تۇكپىرىنەن 200 000-نان استام وتانداسىمىز «ەگەمەن قازاقستاننىڭ» تۇراقتى وقىرمانى بولىپ وتىر. بۇل – قازاق وقىرماندارىنىڭ تۇراقتى تاڭداۋىن بىلدىرەتىن كورسەتكىش. ءبىز ءوز تاراپىمىزدان وقىرماندارىمىزعا ىستىق ىقىلاستى العىسىمىزدى بىلدىرەمىز. گازەتكە جازىلىپ ۇلگەرمەگەن اعايىنعا باسىلىمدى جازدىرىپ الۋ قاڭتار ايىنىڭ 10-نان قايتا باستالىپ, جىل بويىنا تۇراقتى جالعاساتىنىن دا ەسكە سالامىز. ءداستۇرلى قۇندىلىقتار مەن ءتىل, ءدىل, رۋحاني مادەنيەتتىڭ دە ساباقتاسا دامۋى ءۇشىن حالىق پەن ءباسپاسوز توننىڭ ىشكى باۋىنداي بىرلىكتە بولۋى بۇلجىماس قاعيدا. ال, قازاق ءباسپاسوزىنىڭ كوشباسشىسى سانالاتىن «ەگەمەن قازاقستان» گازەتى ءۇشىن بۇل قاستەرلى مىندەتتىڭ جۇگى تىپتەن سالماقتى. بيىلعى جىلى دا «ەگەمەن قازاقستان» گازەتىنىڭ تۇراقتى وقىرمانى بولعانىڭىز ءۇشىن سىزگە مىڭ راحمەت! 2017 جىلدىڭ جاعىمدى جاڭالىعى مول بولسىن, ويلى وقىرمان!
دارحان قىدىءرالى,
«ەگەمەن قازاقستان»
