جيىنعا مەملەكەتتىك قىزمەت ىستەرى اگەنتتىگىنىڭ باسشىلىعى, ءماجىلىس دەپۋتاتتارى, مەملەكەت جانە قوعام قايراتكەرلەرى, قوعامدىق ۇيىمدار مەن عىلىمي زەرتتەۋ ينستيتۋتتارىنىڭ ساراپشىلارى, جوعارى وقۋ ورىندارىنىڭ باسشىلارى, سونداي-اق اكادەميانىڭ پروفەسسورلىق-وقىتۋشىلىق قۇرامى مەن قىزمەتكەرلەرى قاتىستى. ولار اشىق ديالوگ الاڭىندا ويلارىن ورتاعا سالىپ, جاڭا نورمالاردى ءتۇسىندىرىپ, ءوزارا پىكىر الماستى.
«كونستيتۋتسيالىق دەڭگەيدە ادام كاپيتالىن, ءبىلىم مەن عىلىم, يننوۆاتسيا مەن مادەنيەتتى دامىتۋ باسىمدىعى بەكىتىلۋى مەملەكەتتىك ساياساتتىڭ وزەگىندە ادام جانە ونىڭ الەۋەتى تۇرعانىن ايقىن كورسەتەدى. مەملەكەتتىك اپپاراتتىڭ باستى مىندەتى دە وسى قاعيداتتان تۋىندايدى. بۇگىندە اگەنتتىك پارلامەنتكە «مەملەكەتتىك قىزمەت تۋرالى» زاڭنىڭ جاڭا جوباسىن ەنگىزدى. زاڭ جوباسىنىڭ فيلوسوفياسى «مەملەكەت – ادام ءۇشىن» قاعيداتىنا نەگىزدەلگەن. ءبىز مەملەكەتتىك قىزمەتتىڭ سەرۆيستىك ءارى كليەنتكە باعدارلانعان مادەنيەتىن قالىپتاستىرىپ جاتىرمىز. نەگىزگى ماقسات – مەملەكەتتىك قىزمەتتەردى جەدەل ءارى قولجەتىمدى ەتۋ, بيۋروكراتيالىق كەدەرگىلەردى بارىنشا ازايتۋ, سىبايلاس جەمقورلىقتىڭ تۋىنداۋىنا نەگىز بولاتىن العىشارتتاردى جويۋ. جاڭا كونستيتۋتسيا جوباسىن قولداي وتىرىپ, ءبىز ءادىل ءارى ءتيىمدى قازاقستاننىڭ جاڭا ارحيتەكتۋراسىن قالىپتاستىرۋعا باعىتتالعان ورتاق قادام جاسايمىز», دەدى مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي.
جيىندا ءماجىلىس دەپۋتاتى, كونستيتۋتسيالىق رەفورما جونىندەگى كوميسسيا مۇشەسى مارات ءباشىموۆ جاڭا اتا زاڭ جوباسىنداعى نورمالار فورمالدى وزگەرىس ەمەس, مازمۇندىق تۇرعىدان ازاماتتىڭ مۇددەسىن قورعاۋعا باعىتتالعان جۇيەلى قادام ەكەنىن جەتكىزدى.
«جاڭا كونستيتۋتسياداعى ەنگىزىلگەن نورمالاردىڭ بارلىعى ادام قۇقىعى ستاندارتتارىنا تولىق سايكەس كەلەدى. مەن ۇسىنعان باستامالاردىڭ ءبىرى – جەكە جانە پەرسونالدىق قۇقىقتى كونستيتۋتسيالىق دەڭگەيدە ناقتىلاپ, ولاردىڭ جاۋاپكەرشىلىك تەتىكتەرىن كۇشەيتۋ. بۇگىندە جەكە دەرەكتەردى قورعاۋ, ازاماتتىڭ جەكە ومىرىنە قول سۇقپاۋ سەكىلدى ماسەلەلەر ەرەكشە ماڭىزعا يە. سوندىقتان مۇنداي قۇقىقتاردى جوعارى دەڭگەيدە بەكىتۋ – ۋاقىت تالابى. ەڭبەك قۇقىقتارىنا كەلسەك, قولدانىستاعى نورمادا «ەڭبەك بوستاندىعى» ۇعىمى قولدانىلعان. ال جاڭا جوباداعى «ەڭبەك ەتۋ قۇقىعى» دەگەنىمىز – ازاماتتىڭ جۇمىس ىستەۋ ەركىندىگى عانا ەمەس, سونىمەن قاتار جۇمىسقا ورنالاسۋ مۇمكىندىگى, الەۋمەتتىك كەپىلدىكتەر, ءادىل جالاقى, قاۋىپسىز ەڭبەك جاعدايى سەكىلدى كەشەندى قورعالۋى دەگەن ءسوز. ەگەر بۇل قاعيدا كونستيتۋتسيالىق دەڭگەيدە بەكىتىلسە, وندا ەڭبەك كودەكسى مەن وزگە دە الەۋمەتتىك زاڭنامالار سوعان سايكەس كەلتىرىلۋگە ءتيىس. ناتيجەسىندە, ەڭبەك قاتىناستارىنا دەگەن كوزقاراس تا, قۇقىقتىق مادەنيەت تە وزگەرەدى», دەدى ول.
جاڭا كونستيتۋتسيانىڭ باستى ەرەكشەلىگى – ونىڭ شىن مانىندە حالىقتىڭ قاتىسۋىمەن ازىرلەنۋى. پرەزيدەنت جانىنداعى مەملەكەتتىك باسقارۋ اكادەمياسىنىڭ پروفەسسورى زۇلفۇحار عايىپوۆتىڭ ايتۋىنشا, كونستيتۋتسيالىق رەفورما جونىندەگى كوميسسيا جۇمىسىنىڭ اشىق فورماتتا, تىكەلەي ەفير ارقىلى جۇرگىزىلۋى, 10 مىڭنان اسا ۇسىنىستىڭ قارالۋى – قۇجاتتىڭ جالپىۇلتتىق سيپات العانىن كورسەتەدى. سونداي-اق ول 7-باپتا مەملەكەت پەن ءدىننىڭ اراقاتىناسى ايقىن كورسەتىلگەنىن ايتتى.
«پرەامبۋلادا مىڭجىلدىق تاريحىمىزعا سىلتەمە جاسالۋى – تاريحي ساباقتاستىقتى ساقتاۋ مەن ۇلتتىق بىرەگەيلىكتى نىعايتۋدىڭ ايقىن كورىنىسى. بۇل – كەلەشەك ۇرپاققا باعىتتالعان يدەولوگيالىق ءارى قۇندى باعدار. سونداي-اق زايىرلىلىق قاعيداتىنىڭ جازىلىپ, ءدىن مەن مەملەكەت بولەك دەپ كورسەتىلۋى قۇقىقتىق ناقتىلىقتى قامتاماسىز ەتەدى. جالپى العاندا, جاڭا كونستيتۋتسيا – قۇقىقتىق قۇجات قانا ەمەس, ەلىمىزدىڭ بولاشاق دامۋ باعىتىن ايقىندايتىن ستراتەگيالىق باعدار», دەدى ز.عايىپوۆ.
