«بولاشاققا حات» – ۇرپاققا امانات

ەلوردادا ءدىن ىستەرى جانە ازاماتتىق قوعام مينيسترلىگى قازاقستان ستۋدەنتتەر اليانسىمەن بىرلەسىپ, ۇلتتىق مۇراجايعا ساقتاۋعا بەرىلەتىن «قازاقستان رەسپۋبليكاسى تاۋەلسىزدىگىنىڭ 50 جىلدىعىنا وراي «ماڭگىلىك ەل» – بولاشاعى ءبىرتۇتاس ەلدىڭ جاس ۇرپاققا ارنالعان «بولاشاققا حات» قۇتى-كاپسۋلاسىن سالتاناتتى تۇردە تابىستاۋ ءراسىمى بولدى. ۇلتتىق مۇراجايدىڭ تاۋەلسىزدىك زالىندا وتكەن شاراعا ءدىن ىستەرى جانە ازاماتتىق قوعام مينيسترلىگى مەن ۇلتتىق مۇراجاي وكىلدەرى, بەلسەندى جاستار مەن جاس­تار ۇيىمدارى مۇشەلەرى قاتىستى. جينالعان كوپشىلىك الدىنا وركەستردىڭ سۇيەمەلدەۋىمەن مەملەكەتتىك تۋ تورگە شىعارىلدى. ارتىنان ءانۇران شىرقالعاننان كەيىن بىرقاتار ادامعا ءسوز بەرىلدى. الدىمەن ورتاعا شىققان ءدىن ىستەرى جانە ازاماتتىق قوعام مينيسترلىگى جاستار ءىسى كوميتەتىنىڭ توراعاسى عابيدوللا وسپانقۇلوۆ بىلاي دەدى: «بۇگىن جاستار ايتۋلى مەرەكەدەن تىس قالمادى. ەلىمىزدىڭ بار­لىق وڭىرىنەن جاستار ۇيىمدارى تاۋەلسىزدىكتىڭ 25 جىلدىعى قارساڭىندا وزدەرىنىڭ بولاشاققا دەگەن ۇسىنىمدارى مەن تىلەكتەرىن حاتقا جازدى. ەندى بۇل حات تاۋەلسىزدىگىمىزدىڭ 50 جىلدىعىندا اشىلادى دەپ ۇمىتتەنەمىز». جانە ول سول 2041 جىلى ەڭبەك ەتەتىن, وقيتىن, سپورتپەن شۇعىلداناتىن جانە دە مادەنيەتتە جۇرگەن جاستار كەشەگى ءوز قاتارلاستارىنىڭ حاتىن وقيتىنىن ەرەكشە اتادى. «وسىلايشا جيىرما بەس جىل بۇرىنعى جاستاردىڭ ۇسىنىس-تىلەكتەرىن ءبىلىپ, ونى ءارى قاراي دا دامىتىپ, تاۋەلسىزدىگىمىزدى باياندى ەتە بەرەمىز عوي دەپ سەنەمىز. حاتقا جازىلعان تىلەكتەردىڭ بارلىعى ورىندالا بەرسىن. ءبىزدىڭ بولاشاعىمىز ارقاشاندا جارقىن بولا بەرسىن!» – دەپ قورىتتى ءسوزىن عابيدوللا ابدوللا ۇلى. سونداي-اق, جينالعان كوپشىلىك الدىندا ۇلتتىق مۇراجاي ديرەكتورى دارحان مىڭباي ءسوز سويلەپ, بۇگىنگى كۇن تاريحتا قالاتىن ەرەكشە كۇن ەكەندىگىنە توقتالدى. «تاۋەلسىزدىكتىڭ 25 جىلدىعى دەگەن – شيرەك عاسىر ۋاقىت. بۇل – ۇلكەن مەجە. ەندى 25 جىلدان كەيىن ەلدى قانداي ەتىپ ەلەستەتە الامىز؟ ەلباسى 25 جىلدا ىستەگەن شارۋالاردىڭ بارلىعى دا ءالى تالاي تالدانادى, سول ارقىلى تاريح جازىلادى دەيدى. ال تاۋەلسىزدىگىمىزدىڭ 50 جىلدىعىندا جاستارىمىز تاعى دا قانداي جەتىستىكتەرگە جەتەدى؟ سولارعا كوپتەگەن مىندەتتەر جۇكتەلىپ وتىر. ولار مىندەت قانا ەمەس, امانات رەتىندە ۇسىنىلعان ءبىزدىڭ كوپتەگەن ەلدىڭ الدىندا تۇرعان قاداۋ-قاداۋ ارمان», – دەدى دارحان قامزابەك ۇلى. ۇلتتىق مۇراجاي ديرەكتورى, كەلەسى كەزەكتە, «بو­لاشاققا حات» دەپ اتالاتىن اماناتتى ۇلتتىق مۇ­را­جايدا ساقتاۋ يدەياسى ءوزىنىڭ سيمۆولدىق ءمانى بار ەكەن­دىگىنە توقتالدى. «ۇلتتىق مۇراجاي – ۇلتتىڭ بار­لىق مۇددەلەرى مەن اماناتى ساقتالاتىن جەر. ءبىزدىڭ ۇر­پاق بىزدەن گورى ءبىلىمدى, باسەكەگە قابىلەتتى بولۋى كەرەك. ەلىمىزدەگى تىنىشتىق پەن بەرەكە  سالماقتى ساياساتتىڭ ارقاسى. جالپى, ەلىمىزدەگى بارلىق يگىلىكتى ءىس­تەردىڭ باسى-قاسىندا جۇرگەن ەلباسىمىزدىڭ جا­سا­­عان مالىمدەمەلەرىنىڭ بارلىعى دا جاستارعا, قازاق­ستان­دىقتارعا جول كورسەتىپ وتىر. سول جولدان اينىماي جۇرەيىك, ول – قازاقستان جولى», – دەدى ۇلتتىق مۇراجاي ديرەكتورى. تاۋەلسىزدىگىمىزدىڭ 25 جىلدىعىنا ارنالعان «بو­لا­شاق­قا حات» اماناتىن كەلەسى بۋىن جاستار 2041 جىلى اشىپ وقۋى ءتيىس. ءسويتىپ, ولار شيرەك عاسىردا ماڭىزدى ءىس-شارالار اتقارىلعانىنان, ەلىمىز دامۋىندا جەتكەن جەتىستىكتەردەن, ەلباسىنىڭ ساليقالى ساياساتىنان حاباردار بولماق. اسقار تۇراپباي ۇلى, «ەگەمەن قازاقستان»