الماتىنىڭ «قايرات» فۋتبول كومانداسىندا ونەر كورسەتەتىن اندرەي ارشاۆين «روسسيا 24» تەلەارناسىنىڭ «فۋتبول روسسي» باعدارلاماسىنا بەرگەن سۇحباتىندا قازاقستاندىق كلۋبپەن قالاي كەلىسىمشارتقا وتىرعانىن, كومانداسىنىڭ نە سەبەپتى پرەمەر-ليگا مەن قازاقستان كۋبوگىندا جەڭىلگەنىن, سونداي-اق ءوز وتانىنا قاشان ورالاتىنى تۋرالى اڭگىمەلەپ بەردى. بۇل تۋرالى vesti.kz حابارلادى.
قازاقستان كۋبوگىنىڭ فينالى كەزىندەگى اۋا رايى ىڭعايسىزدىق تۋدىرعانى كوپشىلىككە بەلگىلى. بۇل جونىندە ول: «جاپالاقتاپ جاۋعان قار اسەرىن تيگىزبەي قويمادى. ءوز باسىم ماتچتىڭ كەيىنگە شەگەرىلگەنىن قالاماس ەدىم. ونىڭ ۇستىنە سپورتقا قاتىستى ەمەس سەبەپتەرى دە بولدى. فۋتبول بولعاندىقتان, ويىنشىلار قانداي جاعدايعا بولماسىن دايىن بولۋى كەرەك. بۇل ماتچتا ءبىزدىڭ جوسپارىمىز ىسكە اسقانمەن, سوڭىنا تامان بەلسەندىلىگىمىز باياۋلاپ قالدى. ال «استانا» ءوز مۇمكىندىگىن پايدالانىپ, جەڭىستى گولدى سوعىپ كەتتى. استانالىقتار ەۋروپا ارەنالارىندا ونەر كورسەتىپ, ىسىلعان, ستراتەگيالارى دا بىرىزدىلىككە قويىلعان. قاتەلىگىمىزدى ءتيىمدى پايدالانا ءبىلدى. وسىدان كەيىن مۇنداي الاڭدا ونەر كورسەتۋ وڭايعا ءتۇستى. مەنىڭ ويىمشا, ولار تاجىريبەسىنىڭ مولدىعىنان ءبىزدى ۇتىپ كەتتى», – دەدى ارشاۆين.
الماتىدا مۇنداي اۋا رايىن ەشكىم كۇتپەگەن بولار دەگەن سۇراققا: «الماتى قالاسىنىڭ اۋا رايى وتە قولايلى. بىراق قىرسىق شالعاندا كۋبوك ساراپقا سالىناتىن كۇنى كۇتپەگەن جەردەن كۇن رايى بۇزىلدى. تابيعاتتىڭ توسىن سىيىنا قارسى قانداي شارا بار؟" دەپ جاۋاپ بەردى. سونىمەن قاتار سولتۇستىكتىڭ ادامىنا كۇننىڭ ىستىعى قانشالىقتى قيىندىق تۋدىرۋى مۇمكىن ەكەندىگىنە دە توقتالدى. «كەيدە ءوزىم دە تاڭ قالامىن. اۋا تەمپەراتۋراسى كۇندىز بەن كەشقۇرىم ۋاقىتتا ون گرادۋسقا دەيىن وزگەرەدى. مىسالى, كراسنوداردا تۇسكە تامان 30 گرادۋس بولسا, كۇن باتقاننان كەيىن دە سول كورسەتكىشتى كورسەتىپ تۇرادى. ويىندارىمىز كەشكە تامان وتەتىندىكتەن بىزگە وتە قولايلى», – دەدى جارتىلاي قورعاۋشى.
الماتىنىڭ ستاديونى ەلىمىزدەگى ەڭ ۇزدىك الاڭداردىڭ ءبىرى ەكەنى ءسوزسىز. بۇل تۋرالى ول: «ءيا, ول جاعى راس. تەك رەسپۋبليكا ايماعىندا عانا ەمەس, كوپتەگەن ەلدەردىڭ ستاديوندارىنان جاقسى دەپ ويلايمىن», – دەدى.
