ساعىنتاەۆ بيۋدجەتتەن بولىنگەن قارجىنى ۋاقىتىلى يگەرۋدى تاپسىردى

قر پرەمەر-ءمينيسترى باقىتجان ساعىنتاەۆ ورتالىق مەملەكەتتىك ورگاندار باسشىلارى مەن ايماق اكىمدەرىنىڭ اعىمداعى جىلعى الەۋمەتتىك-ەكونوميكالىق دامۋ قورىتىندىسى تۋرالى ەسەپتەرىن تىڭداپ, اتالعان ۆەدومستۆولار مەن ءوڭىر باسشىلارىنا بيۋدجەتتەن بولىنگەن قارجىنى ۋاقىتىلى يگەرۋدى تاپسىردى. پرەمەر-مينيستر وقىلعان باياندامالار بويىنشا ەكونوميكادا جاقسى كورسەتكىشتەر بايقالاتىنىن, جىل باسىمەن سالىستىرعاندا بارلىق وڭىرلەردە وڭ ۇدەرىستەر بار ەكەنىن اتاپ ءوتتى. ب.ساعىنتاەۆ جىل قورىتىندىسى بويىنشا ءىجو 0,5% دەڭگەيىندە جوسپارلانعانى, بىراق قازىر ول 0,8%-دى قۇرايتىنىن ەسكە سالدى. «بۇگىن ءبىز تىڭداعان بارلىق باياندامالار جىلدى 1%-دىق ءىجو دەڭگەيىندە اياقتاۋعا مۇمكىندىگىمىز بار ەكەنىن كورسەتەدى»,-دەدى ب.ساعىنتاەۆ. سونداي-اق, پرەمەر-مينيستر بيۋدجەت قارجىسىنىڭ يگەرىلۋىنە, اسىرەسە, «نۇرلى جول» مەملەكەتتىك باعدارلايماسى اياسىنداعى بيۋدجەت قارجىسىنىڭ يگەرىلۋ بارىسىنا نازار اۋداردى. «وڭىرلەرگە باعىتتالعان بارلىق قاراجاتتى يگەرۋ كەرەك, باقىت تۇرلىحان ۇلى (قر قارجى ءمينيسترى ب.سۇلتانوۆ ەسكەرتۋ), ورتالىق اتقارۋشى ورگاندارمەن مونيتورينگ جاساۋ قاجەت بولادى. وبەكتيۆتى جاعدايلار بولاتىنى تۇسىنىكتى, دەگەنمەن نەگىزگى باعىتتار بويىنشا اقشا يگەرىلۋگە ءتيىس»,- دەپ اتاپ ءوتتى ب.ساعىنتاەۆ. ارنۇر اسقاروۆ, "ەگەمەن قازاقستان".