پاۆلودار ەستافەتانى وتكىزۋگە ءازىر

پاۆلودار 2017 جىلى الماتىدا وتەتىن بۇكىلالەمدىك قىسقى ۋنيۆەرسيادانىڭ ايماقتىق الاۋ ەستافەتاسىن وتكىزۋگە دايىن. بۇگىندە باعىتتار بەلگىلەنىپ, الاۋدى قالا كوشەلەرىمەن الىپ جۇرەتىن ادامدار انىقتالدى. – ۋنيۆەرسيادا – ەل مەرەيىن وسىرەتىن ءىرى جارىس. سوندىقتان ونى بارىنشا ناسيحاتتاۋ كەرەك. الاۋ ەستافەتاسىنا قاتىساتىنىما قۋانىشتىمىن. بۇل مەنىڭ ومىرىمدەگى جارقىن ساتتەردىڭ ءبىرى, – دەيدى ۋنيۆەرسيادانىڭ ايماقتىق الاۋ ەستافەتاسىنا قاتىساتىن سپورت ارداگەرى, پاۆلودار قالاسىنىڭ قۇرمەتتى ازاماتى امانگەلدى ايماعامبەتوۆ. وبلىستىق دەنە شىنىقتىرۋ جانە سپورت باسقار­ماسىنىڭ باس مامانى ايبەك اقىلجانوۆتىڭ ايتۋىنشا, ايماقتىق ەستافەتا الاۋى 26 قاڭتاردا س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىندە جاعىلادى. الاۋ لوموۆ-ساتباەۆ-كريۆەنكو-لەنين كوشەلەرى ارقىلى ەستاي اتىنداعى مادەنيەت سارايىنا جەتكىزىلەدى. مۇندا كىشىگىرىم تەحنيكالىق ءۇزىلىس ورىن الادى. ودان كەيىن الاۋ ۇستاۋشىلار «سارىارقا» قوناق ءۇيىنىڭ جانىمەن تورايعىروۆ كوشەسىنە تۇسەدى. ءسويتىپ, تورايعىروۆ-كۋتۋزوۆ-كريۆەنكو كوشەلەرى ارقىلى «استانا» مۇز سارايىنا جەتكىزىلەدى. مۇندا ۋنيۆەرسيادانىڭ قۇرمەتىنە جەرگىلىكتى جانە قازاقستان ونەر جۇلدىز­دارى­نىڭ قاتىسۋىمەن گالا-كونتسەرت وتپەك. شارا اياقتالعان سوڭ, الاۋ ۇشاق ارقىلى جاھاندىق جارىس وتەتىن الماتىعا جونەلتىلەدى. – ۋنيۆەرسيادانىڭ الاۋ ەستافەتاسىنا پاۆلودار وبلىسىنان 60 ادام قاتىسادى. ولاردىڭ قاتارىندا ستۋدەنتتەر, سپورتشىلار, سپورت ارداگەرلەرى بار. ەستافەتانىڭ جالپى ۇزاقتىعى 10-12 شاقىرىمدى قۇرايدى. ءاربىر قاتىسۋشى 200 مەتردەن جۇگىرىپ وتەدى, – دەيدى ا.اقىلجانوۆ. ۋنيۆەرسيادانىڭ رەسمي سايتى حابارلاعانداي, الاۋ ەستافەتاسى ەلىمىزدىڭ 16 قالاسىندا وتكىزىلەدى. ەڭ ۇزاق ەستافەتا الماتى قالاسىندا تىركەلمەك. مۇنداعى ەستافەتانىڭ ۇزاقتىعى 20 شاقىرىمدى قۇرايدى. جالپى, ۋنيۆەرسيادا الاۋى 22 500 شاقى­رىمدىق قاشىقتىقتى باعىندىرادى. فارحات امىرەنوۆ پاۆلودار