ۇرىمجىدە قازاقستاندىق ستۋدەنتتەر تاۋەلسىزدىككە ارناپ كونتسەرت وتكىزدى

قىتايداعى قازاقستاندىق ستۋدەنتتەر قاۋىمداستىعىنىڭ جاستارى (KSAC) ءۇرىمجى قالاسىندا تاۋەلسىزدىكتىڭ 25 جىلدىعىنا ارناپ مەرەكەلىك كونتسەرت وتكىزدى, دەپ حابارلايدى قازاقپارات. شارا 16 جەلتوقسان كۇنى ءۇرىمشى قالاسىندا قر ءسىم پاسپورت-ۆيزا قىزمەتىنىڭ قولداۋىمەن ءوتتى. ونىڭ باسشىسى مارعۇلان كۇزەكباەۆ قحر-داعى قر ەلشىسى شاحرات نۇرىشەۆتىڭ اتىنان مەرەكەگە جينالعان 200-دەن استام قوناقتى قۇتتىقتاپ, وقۋدا تابىس تىلەدى. كونتسەرتتىك باعدارلاماعا نۇرقانات راحمەتوۆ («كوك تۋدىڭ جەلبىرەگەنى» ءانى), شىڭجاڭ قارجى-ەكونوميكالىق ۋنيۆەرسيتەتىنىڭ ستۋدەنتتەرى («قاماجاي» ءبيى), اينار شايماردانوۆا («قازاق جاستارىنىڭ ۇرانى» ءانى), شىڭجاڭ مەملەكەتتىك ۋنيۆەرسيتەتىنىڭ ستۋدەنتى ابزال وماروۆ (دومبىرامەن پوپۋرري), ايگەرىم قاليباەۆا مەن ايدا بەگىمبەت (يسپان ءبيى), دانيار ابىتاەۆ («وتان-انا» ءانى), جادىرا ەرنار («تۋعان جەر» ءانى) قاتىستى جانە KSAC وكىلدەرى بىرىگىپ «قازاقستانىم» ءانىن ورىندادى. سونىمەن بىرگە, كونتسەرت بارىسىندا كورەرمەندەرگە قازاقستان تۋرالى بەينەروليك كورسەتىلىپ, مەرەكەلىك تورت تارتۋ ەتىلدى.