جاڭا قۇس سويۋ تسەحى پايدالانۋعا بەرىلدى

بەستاماق اۋىلىنداعى «كوكتاس-اقتوبە» اق-قا قاراستى «اق قۇس» فابريكاسىنىڭ جۇمىس ىستەي باس­تا­عا­نىنا ون جىلدىڭ ءجۇزى بولدى. بۇل فابريكا باتىس ءوڭى­رىندەگى برويلەرلىك باعىتتاعى بىردەن-ءبىر قۇس فابريكاسى بولىپ تابىلادى. مۇندا وندىرىلگەن قۇس ەتى ءوز وڭىرىمىزگە, سونداي-اق, ماڭعىستاۋ, اتىراۋ جانە باتىس قازاقستان وبلىستارىنا وتكىزىلىپ كەلەدى. تاياۋ ۋاقىتتا فابريكا قۇس ەتىن رەسەي جانە قىتاي نارىعىنا شىعارۋعا قادام جاساۋدا. تاۋەلسىزدىكتىڭ 25 جىلدىعى قارساڭىندا كاسىپورىندا جاڭا قۇس سويۋ تسەحى پايدالانۋعا بەرىلدى. مۇنىڭ ءوزى فابريكانىڭ وندىرىستىك قۋاتىن ارتتىرۋمەن بىرگە, قۇس ەتىن سىرتقى نارىققا شىعارۋعا مۇمكىندىك بەرەرى ءسوزسىز. «اق قۇس» فابريكاسىنداعى جاڭا قۇس سويۋ تسەحىنىڭ سالتاناتتى اشىلۋىنا ارنالعان جيىندا ءسوز العان وبلىس اكىمى بەردىبەك ساپارباەۆ جاڭا وندىرىستىك جەلىنىڭ پايدالانۋعا بەرىلۋىمەن قۇتتىقتاي كەلىپ, ەلىمىزدە قۇس ەتىنە دەگەن سۇرانىستىڭ ارتىپ وتىرعانىن جەتكىزدى. جاڭا تسەحتا 35 جاڭا جۇمىس ورنى اشىلدى. جوبانىڭ قۇنى 1440 ميلليون تەڭگە تۇرادى. «اق قۇس» فابريكاسى باسشىلارىنىڭ ايتۋىنشا, جۇمسالعان قارجى ءۇش جىل مەرزىمدە وتەلەتىن بولادى. فابريكاداعى نەگىزگى تەحنولوگيالىق ۇدەرىسى – ينكۋباتسيالاۋ. ايىنا ءۇش-ءتورت رەت 31 مىڭ جۇمىرتقا ارنايى شكافتارعا قويىلادى. ازىرگە جۇمىرتقالار رەسەيدەن جەتكىزىلۋدە. بۇل جوبا ءونىمنىڭ وزىندىك قۇنىن كەمىتۋگە قول جەتكىزەدى دەپ كۇتىلۋدە. جاڭا تسەحتىڭ سالتاناتتى اشىلۋى بارىسىندا وبلىس اكىمى العالىق 15 وتباسىنا 100 مىڭ, 150 مىڭ, 200 مىڭ تەڭگەنىڭ سەرتيفيكاتتارىن تاپسىردى. بۇل قولداۋعا يە بولعاندار اراسىندا «التىن القا» يەگەرى اقمارال قۇرمانباەۆا, مۇگەدەكتىككە ۇشىراعان بالا باعىپ وتىرعان انالار ارايلىم ءادىلحانوۆا مەن تاتيانا الەكسەەۆا, ەكى بالا باعىپ وتىرعان مۇگەدەك انا وكسانا مەنگەل, زەينەتكەر انا مارحا بارشيگوۆا جانە باسقالار بار. ساتىبالدى ءساۋىرباي, «ەگەمەن قازاقستان» اقتوبە وبلىسى, العا اۋدانى