تاۋەلسىزدىك جىلدارى 700-دەن استام ءتارتىپ ساقشىسى قازا تاپقان

ىشكى ىستەر مينيسترلىگىنىڭ مالىمەتىنە سايكەس, وسى ۋاقىتقا دەيىن قىزمەتتە جۇرگەن 764 ءتارتىپ ساقشىسى قازا تاپتى. سولاردىڭ ىشىندە 115 ۇلان مەن پوليتسەيدىڭ وتباسىنا مەملەكەتتىك ناگرادالار تابىستالدى, دەپ حابارلايدى قازاقپارات. «جالپى, تاۋەلسىزدىك العاننان بەرى قىزمەت بابىنداعى ەرلىگى مەن جانقيارلىعى ءۇشىن 1 093 قىزمەتكەر ماراپاتتالدى. ولاردىڭ ىشىندە قازا بولعان ۇلتتىق ۇلان مەن ىشكى ىستەر ورگاندارىنىڭ 115 قىزمەتكەرى بار. وعان قوسا, بيىل تاۋەلسىزدىكتىڭ 25 جىلدىعىنا وراي ىشكى ىستەر ورگاندارى مەن ۇلتتىق ۇلاننىڭ 54 قىزمەتكەرى مەملەكەتتىك ناگرادامەن, سونداي-اق 659 ادام ۆەدومستۆولىق ناگرادالارمەن, ديپلومدارمەن ماراپاتتاkدى», - دەلىنگەن رەسمي حابارلامادا. ايتا كەتەيىك, 25 جىلدىڭ ىشىندە ىشكى ىستەر ورگاندارىنىڭ ەكى قىزمەتكەرى «حالىق قاھارمانى» اتاعىمەن ماراپاتتالعان بولاتىن. ولاردىڭ بىرەۋى - عازيز بايتاسوۆ. 2011 جىلى ول تارازداعى لاڭكەستى ۇستاۋ وپەراتسياسى بارىسىندا گراناتانى ءوز دەنەسىمەن جاۋىپ, ەرلىكپەن قازا تاپقان ەدى. بۇدان بولەك, بيىل اقتوبە مەن الماتىداعى تەررورلىق ارەكەتتەر كەزىندە وققا ۇشقان پوليتسەيلەردىڭ وتباسىلارىنا مەملەكەتتىك جانە ۇكىمەتتىك ناگرادالار تابىستالاتىن بولادى. «نەگىزى, بىزدە ادامدى قۇتقارامىن دەپ, وپات بولعان پوليتسەيلەر از ەمەس. بىرەۋدى پىشاقتاپ كەتەدى, ەندى بىرەۋى جۇك ماشيناسىن ءوز كولىگىمەن توقتاتىپ, ادام قۇتقارعان. ونداي مىسالدار كوپ. ولاردىڭ بارلىعى - بۇگىنگى كۇننىڭ قاھارماندارى», - دەيدى پوليتسەيلەر.