ديپلوم ديپلوماتتان شىقپايتىن ۋاقىت ءوتتى

تالپىنساڭ تالابىڭا نۇر جاۋار ۋاقىت جەتتى ديپلوم ديپلوماتتان شىقپاعان ۋاقىت بولعان. ءبىر كەزدەرى ۇلكەن ءومىردىڭ جولداما­سىنداي, باياندى بولاشاقتىڭ باستاماسىنداي بولعان ديپلوم كوپ قۇجاتتىڭ ءبىرى رەتىندە جاتتى. ەكىنىڭ ءبىرى, ەگىزدىڭ سىڭارىنىڭ قولى جەتە بەرمەيتىن قۇندى قۇجات قۇندىلىعىنان ايرىلا باستاعانداي ەدى. تاۋەلسىزدىكتىڭ ەلەڭ-الاڭىندا قوس-قوستان قاتىرما قاعازى بولسا دا, ەكى قولعا ءبىر كۇرەكتى قاناعات ەتكەندەردىڭ قاراسى كوبەيدى. ساۋداگەردىڭ سانى ارتتى. ەتەك-جەڭىڭدى جابا الماي, وڭ-سولىڭدى تاني الماي جاتقان زاماندا مۇنداي كەرى قۇبىلىستىڭ بولۋى تاڭقالارلىق ەمەس ەدى. دەگەنمەن ۋاقىت ءبىر ورنىندا تۇرمايدى. العا جىلجيدى. دامىلدامايدى, داميدى. مىنا ءومىر بىزدەن سابىردى تالاپ ەتەدى. «سابىر ءتۇبى – سارى التىن» ەكەنىن بابالارىمىز باياعىدا ايتىپ كەتكەن. ءبىر ادامنىڭ عانا ەمەس, بۇكىل ەلدىڭ سابىرى مەملەكەتتى جۇرىسىنەن جا­ڭىل­دىرمايدى. دوڭعالاعىنا اعاش تىقپايدى, قايتا العا جۇرۋىنە كومەك قىلادى. ۇلكەن سا­بىر­دىڭ ارقاسىندا قازاق ەلى دامۋدىڭ داڭعىل جولىنا ءتۇستى. ەلدىڭ الەۋەتى ارتقان سايىن, جۇمىس كۇشىنىڭ دە قاجەتتىلىگى تۋىندايدى. ءسوي­تىپ, ەكونوميكامىز وركەندەگەن سايىن, جۇمىس­سىز­داردىڭ سانى قىسقارا باستايدى. بىراق جۇ­مىسقا تاجىريبەسى مول, كورگەن-بىلگەنى بار بىلىكتى ماماندار تارتىلادى. ول – زاڭدى دا. ءويت­كەنى, كادردىڭ قادىرى ارتتى. «كادر ءبارىن شەشەدى» دەگەن ەسكى ءتامسىلدى باسشىلىققا العان مەكەمەلەر, تىسقاققان مامانداردى پىشاق ۇستىنەن تاراتىپ الىپ جاتتى. ال جاس مامان شە؟ ديپلومىن كەشە عانا الىپ, ءومىردىڭ قايناعان قازانىنا ەندى كىرسەك دەگەندەر شەتقاقپاي كوردى. ءار ەسىكتى قاعىپ, قانشا تابالدىرىقتى توزدىرعانىمەن, جۇمىس تابىلمادى. تاۋداي تالاپتارى شاعىلا باستادى. كوبىسى ديپلومىن ءبىر سيپاپ ساندىققا سالىپ, باسقا كاسىپ ىزدەدى. وسى ساتتە عوي «ديپلومنىڭ قۇنى كوك تيىن» دەگەن اڭگىمەنىڭ ايتىلا باستاعانى. دەسەك تە, مەملەكەت ازاماتتارىن دالادا قالدىرمادى. ەلباسىنىڭ سىندارلى ساياساتىنىڭ ارقاسىندا «ديپلوممەن – اۋىلعا» باستاماسى كوتەرىلدى. ونىڭ قوعام ءۇشىن قان­شا­لىقتى قۇندى ەكەنىن ايتىپ جاتۋدىڭ ءوزى باسى ارتىق ماسەلە. بىراق ەل ۇدەرە قالاعا كوشكەندە