سالتاناتتى راسىمگە وبلىس اكىمى سەرىك ءبىلالوۆ قاتىسىپ, كوپ بالالى انالار مەن ەڭبەك وزاتتارىن ماراپاتتادى. كامەلەتكە تولعان جاسوسپىرىمدەرگە جەكە كۋالىكتەر تاپسىردى. وسى كۇنى قاراقوعا اۋىلىندا 75 ورىندىق بالاباقشا پايدالانۋعا بەرىلدى. بۇرىنعى كاسىپتىك-تەحنيكالىق ۋچيليششەنىڭ ەسكى عيماراتىن كۇردەلى جوندەۋدەن وتكىزۋگە 56 ميلليون تەڭگە جۇمسالدى. ايماق باسشىسى مەكتەپكە دەيىنگى تاربيە ورنىنا پلازمالىق تەلەديدار تارتۋ ەتتى.
ءومىر ەسقالي, سولتۇستىك قازاقستان وبلىسى.
ستۋدەنتتەر ءۇيى اشىلدى. جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىندە 560 ورىندىق توعىز قاباتتى ستۋدەنتتەر ءۇيى سالىنىپ پايدالانۋعا بەرىلدى. ونىڭ قۇرىلىسىنا رەسپۋبليكالىق بيۋدجەتتەن 957 ميلليون تەڭگە بولىنگەن. جاڭا عيماراتتا ستۋدەنتتەردىڭ وقىپ ىزدەنۋلەرىنە, عىلىمي-شىعارماشىلىق جۇمىستارمەن اينالىسۋلارىنا ءارى تىنىعىپ دەمالۋلارىنا قاجەتتى بارلىق الەۋمەتتىك-تۇرمىستىق جاعدايلار بار. ەكى ادامدىق تۇرعىن بولمەلەر سوڭعى ۇلگىدەگى ءساندى دە ساپالى جيھازدارمەن جابدىقتالعان. ستۋدەنتتەر ۇيىندە كىتاپحانا, دەمالىس بولمەلەرى, وقۋ زالدارى, اسحانا, كومپيۋتەر كابينەتتەرى جۇمىس ىستەيدى. سونىمەن بىرگە, ەليتارلى جاتاقحانانىڭ ءار قاباتىنا تەلەديدار, اۆتوماتتى كىر جۋ ماشينالارى قويىلعان.
تەمىر قۇسايىن, ورال.
وبلىستىق ونەر مۇراجايىنا تارتۋ. ەلىمىزدىڭ 20 جىلدىق دامۋ بەلەستەرىنە اتىراۋلىقتار وتكەن اپتادا «الەم قاۋىمداستىعى مويىنداعان قازاقستان» اتتى فوتوكورمەنى تاماشالاعاندا كوز جەتكىزدى. بۇل فوتوكورمەنى اتىراۋداعى وبلىستىق ونەر مۇراجايىنا ارنايى اكەلگەن «قازاقستان حالقىنىڭ رۋحاني دامۋ قورى» اق-تىڭ ءبولىم باستىعى حاديشا ەرسەيىتوۆانىڭ ايتۋىنشا, ءبىر مىڭنان اسا فوتولارمەن ايشىقتالعان فوتوكورمە «ەگەمەن قازاقستان», «كازاحستانسكايا پراۆدا» گازەتتەرىنىڭ فوتوتىلشىلەرى تۇسىرگەن تۋىندىلارمەن تولىققان. وسى فوتوكورمەگە قويىلعان تۋىندىلاردىڭ اراسىنان 105 فوتوسۋرەت وبلىستىق ونەر مۇراجايىنا تارتۋ رەتىندە قالدىرىلدى.
جولداسبەك شوپەعۇل, اتىراۋ وبلىسى.
292 ملن. تەڭگەگە جاڭا اتتراكتسيوندار. قىزىلوردادا تۇرعىندار دەمالاتىن ورىن اسا كوپ ەمەس. قالالىق دەمالىس باعىنداعى بالالارعا قىزمەت كورسەتەتىن ويىن الاڭدارىنا جيىرما جىلدان استام ۋاقىت بولعان. ابدەن ەسكىرگەنى بىردەن بايقالاتىن. جىل باسىندا وبلىس اكىمى بولاتبەك قۋاندىقوۆ قالالىق دەمالىس باعىنداعى ويىن الاڭدارىنىڭ جاڭالاناتىنىن, ونىڭ باعاسى حالىققا ءتيىمدى بولاتىنىن ايتقان. اكىم ۋادەسىن ورىندادى. وتكەن اپتادا ساياباققا جاڭا اتتراكتسيوندار اكەلىنىپ, ەل يگىلىگىنە بەرىلدى. ول ءۇشىن وبلىستىق بيۋدجەتتەن 292 ملن. تەڭگە ءبولىندى. وسى قارجىعا يتاليادان «تاڭعاجايىپ كەرۋەن», «الداسپان», «شاتتىق پويىزى», «سيقىرلى ۇياشىق», «بالدىرعان», «قاناتتى تۇلپار» اتتراكتسيوندارى ساتىپ الىندى. بالالارعا جاسالعان بازارلىقتى تارتۋعا ايماق باسشىسى بولاتبەك قۋاندىقوۆ قاتىستى.
