يرانمەن سوتتالعان ازاماتتاردى الماسۋ تۋرالى كەلىسىم جاسالدى

بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسى مەن يران يسلام رەسپۋبليكاسى اراسىنداعى سوتتالعان ادامداردى بەرۋ تۋرالى كەلىسىمدى راتيفيكاتسيالاۋ تۋرالى» قر زاڭ جوباسىن ماقۇلدادى, دەپ حابارلايدى قازاقپارات. «قاتىناستار دامىعاننان بەرى كاسىپكەرلىك جانە تۋريزم باعىتىندا ەل ازاماتتارىنىڭ اتالعان مەملەكەتكە ساپارلارى جيىلەپ كەلەدى. تەك بيىل يرانعا ءبىزدىڭ 320 ازاماتىمىز بارسا, ال قازاقستانعا 2346 يراندىق كەلدى. وزدەرىڭىز بىلەسىزدەر, وسى ەلدە جازالاۋدىڭ ۇزاق مەرزىمىن ەسكەرەتىن شاريعات زاڭدارى قامتىلعان. ءولىم جازاسى سانى بويىنشا يران تەك قىتايعا عانا جول بەرىپ وتىر. قازىرگى كەزدە يراندا سوتتالعان ءبىزدىڭ ادامدار جوق. الايدا, الداعى ۋاقىتتا دا ءبىزدىڭ ازاماتتار بولمايتىنا كەپىلدىك جوق. سوندىقتان دا ءبىزدىڭ مەملەكەت وتانداستارىمىزدى شەتەلدە قورعاۋ ءۇشىن قۇقىقتىق تەتىكتەرگە يە بولۋى ءتيىس», –  دەدى زاڭ جوباسى بويىنشا بايانداما جاساعان قر باس پروكۋرورىنىڭ ءبىرىنشى ورىنباسارى يوگان مەركەل. قۇجاتقا سايكەس, ەكى ەلدىڭ اراسىندا سوتتالعانداردى بەرۋ ۇدەرىستەرى كەلىسىلدى. ماسەلەن, ەگەر دە يراندا قازاقستاندىق بۇزاقىلىق ءۇشىن جەتى جىلعا جازاعا تارتىلسا, ۇكىم زاڭدى كۇشىنە ەنگەننەن كەيىن وسى ازامات نەمەسە ونىڭ زاڭدى وكىلى ەلىمىزدىڭ كونسۋلدىق مەكەمەلەرى ارقىلى جازانى ودان ءارى وتەۋى ءۇشىن قازاقستانعا اۋىستىرۋ تۋرالى پروكۋراتۋعا ءوتىنىش جاساۋى ءتيىس. ونىڭ سوزىنە قاراعاندا, سوتتالعانداردى ءوزارا بەرۋ شارالارى ەكى جاعدايدا باس تارتىلۋى مۇمكىن, ولار: ەگەمەندىككە, قوعامدىق تارتىپكە نۇقسان كەلتىرگەندە, ەكى تاراپتىڭ زاڭناماسىنا جانە مۇددەلەرىنە قايشى كەلگەندە. ايتا كەتەيىك, كەلىسىمگە وسى جىلدىڭ ساۋىرىندە مەملەكەت باسشىسىنىڭ يرانعا ساپارى اياسىندا قول قويىلدى.