مىقتىلاردىڭ ءوزىن مويىنداتقان

قازاق بالالارى تاۋەلسىزدىكتىڭ 25 جىلدىعىنا كەرەمەت تارتۋ جاسادى «تەگىندە, ادام بالاسى ادام بالاسىنان اقىل, عىلىم, ار, مىنەز دەگەن نارسەلەرمەن وزباق. ونان باسقا نارسەمەنەن وزدىم عوي دەمەكتىڭ ءبارى دە – اقىماقتىق». كورەگەن اباي ەلدىڭ ەل بولۋى ءۇشىن كەرەكتى نارسەنى 2-اق سويلەمگە ءتۇيىپ ايتىپ كەتتى. اباي ءسوزىن ۇققان وتكەن عاسىرلارداعى قارا تانىمايتىن تالاي قازاق بالاسى بىلىمگە ۇمتىلدى. سول ۇل-قىزداردىڭ ارقاسىندا بىزگە تاۋەلسىزدىكتىڭ دە تاڭى سىبىرلەگەنى وتىرىك ەمەس. ال ەركىندىك كەلەشەك ۇرپاققا ۇلكەن مۇمكىندىكتەردىڭ ەسىگىن اشتى. بۇل مۇمكىندىكتەردى ءمۇلت جىبەرمەي كەلە جاتقان قازاق بالالارى دا جوق ەمەس. كۇنى كەشە مەكتەپ وقۋشىلارى اراسىندا ينفورماتيكادان وتكەن «بۇكىلرەسەيلىك كوماندالىق وليمپيادانى» تۇڭعىش رەت قازاق بالالارى ۇتىپ الدى. اتى رە­سەي­لىك بولعانىمەن بۇل وليمپيادانى اشىق چەمپيونات دەپ ايتقان ءجون. تمد ەلدەرى بويىنشا جارىسقا جىل سايىن 200-دەن استام كوماندا قاتىسادى. 2000 جىل­دان بەرى جارىس 16 رەت وتكىزىلسە, سو­نىڭ 12-سىندە رەسەيلىك, 4-ەۋىندە بەلورۋس­تىق بالالار جەڭىمپاز اتانعان ەكەن. قازاقستاندىقتاردىڭ ەڭ جوعارعى ناتيجەسى – 2013 جىلعى 6-ورىن. مۇنداي ۇلكەن دارەجەدە وتەتىن ينفورماتيكالىق وليمپيادادا ءساتتى ونەر كورسەتكەندەردىڭ بولاشاقتا Google, Facebook, Twitter سىندى تانىمال كومپا­نيا­لاردا جۇمىس جاساۋ مۇمكىندىكتەرى مول. رەسەيلىك وقۋشىلاردى ستۋدەنتتەر ارا­سىن­دا جىل سايىن وتەتىن الەم چەمپيو­نا­تىن الما-كەزەك ۇتىپ جۇرەتىن سول ەل ۋني­­­ۆەر­سيتەتتەرىنىڭ مۇعالىمدەرى جاتتىق­تىرا­دى. الايدا, قانشا مىقتى دەگەنمەن, رەسەي­­لىك وقۋشىلار بيىل قازاقستاندىق قۇرا­ماعا جول بەردى. چەمپيوندىق كومان­دا­­نىڭ قۇرا­مىن­دا بولىپ, التىن مەدال الۋعا اتسا­لىس­قاندار: استانالىق قازاق-تۇرىك ليتسەيى­نىڭ وقۋ­شىسى سانجار بيدايبەك جانە ال­ما­تى­لىق قازاق-تۇرىك ليتسەيىنىڭ وقۋشى­لارى اسحات جالعاسوۆ پەن نۇرباقىت ماديبەك. بولاشاقتا IT سالاسىنداعى الەمنىڭ كوش­باسشى كومپانيالارىندا جۇمىس جاساۋ­دى ارماندايتىن بۇل بالالار تاۋەل­سىز­دىكتىڭ 25 جىلدىعىنا كەرەمەت تارتۋ جاسا­دى دەپ نىق سەنىممەن ايتۋعا بولادى. گۇلزەينەپ سادىرقىزى, «ەگەمەن قازاقستان»