يزرايل ەلىمىزگە 214 ملن دوللار ينۆەستيتسيا سالعان

2005 جىلدان باستاپ يزرايلدەن قازاقستانعا كەلگەن تىكەلەي ينۆەستيتسيالار كولەمى 214 ميلليون اقش دوللارىن قۇرادى. بۇل تۋرالى بۇگىن استانا قالاسىندا قازاقستان-يزرايل بيزنەس-فورۋمىندا «KAZNEX INVEST» ەكسپورت جانە ينۆەستيتسيالار ۇلتتىق اگەنتتىگى» اق باسقارما توراعاسى بوريسبي جانقورازوۆ مالىمدەدى. ول ەكى ەلدىڭ ساۋدا-ساتتىق سالاسىندا تىعىز قارىم-قاتىناس ورناتقانىن مالىمدەدى. «2005 جىلدان باستاپ كۇنى كەشەگە دەيىن يزرايلدەن بۇل – قارجى, كەپىلدەندىرۋ, مەديتسينالىق قىزمەت كورسەتۋ جانە باسقا دا سالالار بويىنشا تارتىلعان قاراجات. ءبىز يزرايلدىك جوعارى تەحنولوگيالى كومپانيالاردى قازاقستان ەكونوميكاسىنا ەنگىزبەكپىز. سەبەبى, يزرايل – الەمدەگى يننوۆاتسيالىق تەحنولوگيالاردى جەتىك مەڭگەرگەن ەلدەردىڭ ءبىرى. سوندىقتان قازاقستاندىق كاسىپكەرلەرگە بۇل سالا قىزىقتى دەپ ويلايمىن», دەدى ول. بيزنەس فورۋم بارىسىندا بوريسبي جانقورازوۆ قوس ەل اراسىنداعى ساۋدا اينالىمى سوڭعى ون جىلدا 6,3 ميلليارد اقش دوللارىنا جەتكەنىن ايتتى. «سوڭعى ۋاقىتتى ساۋدا اينالىمىنىڭ كورسەتكىشى ءبىرشاما تومەندەدى. بىراق, بۇل ۋاقىتشا جاعداي دەپ ويلايمىن. بىلتىر قازاقستان مەن يزرايل اراسىنداعى ساۋدا اينالىمى 306 ميلليون اقش دوللارىن قۇرادى. مۇنداعى قازاقستاندىق ەكسپورتتىڭ ۇلەسى – 219 ميلليون دوللار بولسا, يمپورت – 86,9 ميلليون دوللار. ال بيىلعى 9 ايدا قوس مەملەكەت اراسىندا 237 ميلليون دوللار كولەمىندە ساۋدا-ساتتىق جاسالدى», دەگەن «KAZNEX INVEST» وكىلى ەلىمىز يزرايلگە كوبىنەسە مۇناي ونىمدەرىن, ءتۇرلى شيكىزاتتاردى ەكسپورتتايتىنىن جەتكىزدى. ال يزرايلدەن قازاقستانعا ۇيالى تەلەفوندار, ناۆيگاتسيا جۇيەلەرى جانە جوعارى تەحنولوگيالى ونىمدەر اكەلىنەدى ەكەن. باسقارما توراعاسى ەلىمىزدى يننوۆاتسيالىق مەملەكەتكە اينالدىرۋ جولىندا ءتيىستى شارالار جۇرگىزىلىپ جاتقاندىعىن دا اڭگىمەلەدى. ونىڭ ايتۋىنشا, ۇكىمەت التى جىلدان بەرى يندۋستريالىق يننوۆاتسيا باعدارلاماسى اياسىندا جۇمىس ىستەۋدە. باعدارلاما بويىنشا 6 نەگىزگى سالا انىقتالدى. ولار – مەتاللۋرگيا, مۇناي وڭدەۋ, ماشينا جاساۋ, حيميا ونەركاسىبى جانە ازىق-ت ۇلىك ونىمدەرىن شىعارۋ. وسى سالالارداعى كاسىپكەرلەر اراسىندا باسەكەلەستىك باسىم بولادى. ەستەرىڭىزگە سالا كەتسەك, بۇگىن وتكەن قازاقستان-يزرايل بيزنەس-فورۋمى يزرايل پرەمەر-ءمينيسترى بەنيامين نەتانياحۋدىڭ ەلىمىزگە رەسمي ساپارى اياسىندا ۇيىمداستىرىلعان. وعان ەكى مەملەكەتتىڭ وكىلدەرى مەن ىسكەر توپتارى قاتىستى. قوس تاراپتىڭ ساۋدا-ەكونوميكالىق, ينۆەستيتسيالىق ىنتىماقتاستىعىن نىعايتۋ جانە بىرلەسكەن جوبالاردى ىسكە اسىرۋ ماقساتىنداعى شارادا جاڭا مۇمكىندىكتەر كەڭىنەن تالقىلاندى. اسحات رايقۇل, "ەگەمەن قازاقستان".