شاحتينسك قالاسىنداعى توتەنشە جاعدايدىڭ سەبەبى انىقتالدى

قاراعاندى وبلىسىنىڭ شاحتينسك قالاسىنا قاراستى شاحان كەنتىندەگى تۇرعىن ءۇي قازاندىقتىڭ جارىلۋىنان قۇلاعان, دەپ حابارلايدى «قازاقپارات». «تۇرعىن ءۇي قازاندىقتىڭ جارىلۋىنان قۇلاعان. شاحانداعى بىرقاتار تۇرعىن ۇيلەرگە جىلۋ اۆتونومدىق جۇيە ارقىلى بەرىلەدى. بۇل قازاندىق ءۇي كوميتەتىنىڭ ەسەبىندە بولدى. قازىر توتەنشە جاعدايدىڭ سالدارىن جويۋ جانە سەبەبىن انىقتاۋ بويىنشا وبلىستىق كوميسسيا قۇرىلدى», - دەدى وبلىس اكىمى نۇرمۇحامبەت ابدىبەكوۆ. مالىمەتتەرگە سايكەس, كوپقاباتتى ۇيدە 118 تۇرعىن مەكەندەگەن, ال تج ورىن العان كەزدە قۇلاعان بولىگىندە شامامەن 30 ادام بولعان. سونىمەن قاتار, وقىس وقيعاعا قاتىستى قىلمىستىق ءىس قوزعالدى. «تج دەرەگىنە قاتىستى ماتەريال قر قك-ءنىڭ 292-بابىنىڭ 3 تارماعى (ادام ولىمىنە اكەپ سوقتىرعان ءورت قاۋىپسىزدىگى تالاپتارىن بۇزۋ) بويىنشا سوتقا دەيىنگى تەرگەۋ جۇمىستارىنىڭ تىزىمىنە تىركەلدى», - دەپ حابارلادى قاراعاندى وبلىستىق ءىىد. ايتا كەتەيىك, كەشە 22:40 شاماسىندا وبلىستىق تجد-عا كوپقاباتتى ءۇيدىڭ وپىرىلعانى تۋرالى حابارلانعان. سوڭعى مالىمەتتەر بويىنشا, ءۇيىندى استىنان 9 ادامنىڭ دەنەسى شىعارىلدى. ولاردىڭ ۇشەۋى - ەر ادام, ۇشەۋى - ايەل ادام, ۇشەۋى - ءبۇلدىرشىن.