ەرجان بايتىلەس, قىزىلوردا.
ورتالىق باقتاعى دوستىق مەرەكەسى.وتكەن اپتادا وبلىس ورتالىعىندا قازاقستان حالقى اسسامبلەياسى جەرگىلىكتى بولىمشەسى ۇيىمداستىرعان ء«بىر شاڭىراق اياسىندا» اتتى دوستىق فەستيۆالى اياقتالدى. فەستيۆال 21 مامىردا باستالىپ, ەلىمىزدىڭ كونستيتۋتسياسى مەرەكەسى كۇنىنە وراي قورىتىندى كونتسەرتىن جاسادى. وسى كۇنگە وراي «ۆوزروجدەنيە», «پولونيا» نەمىس, پولياك مادەني ورتالىقتارىنىڭ اۋداندارداعى وكىلدەرى شاقىرىلدى ومبىلىق «پولونەز» اتتى پولياك بىرلەستىگى قوناققا كەلدى. «فەستيۆالدى ۇيىمداستىرۋداعى ماقسات قالا تۇرعىندارىن ءار ۇلتتىڭ ونەرىمەن تانىستىرۋ, حالىقتار دوستىعىن ۇلگى ەتۋ», دەيدى قحا اپپاراتىنىڭ مەڭگەرۋشىسى سەيسەنباي جەتپىسباەۆ. ءار اپتا سايىن قالالىق باقتى ءان مەن بيگە بولەگەن مادەني ورتالىقتار قالا تۇرعىندارىمەن كەلەسى جازدا «دوستىق فەستيۆالىندە كەزدەسكەنشە!» دەپ قوشتاستى.
فاريدا بىقاي, پاۆلودار.
جەتى دارىگەرگە پاتەر بەرىلدى. شىعىس قازاقستان وبلىسىنىڭ اكىمى ب.ساپارباەۆ كوكپەكتى اۋدانىنىڭ بۇرىنعى ورتالىعى – سامار اۋىلىندا بولعان كەزىندە «رومات» فارماتسەۆتىك كومپانياسىنىڭ ءدارىحاناسىن تاماشالاپ كوردى. ءدارىحانا ىشىندە ەكى مىڭنان استام ءدارى-دارمەك تۇرلەرى, بالالارعا ارنالعان وسىنشاما تاعام تۇرلەرى بار ەكەن. باعالارى ارزان. سول كۇنى ءوڭىر باسشىسى كۇردەلى جوندەۋدەن وتكەن مادەنيەت ءۇيىن ارالاپ, جەتى دارىگەرگە جاڭا پاتەردىڭ كىلتىن تاپسىردى جانە 350 مىڭ تەڭگە كومەك كورسەتتى.
وڭداسىن ەلۋباي, شىعىس قازاقستان وبلىسى.
عاسىر بەلەسىنەن بيىك عۇمىر. كوكشە جۇرتشىلىعى وزدەرىنىڭ داڭقتى جەرلەسى, جازۋشى يبراگيم سالاحوۆتىڭ 100 جىلدىعىن ۇلكەن تەبىرەنىسپەن اتاپ ءوتتى. قازاقستان تاۋەلسىزدىگىنىڭ 20 جىلدىق مەرەكەسى اياسىنداعى قۇرمەت شاراسىنا تاتارستان رەسپۋبليكاسىنىڭ وكىلەتتى وكىلى رافايل ابلاكوۆ باستاعان دەلەگاتسيا قاتىستى. سالتاناتتى كەشتە وبلىستىق تاتار مادەني ورتالىعىنىڭ توراعاسى فارۋك بوگاپوۆ, جۋرناليست اليا احەتوۆا جازۋشىنىڭ ءومىرى مەن شىعارماشىلىق جولى تۋرالى بايانداما جاسادى. يبراگيم نيزام ۇلى 1911 جىلعى 30 تامىزدا اعاش شەبەرىنىڭ وتباسىندا تۋعان. ول اۋىر دا ونەگەلى تىرشىلىك كەشتى. 1937 جىلدىڭ 24 قازانىندا «حالىق جاۋى» رەتىندە جازىقسىز سوتتالىپ, ون جىلعا «يتجەككەنگە» ايدالدى. كوكشەلىك جازۋشى «كولىما قاسىرەتى» رومانى ءۇشىن 1990 جىلى تاتارستان مەملەكەتتىك سىيلىعىنىڭ لاۋرەاتى اتانسا, قازاقستان پرەزيدەنتىنىڭ قولىنان «پاراسات» وردەنىن العان.
باقبەرگەن امالبەك, كوكشەتاۋ.