ارشاۆين اعىلشىننىڭ ايگىلى «ارسەنالىندا» ونەر كورسەتىپ, ءدۇيىم جۇرتتىڭ ىستىق ىقىلاسىنا بولەنگەننەن كەيىن ءوزى تۇلەپ ۇشقان «زەنيتكە» قايتا ورالعان. الايدا, جاسى كەلىپ, بۇرىنعى دەڭگەيىندە ويناي الماعاندىقتان «كۋبان» ۇجىمىنا اۋىسقان بولاتىن. مۇندا دا جولى بولا قويمادى. بۇل جونىندە ول: «انگليادان كەيىن وزگە ەلگە قونىس اۋدارعىم كەلمەدى. ال قازاقستاننىڭ ءجونى مۇلدەم بولەك. الماتىدا ءبارى ورىس ءتىلىن بىلەتىندىكتەن, ەش قيىندىق كورمەدىم», – دەدى «قايرات» ويىنشىسى.
«قايرات» پەن «استانا» اراسىنداعى فينالدىق كەزدەسۋگە قايتا ورالساق. ەستەرىڭىزدە بولسا, رەسەي قۇراماسىنىڭ بۇرىنعى كاپيتانى العاشقى تايمدا جارتىلاي قورعانىستا ويناعان بولسا, ەكىنشى 45 مينۋتتا شابۋىل شەبىندە ونەرىن پاش ەتتى. بۇل جونىندە ول: «مەن «زەنيتتە» دە, «ارسەنالدا» دا ءدال وسىلاي وينادىم. سول قاپتالدا شابۋىلعا ءجيى ارالاسىپ ءجۇردىم. مۇندا دا ءبارى سول قالپىندا. ايتارلىقتاي ءرولىم وزگەرگەن جوق», – دەدى.
قازاقستان چەمپيوناتىندا «قايرات» پەن «استاناعا» باسەكەلەستىك تۋدىرا الاتىن كوماندا بار ما دەگەن سۇراققا: «مەن كەلگەنگە دەيىن «اقتوبە» ەڭ ۇزدىك كوماندا بولاتىن. مەنىڭشە, قازاقستان فۋتبولىنىڭ جارقىن بەلەستەرىنىڭ ءدال وسى كوماندامەن تىكەلەي بايلانىسى بار. بىراق قازىر ءبارى باسقاشا. ولاردىڭ جاعدايى ازداپ قيىنداۋ. «استانا» مەن «قايراتقا» باسەكە بولا الاتىن ۇجىم... ەگەر كەستەگە كوز جۇگىرتەر بولساق, ەكىنشى جانە ءۇشىنشى ورىنداعى كوماندالاردى 23 ۇپاي ءبولىپ تۇر. وسىدان-اق كوپ نارسەنى تۇيسىنۋگە بولادى», – دەدى رەسەي قۇراماسىنىڭ بۇرىنعى كاپيتانى.
«استانا» بيىل ىشكى بىرىنشىلىكتى دە, ەل كۋبوگىن دا جەڭىپ الدى. ارشاۆين «قايراتتىڭ» مۇنداي جەتىستىككە قول جەتكىزۋىنە نە كەدەرگى بولۋى مۇمكىن ەكەنىنە دە توقتالدى: «بارىمىزگە بەلگىلى. ءبىز ماۋسىمنىڭ باسىن وتە ءساتسىز باستادىق. وكىنىشكە قاراي, ەلوردالىقتار قۋىپ جەتۋگە مۇمكىندىك بەرمەدى. جىل سوڭىنا دەيىن ءبارىن جوسپار بويىنشا ورىنداپ, ءبىرىنشى كەلدى», – دەدى.
