وتاندىق ەلەكتروموبيلدىڭ وزىق ۇلگىسى

ءبىر نارسە انىق: اتام زاماننان الەم ەلدەرىنىڭ, ادامزات بالاسىنىڭ يگىلىگىنە اينالىپ كەلە جاتقان مۇناي قورى ايتەۋىر ءبىر كۇنى سارقىلادى. عاسىرلار بويى قاجەتىمىزگە جاراعان جەر استى قويناۋىنداعى قازىنانىڭ ورنىن نە باسپاق؟ ءححى عاسىر باستالعالى بۇل ساۋالعا باس قاتىرىپ كەلە جاتقان عالىمدار جاۋابىن دا تاپقان. كۇن, جەل, سۋ كوزدەرىنەن وندىرىلەتىن قۋاتتار جاقىن ارادا-اق قولدانىسقا ەنبەك. مۇنايدىڭ ورنىن باساتىن مۇنداي جاڭالىقتان قازاق تا قۇرالاقان ەمەس. وزگەدەن كەرەگىن الىپ, ءوزى دە بارىن بەرۋدە. سونىڭ بىرەگەيى – ەلەكتر قۋاتىمەن قوزعالاتىن ەلەكتروموبيل. راس, جانارمايسىز جۇرەتىن كولىكتىڭ العاشقىسى امەريكالىق «تەسلاعا» تيەسىلى. ودان كەيىن دە بىرنەشە دامىعان مەملەكەت ءوز ەلەكتروموبيلىن شىعارىپ ۇلگەر­دى. ال ولاردىڭ قازاقستاندىق بالاماسى «كIA Soul EV» قاي ەلدىڭ دە ونىمىنەن, ساپا جاعىنان تارازىلاساق تا, ءسان جاعىنان سالىستىرساق تا, ەسە جىبەرمەيدى. ايتالىق, بۇل كولىك ساعاتىنا 27كۆت قۋاتى بار باتارەيامەن جابدىقتالعان. ءبىر قۋاتتاعاندا 200 شاقىرىمدى ەركىن ەڭسەرەدى. ەڭ شەكتى جىلدامدىعى – ساعاتىنا 145 شاقىرىم. كولىكتىڭ باتارەيا­سىن سالقىنداتىپ نەمەسە ىسىتىپ تۇراتىن تەرمورەتتەگىش­تىڭ ارقاسىندا ەلەكتروموبيل­دى جىلدىڭ ءتورت مەزگىلىندە دە پايدالانۋعا بولادى. وسكەمەننىڭ زاۋىتى وندىرگەن «KIA Soul EV» 30 گرادۋس اياز كەزىندە استانا مەن شىعىس قازاق­­ستاننىڭ جولدارىندا تەستى­لەۋ­دەن ءوتتى. ءجۇز شاقىرىمعا جۇم­سالعان قۋات شىعىنى نەبارى 170 تەڭگەنى قۇرايدى. ...ەكى عاسىر كەيىنگە شەگى­نىپ, الەمگە كوز سالا قويىڭىز­شى. فرانتسيالىق بەنتستىڭ ءۇش دوڭگەلەكتى, ەكى ورىندى, جانارمايمەن جۇرەتىن العاش­قى كولىگى عىلىمعا توڭكەرىس اكەلگەن. تاعى باسقا دەرەكتەر زيگفريد ماركۋستىڭ 1875 جىلى قۇراستىرعان ۇلگىسى – «جانارمايمەن جۇرەتىن العاشقى كولىك» سانالاتىنىن ايتادى. سودان كەيىن ساعاتىنا 100 شاقىرىم جىلدامدىقپەن جۇرەتىن كولىك پاريجدە قۇراستىرىلعان ەكەن. بەلگيالىق كاميلل جەناتتسي مۇنى 1899 جىلى شىعارعان. ءحىح, حح عاسىرلار كولىك سالاسىنىڭ جەتىستىكتەرىنە تولى بولعانى راس. ال اعىمداعى ءجۇز­­جىل­دىق ادامزات يگىلىگىنە ەلەكترو­موبيلدى ۇسىندى. ءور­كە­نيەت­كە ۇمتىلعان كوشتىڭ باسىندا ويۋلى بورىك كيگەن قازاق تا بار. ەلباسى نۇرسۇلتان نازارباەۆتىڭ جاقىن­دا عانا وتكەن جالپىۇلتتىق تەلە­كوپىردە «مەن تاياۋ ارالىقتا بارشا قازاقستان ەلەكتروموبيلمەن جۇرگەنىن ارماندايمىن. ولاردىڭ باعاسى قولجەتىمدى بولادى», دەۋى بەكەر ەمەس. دامىعان, دامۋشى نارىقتاردا – قىتايدا, ەۋروپانىڭ سولتۇستىگىندە, اقش-تا ەلەكتروموبيل ءوندىرىسى مەملەكەت تاراپىنان بەرىلەتىن سۋبسيديا ارقىلى دامۋدا. مىسالى, قىتايدا ەلەكتروموبيل ساتىپ العان ءاربىر ازامات 14 مىڭ دوللار كولەمىندە سۋبسيديا الادى. پرەزيدەنت سوزىنەن كەيىن بۇل سەكىلدى جاردەم تاياۋ ارادا بىزگە دە جەتىپ قالاتىنىنا ءۇمىت كۇشەيدى. عاسىر كوشىنەن ءبىز دە قالىس­پاق ەمەسپىز. جاڭا تەمىر تۇل­پاردى ءار قازاق تاقىمدار كۇن دە تۋار... اسحات رايقۇل, «ەگەمەن قازاقستان»