استانادا حالىقارالىق بايقاۋ وتەدى

مەرەيتويلىق ح حالىقارالىق پ.چايكوۆسكي اتىنداعى جاسوسپىرىمدەر بايقاۋى استانا قالاسىندا 2017 جىلدىڭ 15 مەن 25 ماۋسىمى ارالىعىندا وتەدى. بۇل تۋرالى ورتالىق كوممۋنيكاتسيالار قىزمەتىندە قازۇوۋ رەكتورى ايمان مۇساقوجاەۆا مەن پ.ي. چايكوۆسكي اتىنداعى حالىقارالىق كونكۋرس لاۋرەاتتار قاۋىمداستىعىنىڭ باس ديرەكتورى اندرەي ششەرباكتىڭ قاتىسۋىمەن وتكەن ءباسپاسوز ءماسليحاتىندا بەلگىلى بولدى. پروفەسسور ايمان مۇساقوجاەۆا اتاپ وتكەندەي, بايقاۋ 17 جاسقا دەيىنگى مۋزىكانتتار اراسىندا فورتەپيانو, سكريپكا جانە ۆيولونچەل ماماندىقتارى بويىنشا وتكىزىلەدى. «بايقاۋدى مادەنيەت جانە سپورت مينيسترلىگى, قازاق ۇلتتىق ونەر ۋنيۆەرسيتەتى مەن پ.ي.چايكوۆسكي اتىنداعى حالىقارالىق بايقاۋ لاۋرەاتتارى قاۋىمداستىعى ۇيىمداستىرادى. ول پ.ي.چايكوۆسكي اتىنداعى ماسكەۋ مەملەكەتتىك كونسەرۆاتورياسى, ماسكەۋ ۇكىمەتىنىڭ جانە استانا قالاسى اكىمدىگىنىڭ قولداۋىمەن وتكىزىلەدى, – دەدى كازۇوۋ رەكتورى. ونىڭ ايتۋىنشا, بايقاۋدىڭ ەرەكشەلىگى – ول ءارتۇرلى ەلدەردە وتكىزىلەدى ءارى جاس مۋزىكانتتاردىڭ الەمنىڭ بارلىق ەلدەرىنەن قاتىسۋىنا مۇمكىندىك بەرەدى. ح حالىقارالىق پ.چايكوۆسكي اتىنداعى جاسوسپىرىمدەر بايقاۋىنىڭ تورەشىلەرى قۇرامىنا رەسەي, قازاقستان, اقش, كورەيا, قىتاي, فرانتسيا, شۆەيتساريا ەلدەرىنىڭ بەلگىلى مۋزىكانتتارى كىرەدى. بايقاۋدىڭ ءبىرىنشى جانە ەكىنشى كەزەڭدەرى قازاق ۇلتتىق ونەر ۋنيۆەرسيتەتىنىڭ ساحنالارىندا, ءۇشىنشى كەزەڭ – «استانا وپەرا» وپەرا جانە بالەت تەاترىنىڭ ساحناسىندا, ال اشىلۋ جانە جابىلۋ سالتاناتى «قازاقستان» ورتالىق كونتسەرت زالىندا وتەدى. بايقاۋدىڭ فينالىنا قاتىسۋشىلار سيمفونيالىق وركەسترلەردىڭ سۇيەمەلدەۋىمەن شىعارما ورىندايدى. 1992 جىلى نەگىزى قالانعان حالىقارالىق پ.ي.چايكوۆسكي اتىنداعى جاسوسپىرىمدەر بايقاۋى – جاس پيانيستەر, سكريپكاشىلار جانە ۆيولونچەليستەر ءۇشىن اسا ءىرى كاسىبي كونكۋرس. ول وسىعان دەيىن ماسكەۋ, سانكت-پەتەربۋرگ, ءنوۆوسىبىر (رەسەي), سەنداي (جاپونيا), سۋۆون (كورەي رەسپۋبليكاسى), سيامىن (قحر), مونترە-ۆەۆە (شۆەيتساريا), كۋراسيكي (جاپونيا) قالالارىندا وتكەن بولاتىن. داستان كەنجالين, «ەگەمەن قازاقستان».