الماتىداعى ۇلتتىق ۇلاندا تاۋەلسىزدىكتىڭ 25 جىلدىعى اتاپ ءوتىلدى

الماتىدا ۇلتتىق ۇلاننىڭ «وڭتۇستىك» وڭىرلىك قولباسشىلىعى ەل تاۋەلسىزدىگى كۇنىن اتاپ ءوتتى, دەپ حابارلايدى قازاقپارات. كەڭ اۋقىمدا وتكەن شارادا «وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پولكوۆنيك سابىرجان سۇلەيمەنوۆ بايانداما جاساپ, تاۋەلسىزدىك جىلدارىنداعى قازاقستان رەسپۋبليكاسىنىڭ جانە ۇلتتىق ۇلاننىڭ جەتكەن جەتىستىكتەرىن ايتىپ ءوتتى. «تاۋەلسىزدىك ءبىزدىڭ باستى قۇندىلىعىمىز, باعا جەتپەس بايلىعىمىز. تاۋەلسىزدىكتىڭ ارايلى تاڭى اتقان شاقتا اسكەري قۇرىلىمدار اراسىندا العاشقى بولىپ ىشكى اسكەر, قازىرگىشە ۇلتتىق ۇلان اسكەرى قۇرىلىپ, ەگەمەندى ەلدىڭ بەرىك قورعانىنا اينالدى. قازىرگى ۋاقىتتا ۇلاندىق جاۋىنگەرلەر بەيبىت كۇندە دە ەرلىككە ورىن بارىن دالەلدەدى. حاس جاۋىنگەرلەر ەربول وتارباەۆ, جاندوس بايانباەۆ, سىرىم سۇندەتوۆ جانە كۇنى كەشە عانا ەلباسىنىڭ قولىنان ءۇشىنشى دارەجەلى «ايبىن» وردەنىن العان باحتيار قايىربەكوۆ, سونىمەن قاتار «حالىق قاھارمانى» جوعارعى مەملەكەتتىك اتاعىنا يە بولعان  پولكوۆنيك قايرات ۇمبەتوۆتىڭ جانقيارلىق ەرلىكتەرى ەل ەسىندە. ۇلاندىق جاۋىنگەرلەر قاشان جانە قاي كەزدە دە بولسىن تۇراقتىلىق پەن تىنىشتىق ورناعان «ماڭگىلىك ەلدىڭ» ماڭگىلىك قورعاۋشىسى بولا بەرمەك», – دەدى ول. «وڭتۇستىك» وڭىرلىك قولباسشىلىعىنىڭ بارلىق جەكە قۇرامى, ۇلتتىق ۇلان ارداگەرلەرى جانە اسكەري قىزمەتشىلەردىڭ وتباسى مۇشەلەرى قاتىسقان ءىس-شارا بارىسىندا جاۋىنگەرلىك قىزمەت اتقارۋدا ۇزدىك قىرىنان كوزگە تۇسكەن اسكەري قىزمەتشىلەر گراموتالارمەن, ءتوس بەلگىلەرمەن جانە باعالى سىيلىقتارمەن ماراپاتتالدى. اسكەري قىزمەتشىلەرگە ماراپاتتاردى «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور الىبەك سەراليەۆ تابىس ەتتى.