جاستاردى اۋىلعا جۇمىس ىستەۋگە جىبەرۋ, سو­نى­مەن قاتار, جاس ماماندارعا ۇستەمەاقى تولەپ, باسپانامەن قامتاماسىز ەتۋدىڭ قانشالىقتى ساۋاپتى ءىس ەكەنىن اركىمنىڭ ءىشى سەزسە كەرەك. وسى باستامانىڭ اياسىندا جۇمىسقا ور­نالاسقان جاس ماماننىڭ ءبىرى – دينارا جالەلو­ۆا. ەندىگى جايدى دينارانىڭ ءوز اۋزىمەن بايان­دايىق. – جوعارى وقۋ ورنىن ءبىتىرىپ, قولىنا ديپلوم العان ءاربىر جاس تۇلەكتىڭ باستى پروب­لە­ما­سى جۇمىسقا ورنالاسۋ بولسا كەرەك. ويتكەنى, ءىس-تاجىريبەسىنىڭ جوقتىعىن سىلتاۋراتىپ, جۇمىس­قا قابىلداۋدان باس تارتاتىندار كوپ كەزدەسەدى. جاستار ءۇشىن وسىنداي تولعاندىرارلىق ءما­سە­لەگە مەملەكەت تاراپىنان نازار اۋدارىلىپ, ەلباسىمىز ن.ءا.نازارباەۆتىڭ تىكەلەي باسشى­لىعىمەن ءارتۇرلى جوبالار, باعدارلامالار ىسكە اسىرىلۋدا. سونىڭ باس­تىسى, «ديپلوممەن – اۋىلعا» باعدار­لا­ماسى دەسەك بولادى. بۇل باعدارلاما بوي­ىن­شا جوعارى وقۋ ور­نىن, كوللەدجدەردى بىتىرگەن جاس تۇلەكتەرگە مەملەكەتتىك قولداۋ كور­سە­تىلۋدە. سونىڭ ار­قا­سىندا ءدال قازىر كوپ­تەگەن جاس كادرلار ءوز ماماندىعى بويىن­شا جۇمىس ىستەپ جاتىر. ال ءوزىم 2010 جىلى قورقىت اتا اتىنداعى قىزىلوردا مەملەكەتتىك ۋنيۆەرسيتەتىن حيميا ماماندىعى بويىنشا ءبىتىرىپ كەلدىم. «ديپ­لوممەن – اۋىلعا» باعدارلاماسى بوي­ىن­شا ءوزىم تۋىپ وسكەن قازالى اۋدانى, اباي اۋىلىنا كەلىپ, بىتىرگەن مەكتەبىمە قىزمەتكە  ورنالاستىم. ماعان №90 ورتا مەكتەپ باس­شى­لارى مەن تاجىريبەلى ۇستازدارى قازىرگى زامانعى وقۋ مەن تاربيەنىڭ قىر-سىرىن ۇيرە­تىپ, پەداگوگيكالىق شەبەرلىككە تاربيەلەۋدە. «ديپلوممەن – اۋىلعا» باعدارلاماسى بوي­ىن­شا جۇمىسقا ورنالاسقاننان سوڭ اۋداندىق ءبىلىم بولىمىنە جانە اۋداندىق جۇمىسپەن قامتۋ جانە الەۋمەتتىك باعدارلامالار ءبو­لى­مى­نە قاجەتتى قۇجاتتاردى وتكىزدىم. باعدار­لا­ماعا سايكەس 98 000 تەڭگە كولەمىندە ۇستە­مە­اقىمدى الدىم. ودان بولەك بيىل بەرىلەتىن قارجىلاي قولداۋدى جاقىن كۇندەرى الامىن دەپ وتىرمىن. بۇل باعدارلاما جالعىز مەنىڭ عانا ەمەس, ەلىمىزدەگى مەن سياقتى مىڭداعان جاس مامانداردىڭ جۇمىسقا دەگەن ىقىلاسىن ارتتىردى. باستىسى, ءبىز مەملەكەتتىڭ بولا­شا­عى ەكەنىمىزدى تۇسىندىك. ەلدىڭ كەلەشەگى ءۇشىن جۇمىس ىستەي بەرمەكپىز, دەيدى جاس مامان. ەرجان بايتىلەس, قىزىلوردا وبلىسى.