ەلباسى: يزرايل – ەلىمىزدىڭ ماڭىزدى ەكونوميكالىق سەرىكتەسى

يزرايل قازاقستاننىڭ ماڭىزدى ەكونوميكالىق سەرىكتەسى بولىپ قالا بەرەدى. بۇل جايىندا بۇگىن اقوردادا يزرايل پرەمەر-ءمينيسترى بينيامين نەتانياحۋمەن كەڭەيتىلگەن قۇرامداعى كەلىسسوزدەردەن كەيىنگى بىرلەسكەن مالىمدەمە بارىسىندا قر پرەزيدەنتى نۇرسۇلتان نازارباەۆ ايتتى, دەپ حابارلايدى قازاقپارات. «قوس ەلدىڭ اراسىندا ەرەكشە قارىم-قاتىناستىڭ ورناۋى توسىننان ەمەس. بۇعان قازاقستاننان شىققان ونداعان مىڭ يزرايلدىكتەر سەپتىگىن تيگىزىپ جاتىر. سوعىس كەزىندە بىزگە جەر اۋدارىلىپ كەلىپ, قازاق حالقىن پانالادى. وتاندارىنا قايتا ورالعاننان كەيىن دە باۋىرمالدىق قارىم-قاتىناستى ساقتادى. مەن تەل-اۆيۆكە بارعانىمدا تۋعانىنداي قارسى الادى. ولار بۇگىندە دوستىقتىڭ التىن كوپىرى بولىپ, ىنتىماقتاستىعىمىزعا سەپتىگىن تيگىزىپ وتىر», – دەدى ەلباسى. قازاقستان پرەزيدەنتى يزرايل پرەمەر-مينيسترىمەن وتكەن شاعىن جانە كەڭەيتىلگەن قۇرامداعى كەلىسسوزدەردىڭ قورىتىندىسىنا كوڭىلى تولاتىندىعىن دا باسا ايتتى. «قازىر عانا بينيامين نەتانياحۋ مىرزامەن كەلىسسوزدەر اياقتالدى. ول اشىق ءارى سەنىمگە تولى ءوتتى. ءبىز ەكىجاقتى ءوزارا ءىس-قيمىلدىڭ, حالىقارالىق كۇن ءتارتىبىنىڭ, لاڭكەستىكپەن كۇرەستىڭ جانە وزگە دە جايتتاردىڭ كەشەندى ماسەلەلەرىن تالقىلاپ, وزەكتى ماسەلەلەرگە قاتىستى پىكىر الماستىق», – دەپ اتاپ ءوتتى نازارباەۆ.