وسكەمەن اۋەجايى تولىعىمەن جاڭعىرتىلادى

وسكەمەن اۋەجايىنىڭ ۇشۋ-قونۋ جولاعى 2800 مەترگە دەيىن ۇزارتىلىپ, 45 مەترگە دەيىن كەڭەيتىلەتىن بولدى. سونىمەن قاتار جۇك تەرمينالى, ۋاقىتشا ساقتاۋ قويماسى مەن اپاتتىق-قۇتقارۋ ستانساسى قۇرىلىستارىن جۇرگىزۋ جانە بەلگى بەرۋشى جارىق قۇرالدارىن ورناتۋ جوسپارلانىپ وتىر. اتالعان جۇمىستاردى جۇزەگە اسىرۋ ءۇشىن 5,2 ميلليارد تەڭگە كولەمىندە قارجى تارتىلماق. ونىڭ ىشىندە 1 ميلليارد تەڭگە – ۇكىمەت تاراپىنان, 2,5 ميلليارد تەڭگە وبلىستىق بيۋدجەتتەن قاراستىرىلىپ وتىر. ال 1,5 ميلليارد تەڭگە كولەمىندەگى قارجى ەۋروپالىق قايتا قۇرۋ جانە دامۋ بانكىنەن الىنادى. وسى تاراپتا وبلىس اكىمدىگى مەن ەۋروپالىق قايتا قۇرۋ جانە دامۋ بانكىنىڭ جەتەكشىلەرى وسكەمەن قالاسىنىڭ اۋەجايىن جاڭعىرتۋعا باعىتتالعان جوبانى جۇزەگە اسىرۋ تۋرالى الدىن-الا كەلىسىمگە قول قويدى. – اۋەجايدى جاڭعىرتۋ: جۇك تەرمينالىن, ۋاقىتشا ساقتاۋ قويماسىن, اپاتتىق-قۇتقارۋ ستانساسىن تۇرعىزۋ, بەلگى بەرۋشى جارىق قۇرالدارىن جاڭارتۋ بارلىق حالىقارالىق رەيستەردى كەدەرگىسىز قابىلداۋعا مۇمكىندىك بەرەدى, – دەيدى «وسكەمەن قالاسىنىڭ اۋەجايى» اق پرەزيدەنتى نيكولاي كورولەنكو. جالپى, جوندەۋدەن كەيىن اۋەجايدىڭ ۇشۋ-قونۋ جولاعى 300 مەترگە ۇزارادى. 2018 جىلى باستالاتىن قۇرىلىستىڭ ءنورماتيۆتى مەرزىمى 22 اي. سونداي-اق بۇگىندە وسكەمەن اۋەجايى عيماراتىنىڭ جانىنان ساعاتىنا 200 ادامعا قىزمەت كورسەتەتىن جولاۋشىلار تەرمينالى سالىنۋدا. بۇل نىساننىڭ قۇرىلىسى 2017 جىلدىڭ ورتاسىندا اياقتالادى. ايتا كەتكەن ءلازىم, قازىرگى كەزدە وبلىس اكىمدىگىنىڭ ەقدب-مەن ينۆەستيتسيالىق قورى 245 ميلليارد تەڭگەنى قۇرايدى. ونىڭ ىشىندە 43 ميلليارد تەڭگەگە الدىن الا جانە نەسيەلىك كەلىسىمدەرگە قول قويىلدى. دۋمان اناش, "ەگەمەن قازاقستان" وسكەمەن.