250 وقۋشى ەلباسىنىڭ اتىنان سىيلىقتار الدى

تاۋەلسىزدىكتىڭ 25 جىلدىق مەرەكەسى قارساڭىندا وڭتۇستىك قازاقستان وبلىسىنىڭ 250 وقۋشىسى ەلباسىنىڭ اتىنان سىيلىقتار الدى, دەپ حابارلايدى قازاقپارات. ولاردىڭ 10-ى وقۋ وزاتتارى, قالعانى - ەرەكشە وقىتۋدى قاجەت ەتەتىن جانە اتا-انا قامقورلىعىنسىز قالعان بالالار. بۇلدىرشىندەرگە سىيلىقتى وبلىس اكىمى جانسەيىت تۇيمەباەۆ تاپسىردى. پەرنەحان تۇراربەك شىمكەنتتەگى احمەت بايتۇرسىنوۆ اتىنداعى №50 مەكتەپ-گيمنازياسىندا وقيدى. وقۋ وزاتى. ءبىلىمدى شاكىرت بولاشاقتا قۇرىلىسشى بولۋدى قالايدى. ەلدىڭ وركەندەۋىنە وزىنشە ۇلەس قوسقىسى كەلەتىن جاس بۇگىن ارنايى سىيلىق العانىنا رازى. مەرەكەلىك كەشتە بالالارعا سىيلىقتان بولەك, ارنايى داستارحان جايىلدى. ولارعا ءار الۋان تاتتىلەر ۇسىنىلدى. ال, سالتاناتتى شاراعا قاتىسقان ءوڭىر باسشىسى بالعىنداردىڭ قولونەر تۋىندىلارىن ارنايى كورمەدەن تاماشالاپ, شىعارماشىلىقتارىنا تابىس تىلەدى. ءوز كەزەگىندە تۇيمەباەۆ بالالاردى مەرەكەمەن قۇتتىقتاپ, وقۋشىلارعا ەلباسى ءومىرىن ۇلگى ەتتى. «ەلباسى اتقا مىنەدى, سپورتپەن اينالىسادى, سىزدەر دە سونداي بولىڭىزدار. سىزدەرگە اماندىق تىلەيمىن. وسى ەگەمەندىگىمىزدىڭ كەلەسى 50 جىلدىعىندا سىزدەر مەملەكەتىمىزدىڭ ودان سايىن كەمەلدى بولۋىنا ات سالىسىڭىزدار. بارلىقتارىڭىزعا دەنساۋلىق تىلەيمىن»,-دەدى وبلىس اكىمى ءوز سوزىندە. «بار مەيىرىمىمىز - بالالارعا!».  وسى اتاۋعا يە قايىرىمدىلىق شاراسى وبلىستىڭ بارلىق اۋدان-قالاسىندا ۇيىمداستىرىلدى. اكتسيا اياسىندا ءبىر كۇندە 6 مىڭ بۇلدىرشىنگە قامقورلىق  كورسەتۋ جوسپارلانعان.