20 جەلتوقسان, 2016

كوپشىلىككە قولجەتىمدى كەڭەس

135 رەت
كورسەتىلدى
2 مين
وقۋ ءۇشىن
باس پروكۋراتۋرا ازاماتتاردىڭ قۇقىقتىق ساۋاتتىلىعىن ارتتىرۋ ماقساتىندا «پروكۋروردىڭ 100 كەڭەسى» تاجىريبەلىك كەڭەستەر جيناعىن شىعاردى. ورتالىق كوممۋنيكاتسيالار قىزمەتىندە جيناقتىڭ موبيلدىك قوسىمشاسىنىڭ تانىستىرىلىمى ءوتتى. باس پروكۋراتۋرانىڭ قىلمىستىق پروتسەستىڭ سوتقا دەيىنگى ساتىسىندا زاڭدىلىقتى قاداعالاۋ دەپارتامەنتىنىڭ باستىعى قۇسايىن يگەمباەۆ تانىستىرىلىم بارىسىندا ۇسىنىلعان قۇجاتتاردىڭ ازاماتتاردىڭ قۇقىقتىق مادەنيەتىن ارتتىرۋعا باعىتتالعانىن اتاپ ءوتتى. «جيناقتىڭ ماقساتى – ءارتۇرلى قۇقىقتىق جاعدايعا تۇسكەن ادامنىڭ قاۋىپسىزدىگىن قامتاماسىز ەتۋ. ءوزىنىڭ جانە جاقىندارىنىڭ قۇقىقتارى مەن مۇددەلەرىن قالاي قورعاۋ قاجەتتىلىگىن ءتۇسىندىرۋ, – دەپ مالىمدەدى ق.يگەمباەۆ. – جۇمىس بارىسىندا قىلمىستىق پروتسەسس وربيتاسىنا تۇسكەن دارمەنسىز ادامداردى ءجيى كەزدەستىرەمىز. بۇل ولاردىڭ زاڭدى, وزدەرىنىڭ قۇقىقتارىن, ورگانداردىڭ مىندەتتەرىن بىلمەۋ سالدارىنان تۋىندايتىن جاعدايلار. مىسالى, جيناقتا ازاماتتاردىڭ پوليتسيا ۇستاعاندا نە ىستەۋ كەرەكتىگى, ولاردىڭ قانداي قۇقىقتارى بار ەكەندىگى, قانشا مەرزىمگە ۇستاۋعا بولاتىندىعى جانە تاعى باسقا سۇراقتارعا جاۋاپ بار». كەڭەستەر جيناعىنىڭ كوپشىلىككە قولجەتىمدى بولۋىن قامتاماسىز ەتۋ ماقساتىندا IOS جانە Android پلاتفورمالارىندا «پروكۋروردىڭ 100 كەڭەسى» موبيلدىك قوسىمشاسى قۇرىلىپ, باس پروكۋراتۋرانىڭ سايتىندا ارنايى پاراقشا ورنالاستىرىلدى. سونداي-اق, اتالعان جيناق حالىق ءۇشىن ەكى تىلدە باس پروكۋراتۋرانىڭ سايتىندا, 115.kz پورتالىندا ۇسىنىلعان. جيناقتىڭ ەلەكتروندىق نۇسقاسى زاڭعا نەمەسە قۇقىقتىق اكتىلەرگە ەنگىزىلگەن وزگەرىستەرگە بايلانىستى جىلدام جاڭارتىلىپ, جاڭا كەڭەستەر قوسىلىپ تۇرادى. دەپارتامەنت باستىعى كەرى بايلانىستىڭ جوعارى ماڭىزىنا توقتالىپ ءوتتى. «باس پروكۋراتۋرانىڭ سايتىندا ازاماتتار وزدەرىنىڭ ۇسىنىستارى مەن بىلگىسى كەلگەن سۇراقتارىن قالدىرا الادى. ول بويىنشا رەداكتسيالىق القا جۇمىس ىستەيدى. ءبىز ءۇشىن حالىقتىڭ سەنىمى ماڭىزدى. ءبىز 100 كەڭەسپەن شەكتەلمەيمىز. بۇل جيناق – ءسىزدىڭ كەڭەسشىڭىز, كومەكشىڭىز جانە سەنىمدى دوسىڭىز», – دەپ تۇيىندەدى ءسوزىن ق.يگەمباەۆ. ايدار ورىسباەۆ, «ەگەمەن قازاقستان»
سوڭعى جاڭالىقتار