شاۆكات ميرزيەەۆتى ۇلىقتاۋ ءراسىمى ءوتتى

بۇگىن تاشكەنتتە وزبەكستان رەسپۋبليكاسى پرەزيدەنتىنىڭ سالتاناتتى تۇردە لاۋازىمىنا كىرىسۋىنە ارنالعان ولي ماجليس پالاتالارىنىڭ بىرلەسكەن وتىرىسى ءوتتى, دەپ حابارلادى وزبەكستان رەسپۋبليكاسى پرەزيدەنتىنىڭ ءباسپاسوز قىزمەتىنە سىلتەمە جاساعان قازاقپارات. سالتاناتتى شاراعا وزبەكستان ۇكىمەتىنىڭ مۇشەلەرى, مينيسترلىكتەر مەن ۆەدومستۆولار, ورتالىق سايلاۋ كوميسسياسىنىڭ باسشىلارى, شەتەل مەملەكەتتەرى ەلشىلىكتەرىنىڭ, حالىقارالىق ۇيىم وكىلدىكتەرىنىڭ وكىلدەرى, وتاندىق جانە شەتەل بۇقارالىق اقپارات قۇرالدارىنىڭ وكىلدەرى قاتىسۋدا. بىرلەسكەن وتىرىستى ءور ورتالىق سايلاۋ كوميسسياسىنىڭ توراعاسى م.ابدۋسالوموۆ اشتى. ول 4 جەلتوقساندا وتكەن ءوز پرەزيدەنتىنىڭ سايلاۋ ناتيجەسى جايلى اتاپ ءوتتى. ەل پرەزيدەنتى بولىپ  88,61 پايىز داۋىس جيناعان, كاسىپكەرلەر جانە ىسكەر ادامدار قوزعالىسى - وزبەكستان ليبەرالدىق-دەموكراتيالىق پارتيادان شاۆكات ميرومون ۇلى ميرزيەەۆ سايلاندى. سونداي-اق, سايلاۋ ناتيجەلەرى 2016 جىلعى 9 جەلتوقساندا وسك وتىرىسىندا قارالدى. وندا شاۆكات  ميرزيەەۆتى وزبەكستان رەسپبۋليكاسىنىڭ پرەزيدەنتى لاۋازىمىنا سايلانعان دەپ ەسەپتەۋدى قاۋلى ەتتى. وسك توراعاسى جينالعاندار مەن ەلدىڭ بارلىق سايلاۋشىلارى اتىنان شاۆكات  ميرزيەەۆتى وزبەكستان پرەزيدەنتى بولىپ سايلانۋىمەن قۇتتىقتاپ, وعان پرەزيدەنت كۋالىگى مەن وسك كۋالىگىن تابىس ەتتى. وزبەكستان رەسپۋبليكاسى كونستيتۋتسياسىنىڭ 92-بابىنا سايكەس شاۆكات ميرزيەەۆ بىلاي دەپ انت بەردى: «وزبەكستان حالقىنا ادال قىزمەت ەتۋگە, ەل كونستيتۋتسياسى مەن زاڭدارىن قاتاڭ ۇستانۋعا, ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە, وزبەكستان رەسپۋبليكاسى پرەزيدەنتىنە جۇكتەلگەن مىندەتتەردى ادال ورىنداۋعا سالتاناتتى تۇردە انت ەتەمىن».