اقتاۋدا گازدى پورشەندى ەلەكتر ستانساسى ىسكە قوسىلدى

تاۋەلسىزدىكتىڭ 25 جىلدىعى قارساڭىندا اقتاۋداعى "قازازوت" مەكەمەسىندە قۋاتتىلىعى 40 مەگاۆاتتىق گازدى-پورشەندى ەلەكتر ستانساسى ىسكە قوسىلدى. ەلىمىزدەگى ەڭ ءىرى حيميالىق ونەركاسىپ بولىپ تابىلاتىن «قازازوت» مۇناي جانە اگروونەركاسىپ سالاسىن مينەرالدى تىڭايتقىشتارمەن قامتاماسىز ەتىپ كەلەدى. يندۋستريالدى-يننوۆاتسيالىق دامۋ باعدارلاماسى اياسىندا جۇزەگە اسقان جاڭا جوبا بۇعان دەيىن توك كوزىن مونوپوليست مەكەمەدەن الىپ كەلگەن كاسىپورىننىڭ وزگەگە تاۋەلدىلىگىن جويىپ, جۇمىس قۋاتتىلىعىن ارتتىرادى دەپ كۇتىلەدى. قۇرىلىس جۇمىستارىن بەلگىلەنگەن مەرزىمدە اياقتاعان رەسەيلىك «زۆەزدا-ەنەرگەتيكا» اق-نىڭ باس ديەرەكتورى ا.اندرەەۆ قۋاتتىلىعى مەن تەحنيكالىق جاعىنان تولىق قامتىلعان جوبانىڭ زاماناۋي ستاندارتتارعا ساي ەكەندىگىن ايتادى. «قازازوتتا» سوڭعى جىلدارى جاڭعىرتۋ جۇمىستارى قارقىندى جۇرگىزىلۋدە. بەس جىل بۇرىن يندۋستريالاندىرۋ كارتاسىنا ەنىپ, جۇمىستارىن جاڭعىرتقان زاۋىتتا جاڭا جوبانىڭ ىسكە قوسىلۋى جۇمىس قارقىندىلىعىن ارتتىرىپ جانە جاڭا جۇمىس كوزدەرىن اشۋعا مۇمكىندىك بەرەدى. گۇلايىم شىنتەمىرقىزى, «ەگەمەن قازاقستان».