ەلىمىزدە ءبىر ايدا جول اپاتىنان 209 ادام قازا تاپتى

قاراشا ايىندا رەسپۋبليكا جولدارىندا 1 604 جول-كولىك وقيعاسى ورىن الىپ, 2 314 ادام زارداپ شەكتى, ونىڭ ىشىندە 209 ادام قازا تاپتى, دەپ حابارلايدى قازاقپارات. قر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ مالىمەتىنە قاراعاندا, وتكەن ايدا ەڭ كوپ جكو الماتى قالاسىندا (463) بولعان. الماتىداعى التىنسارين جانە اباي كوشەلەرىنىڭ قيىلىسى اپاتتىلىق ەڭ كوپ ورىن الاتىن جول بولىگىنە اينالعان, ول جەردە 5 جكو تىركەلىپ, 10 ادام زارداپ شەكتى. جولداعى ءولىم-ءجىتىم بويىنشا الماتى وبلىسى الدىڭعى ورىندا, وندا 54 ادام جول اپاتىنان قازا تاپقان. وسى ورايدا الماتى-بىشكەك تاس جولى ەڭ قاۋىپتى ۋچاسكە رەتىندە تىركەلگەن كورىنەدى. بۇل جولدا 4 ادامنىڭ قازا بولۋىنا اكەپ سوققان 4 جكو ورىن الدى. «قاراشا ايىندا قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 610-بابى بويىنشا (كولiك قۇرالدارى جۇرگiزۋشiلەرىنiڭ جول ءجۇرىسى قاۋiپسiزدiگiن قامتاماسىز ەتۋدiڭ بەلگiلەنگەن قاعيدالارىن ادامداردىڭ دەنساۋلىعىنا زيان كەلتiرۋگە, كولiك قۇرالدارىنىڭ نەمەسە وزگە دە مۇلiكتiڭ ب ۇلىنۋىنە اكەپ سوققان بۇزۋشىلىعى) 5 943 ادام جاۋاپكەرشىلىككە تارتىلدى, ال جىل باسىنان 58 871 ادام جازالاندى», – دەلىنگەن كوميتەت حابارلاماسىندا. قر قك 345-بابى بويىنشا (كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋى) قاراشا ايىندا 216 ازامات, ال جىل باسىنان باستاپ 4 433 ادام جاۋاپكەرشىلىككە تارتىلدى. ال بيىل ەلىمىزدىڭ جولدارىندا بارلىعى 16 332 جكو ورىن الىپ,  سونىڭ سالدارىنان 23 384 ادام زارداپ شەگىپ, ونىڭ ىشىندە 2 167 ادام اجال قۇشتى. دەگەنمەن وتكەن جىلدىڭ سايكەس كەزەڭىمەن سالىستىرعاندا جول كولىك اپاتتىلىعىنىڭ دەڭگەيى 5,7 پايىزعا تومەندەدى.