ىزگىلىكتىڭ ايقىن ايعاعى

قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ەل تاۋەلسىزدىگىنىڭ 25 جىلدىعىنا وراي راقىمشىلىق جاساۋ تۋرالى زاڭعا جاريا تۇردە قول قويعان بولاتىن. بۇل شەشىم كوپشىلىكتىڭ ۇلكەن ريزاشىلىعىن تۋعىزدى, ياعني امنيستيا قازاقستاندىقتار تاراپىنان ماڭىزدى ادامگەرشىلىك اكتسياسى رەتىندە قابىلدانىپ وتىر. تاۋەلسىزدىگىمىزدىڭ 25 جىلدىعىنا بايلانىستى جاريالانعان امنيس­تيانى وتە ورىندى مەيىرىمدىلىك اكتسياسى دەپ سانايمىن. ويتكەنى, كوپتەگەن ادام جاڭىلىستان, زاڭ تالابىن بىلمەگەندىكتەن دە قىلمىسقا اڭداماي بارۋى ابدەن مۇمكىن. بۇلاردى قىلمىسكەرلەر ەمەس, جازا باسقاندار دەپ ساناۋعا بولادى. ال سوت ولاردى زاڭ تالابىن بۇزعاندىعى ءۇشىن قىلمىسكەر دەپ تانىپ, باس بوستاندىعىنان ايى­رادى. مۇنداي ادامداردى قىلمىس الەمىنىڭ ىقپالىنا ءتۇسىپ كەتۋدەن ساقتاۋ ءۇشىن دە امنيستيا جاسالعانى وتە ورىندى. مەن امنيستيا تۋرالى زاڭ جوباسىمەن مۇقيات تانىستىم. وندا امنيستياعا ىلىگىپ, قوعامعا قايتارىلاتىنداردىڭ كوبىسى الەۋمەتتىك ءالجۋاز توپتاردىڭ وكىلدەرى. بۇلار مۇگەدەكتەر, كارى ادامدار, جاس بالاسى بار ايەلدەر جانە ت.س.س. مۇنداي تىزىمگە ىلىنەتىن 1500 ادامنىڭ 80 پايىزىنا جۋىعىنىڭ جازالارى باس بوستاندىعىن ايىرمايتىن, الايدا, پروباتسيا قىزمەتتەرىنىڭ باقىلاۋىندا بوستاندىعىن شەكتەۋ جازالارىمەن اۋىس­تىرىلادى. سونىمەن بىرگە, امنيستياعا جاتقىزىلعانداردىڭ اراسىندا ۇساق قىلمىس جاساعان 11 مىڭداي ادام بار. ولارعا جازا رەتىندە تۇزەۋ جۇمىستارىن اتقارۋ, سونداي-اق, ايىپپۇلدار سالىنعان. ەندى ولار جازادان تولىعىمەن بوسايتىن بولادى. ال اۋىر جانە اسا اۋىر قىلمىس جاساعانداردىڭ وتەلمەگەن جازاسىنىڭ مەرزىمدەرى ءارتۇرلى كولەمدەرگە قىسقارتىلادى. ءسويتىپ, بۇل امنيستيا وتە كوپ ادامعا جەڭىلدىك جاساپ وتىر. باس پروكۋروردىڭ دەرەكتەرىنە قاراعاندا, ول 28 مىڭعا جۋىق ادامدى قامتيدى. ارقايسىسىنىڭ تۋىستارى, بالالارى مەن جاقتاستارى 10 ادامنان دەگەننىڭ وزىندە ول 300 مىڭعا جۋىق ادامدى قۋانتارى ءسوزسىز. سوندىقتان بۇل ىزگىلىك اكتسياسىن تاۋەلسىزدىگىمىزدىڭ 25 جىلدىعىنا لايىقتى تارتۋ دەپ سانايمىن. مارات ءباشىموۆ, زاڭ عىلىمدارىنىڭ دوكتورى