رەسەيلىك اياقدوپشى الماتىنىڭ كلۋبىمەن كەلىسىمشارت مەرزىمىن 2017 جىلعا دەيىن ۇزارتقان بولاتىن. بۇل تۋرالى ول: «ەگەر زاڭدى تۇرعىدان ايتار بولساق, مەرزىمىم و باستا ەكى جىلعا كەلىسىلگەن. بىراق وسىعان دەيىن ايتقانىمداي, كلۋب باسشىلىعى قالاعان ۋاقىتىندا مەنىڭ قىزمەتىمنەن باس تارتا الادى. «قايراتتىڭ» پرەزيدەنتى ءبىر سوزىندە ترانسفەر ۋاقىتىندا مەنى اۋىستىرىپ جىبەرۋگە قۇقىلى ەكەنىن ايتقان بولاتىن. نەگىزى بۇعان مەنىڭ ەشقانداي قارسىلىعىم جوق. دەگەنمەن, بىرنەشە اپتا بۇرىن ول كىسى حابارلاسىپ, ويىنىما كوڭىلى تولاتىنىن, كەلىسىمشارت وزگەرىسسىز, سول قالپىندا قالاتىنىن ايتتى. ال ءوزىمنىڭ قالاۋىم بەلگىلى. ءبارى ىڭعايلى بولعاندىقتان, ازىرگە كەتكىم كەلمەيدى», – دەدى.
فۋتبولشىنىڭ جاسى 30-دان اسقاننان كەيىن فيزيكالىق تۇرعىدان بۇرىنعىداي ونەر كورسەتە المايتىنى بەلگىلى. بۇل جونىندە ول: «قازىر ماعان ەشنارسە قيىندىق تۋدىرمايدى. جاتتىعۋ الاڭىنا بارىپ, دوپ تەپكەن, جانكۇيەرلەر الدىندا بار قابىلەتىمدى كورسەتكەن ۇنايدى. ورتالىق ستاديوندا وتەتىن ماتچتاردىڭ ءجونى تىپتەن بولەك, 90 پايىز ۇتاتىنىڭدى ءبىلىپ, ەرەكشە ءبىر راحاتقا بولەنەسىڭ», – دەدى ول.
ال 25 پەن 35 جاس اراسىنداعى جاتتىعۋلاردا قانشالىقتى وزگەرىس بار دەگەن سۇراققا: «بۇل جەردە ءبارى باپكەردىڭ شەشىمىنە تىكەلەي بايلانىستى عوي. 25 جاسىمدا دەيسىز بە؟ 2006 جىل... ديك ادۆوكاتتىڭ كەزى بولاتىن. مەنىڭشە, ەش وزگەرىس جوق سياقتى. سول كەزدەگىدەي جاتتىعۋلار, كوپتەگەن ماتچتار...», – دەدى ول.
تەلەارناعا بەرگەن سۇحبات بارىسىندا ول رەسەي چەمپيوناتى جايلى دا ايتىپ ءوتتى: «رفپل ويىندارىن جىبەرمەي كورەتىن كەزدەرىم بولادى. ال كەيدە وعان ۋاقىتىم جەتپەيدى. ايتا كەتەرىم, چەمپيوناتتىڭ دەڭگەيى بۇرىنعىداي ەمەس. بۇنىڭ باستى سەبەبى, كوماندالاردىڭ بيۋدجەتى قۇلدىراعاننان دەپ ويلايمىن. سونداي-اق ۇلتتىق قۇرامانىڭ دا دارەجەسى تومەندەپ قالدى. ناشار ويىن كورسەتكەننەن كەيىن قاتاڭ سىنعا الاتىنداردىڭ قاراسى كۇن ساناپ ارتىپ بارادى. داۋرەنى جۇرگەن 2008 جىلدىڭ جاقىن ارالىقتا ورالاتىنىنا كۇمانىم بار. مۇنداي ويىنىمەن ەۋروپا نەمەسە الەم چەمپيوناتىنىڭ جارتىلاي فينالىندا وينايدى دەگەنگە اسا قاتتى سەنبەيمىن. رەسەيگە ورالۋ جاعىنا كەلەر بولساق, ەگەر قالاعانىمدا «كۋبان» ۇجىمىنان ەشقايدا كەتپەس ەدىم. ونىڭ ۇستىنە ىشكى بىرىنشىلىكتەگى ەكىنشى سەگىزدىكتە وينايتىن كلۋبتارعا اۋىسقىم كەلمەيدى», – دەدى «قايراتتىڭ» 28 ءنومىرلى ويىنشىسى.
