قازاقستان مەن يزرايل اراسىندا اۋىل شارۋاشىلىعىنداعى ىنتىماقتاستىق تۋرالى ۇكىمەتتىك كەلىسىمگە قول قويىلادى. بۇل تۋرالى بۇگىن اقوردادا ەلىمىزگە العاشقى رەسمي ساپارمەن كەلگەن يزرايل پرەمەر-ءمينيسترى بينيامين نەتانياحۋمەن كەڭەيتىلگەن قۇرامداعى كەلىسسوزدەر بارىسىندا قر پرەزيدەنتى نۇرسۇلتان نازارباەۆ ايتتى, دەپ حابارلايدى قازاقپارات.
ء"بىزدىڭ ەكىجاقتى قارىم-قاتىناسىمىز ساۋدا-ەكونوميكالىق ءوزارا ءىس-قيمىل مەن ينۆەستيتسيالىق ىنتىماقتاستىق نەگىزىندە قالىپتاسۋدا. ونىڭ نىعايۋىنا يزرايلدىك كاپيتال سالىنعان 270 كاسىپورىن ءوزىنىڭ ماڭىزدى ۇلەسىن قوسادى. جەكە كەزدەسۋىمىز بارىسىندا ەكىجاقتى قارىم-قاتىناستىڭ ەكونوميكا, ينۆەستيتسيا, ساياسات سالالارى, لاڭكەستىكپەن كۇرەس سىندى - كەڭ اۋقىمدى ماسەلەلەرىن تالقىلادىق. ءسىزدىڭ بۇگىنگى ساپارىڭىز جانە بيزنەس فورۋمدى وتكىزۋ - ءبىزدىڭ ىسكەرلىك قارىم-قاتىناسىمىزدى كەڭەيتۋگە سەپتىگىن تيگىزەرىنە جانە جاڭا ساپالى دەڭگەيگە كوتەرەتىندىگىنە ءۇمىت ارتامىز", - دەدى نازارباەۆ.
وسى ورايدا ەلباسى قازاقستان-يزرايل سەرىكتەستىگىن ءارتاراپتاندىرۋ ماڭىزدىلىعىن اتاپ ءوتتى جانە شيكىزاتتىق مودەلدەن وندىرىسكە كوشۋ ءۇشىن بىرلەسە جۇمىس ىستەۋگە مۇددەلىلىك بار ەكەندىگىن ايتتى. سونىمەن قاتار ەكىجاقتى ىنتىماقتاستىقتى ەسەلەي تۇسەتىن سالانى دا اتادى.
«اۋىل شارۋاشىلىعى ءبىزدىڭ ەڭ باستى ءتۇيىسۋ نۇكتەمىز سانالادى. بۇل جايىندا مەن سىزگە ايتتىم دا. بىزدە اۋىل شارۋاشىلىعى بيزنەسىن جۇرگىزۋ ءۇشىن بىرەگەي مۇمكىنشىلىك, ال يزرايلدە الدىڭعى قاتارلى تەحنولوگيا بار. ءبىز بۇل ماسەلەنى جان-جاقتى تالقىلادىق. بىرلەسكەن كوميسسيا قۇرىپ, بۇل ماسەلەدە ناقتى شارت ازىرلەيتىن بولامىز. ءونىمنىڭ بارلىق ءتۇرىن قايتا وڭدەۋ, جەردى سۋلاندىرۋ - بۇل ءبىزدىڭ سىزدەردەن العىمىز كەلەتىن ماسەلەلەر. ءسىزدىڭ ساپارىڭىز اياسىندا بۇگىن اۋىل شارۋاشىلىعى سالاسىنداعى ىنتىماقتاستىق تۋرالى ۇكىمەتتىك كەلىسىمگە قول قويىلادى. وسىعان ارقا سۇيەي وتىرىپ, ءبىز ناقتى جۇمىستار جۇرگىزە الامىز», - دەدى مەملەكەت باسشىسى.
سۋرەتتەردى تۇسىرگەن ەرلان وماروۆ, "ەگەمەن قازاقستان".
