بيىل 70,8 ملن توننا مۇناي مەن كوندەنسات ءوندىرىلدى

2016 جىلى وتاندىق اۋىل شارۋاشىلىعى وندىرۋشىلەرىنە جانار-جاعارماي جەتكىزۋ مىندەتتەمەسى تولىق ورىندالدى. بۇل تۋرالى قر ۇكىمەت وتىرىسى بارىسىندا اعىمداعى جىلدىڭ 11 ايىندا قازاقستاننىڭ مۇنايگاز سالاسىنداعى دامۋ ناتيجەلەرىن, سونداي-اق ىشكى جانار-جاعارماي نارىعىنداعى احۋالدى قاراستىرۋ بارىسىندا ايتىلدى. قر ەنەرگەتيكا ءمينيسترى قانات بوزىمباەۆ اتالعان كەزەڭدەگى مۇناي مەن كوندەنسات ءوندىرۋ كولەمى 70,8 ملن. توننانى قۇراعانى تۋرالى مالىمدەدى. اعىمداعى جىلى مۇنايگاز سالاسىنداعى كاسىپورىنداردى قولداۋ جونىندەگى شارالار, سونىمەن قاتار قاشاعاننىڭ ىسكە قوسىلۋى جىلدىق مۇناي ءوندىرۋ كولەمىن 74-تەن 75,5 ملن. تونناعا دەيىن ارتتىرۋعا مۇمكىندىك بەرەدى. ءوز كەزەگىندە, مۇناي وڭدەۋ كولەمى 13,1 ملن. توننانى قۇرادى. اۋىل شارۋاشىلىعى وندىرۋشىلەرىنىڭ قاجەتتىلىگى ءۇشىن ارزانداتىلعان ججم جەتكىزۋ تولىقتاي ورىندالدى. اعىمداعى جىلعى 13 جەلتوقسانداعى جاعداي بويىنشا, مۇناي بازالارىنداعى قور كولەمى: اي-92/93 جانارمايى – 103 مىڭ تونادان اسادى, ديزەلدىك وتىن كولەمى - 155 مىڭ توننادان اسادى. ججم قالدىق كولەمى ىشكى سۇرانىستى قامتاماسىز ەتۋگە جەتكىلىكتى قولايلى قوردى قۇرايدى. جانار-جاعارماي تاپشىلىعى بايقالمايدى. ارنۇر اسقاروۆ, "ەگەمەن قازاقستان".