پارتيا ۇيىمدارىنىڭ ۇزدىكتەرى اتالدى

كەشە «نۇر وتان» پارتياسىنىڭ ورتالىق اپپاراتىندا «نۇر وتان» پارتياسىنىڭ ۇزدىك قوعامدىق قابىلداۋى» رەسپۋبليكالىق بايقاۋىنىڭ جەڭىمپازدارىن ماراپاتتاۋ سالتاناتى ءوتتى. قوعامدىق قابىلداۋلاردىڭ جۇمىسىن ىنتالاندىرۋ مەن جاقسارتۋ ماقساتىندا 2010 جىلدان بەرى «نۇر وتان» پارتياسىنىڭ ۇزدىك قوعامدىق قابىلداۋى» رەسپۋبليكالىق بايقاۋى جىل سايىن وتكىزىلىپ كەلەدى. ءتورت جىل قاتارىنان وتكىزىلگەن بايقاۋلار پارتيانىڭ قوعامدىق قابىلداۋىنىڭ جۇمىسىن جانداندىرۋدا وڭ ناتيجەلەر بەردى. ال بيىلعى جىلدىڭ باستى ەرەكشەلىگى مەن جاڭالىعى وڭىرلەردىڭ جانە ايماق فيليالدارىنىڭ «ۇزدىك قوعامدىق قابىلداۋى» بايقاۋى «ۇزدىك دەپۋتات», «ۇزدىك مەملەكەتتىك ورگان» جانە «ۇزدىك قىزمەتكەر» سياقتى جاڭا اتالىمدارمەن تولىقتى. تيىمدىلىك پەن ارىزدانۋشىلاردىڭ ماسەلەلەرىن شەشۋدەگى قوعامدىق قابىلداۋ جۇمىستارىنىڭ ناتيجەلىلىگى رەسپۋبليكالىق بايقاۋ جەڭىمپازدارىن انىقتاۋداعى نەگىزگى ولشەم بولدى. بايقاۋعا ۇسىنىلعان ماتەريالدار جان-جاقتى جانە ءادىل قارالىپ, سونىڭ نەگىزىندە پارتيانىڭ وڭىرلىك جانە ايماقتىق فيليالدارىنىڭ اراسىنداعى ەڭ ۇزدىك قوعامدىق قابىلداۋلار انىقتالدى. بايقاۋ جەڭىمپازدارى ديپ­لومدارمەن جانە باعالى سىيلىقتارمەن ماراپاتتالدى. ماراپاتتالعانداردىڭ اراسىندا «ءبىلىم» (الماتى وبلىسى), «قازاقتەلەكوم» (قوستاناي وبلىسى), «قازپلاست» (قاراعاندى وبلىسى), «تەپلوترانزيت» (استانا قالاسى), «بىرلىك» (اتىراۋ وبلىسى) جانە باسقا باستاۋىش ۇيىمدارى بار. ال بايقاۋدىڭ «ۇزدىك دەپۋتات» اتالىمى بويىنشا ءماجىلىس دەپۋتاتتارى ماۋلەن اشىمباەۆ پەن ەرسۇلتان بەكتۇرعانوۆ جەڭىمپاز دەپ تانىلدى. سونداي-اق, وسى ءىس-شارادا «نۇر وتان» پارتياسىنىڭ 2017 جىلعى ەڭ ۇزدىك قوعامدىق قابىلداۋى» رەسپۋبليكالىق بايقاۋى باستاۋ الدى. سونىمەن قاتار, ەڭ ۇزدىك باستاۋىش پارتيا ۇيىمدارىن انىقتاۋ جانە ولاردىڭ جۇمىس ىستەۋ تاجىريبەسىن تاراتۋ ماقساتىندا «نۇر وتان» پارتياسى جىل قورىتىندىسىنىڭ ناتيجەسى بويىنشا ۇزدىك باستاۋىش پارتيا ۇيىمىنىڭ دا (بپۇ) بايقاۋىن وتكىزدى. بايقاۋ بىرنەشە كەزەڭنەن تۇردى, ۇزدىكتەردى رەسپۋبليكالىق كوميسسيانىڭ مۇشەلەرى ىرىكتەدى. بايقاۋ ماقساتى – ەڭ ۇزدىك باستاۋىش پارتيا ۇيىمدارىن انىقتاۋ, ولاردىڭ جۇمىس ىستەۋ تاجىريبەسىن باسقا وڭىرلەرگە تاراتۋ, ولاردى پارتيالىق جانە باسقا دا سايلانبالى قىزمەتكە ۇسىنۋ ءۇشىن باستاۋىش پارتيا ۇيىمدارىنداعى بەلسەندى جانە كاسىبي شەبەرلىگى جوعارى توراعالاردان پارتيانىڭ كادرلارىن جاساقتاۋ. سونداي-اق, بپۇ اراسىنداعى باسەكەلەستىك رۋحتى قالىپتاستىرۋ, ماراپاتتاۋ مەن ىنتالاندىرۋ جولىمەن بپۇ جۇمىسىنىڭ تيىمدىلىگىن ارتتىرۋ, جۇمىس ىستەۋ تاجىريبەسىمەن ءبولىسۋدى قامتاماسىز ەتۋ, ەل تاۋەلسىزدىگىنىڭ 25 جىلدىعى قارساڭىنداعى قازاقستاندىقتاردىڭ ءومىر ءسۇرۋ ساپاسىن جاقسارتۋعا باعىتتالعان پارتيالىق مىندەتتەردى ىسكە اسىرۋداعى بپۇ ۇلەسىن بەلگىلەۋ-بايقاۋدىڭ ماقساتى بولىپ تابىلادى. كونكۋرس اشىق تۇردە وتكىزىلەدى جانە ءۇش كەزەڭنەن تۇرادى – وڭىرلىك, ايماقتىق جانە ورتالىق. وعان بپۇ-نىڭ ءۇش ساناتى دا قاتىسا الادى. ءار سانات ءۇشىن ءۇش اتالىم بويىنشا ءۇش جۇلدەلى ورىن بەلگىلەنگەن. ءداستۇر بو­يىنشا ءۇشىنشى اتالىمداعى ءۇشىنشى ورىندى ەكى باستاۋىش پارتيا ۇيىمى ءوزارا بولىسەدى. ىرىكتەۋدەگى ولشەمدەردىڭ ىشىندە پارتيالىق جوبالاردى ىسكە اسىرۋعا قاتىسۋ, ىشكى پارتيالىق جۇمىستىڭ ساپاسى, جاستارمەن جۇمىس ىستەۋدە جاڭا تاسىلدەردى قولدانۋ جانە باسقا دا كورسەتكىشتەر بار. بايقاۋدىڭ بارلىق كەزەڭدەرى بەكىتىلگەن بايقاۋ ەرەجەسىنە سايكەس وتكىزىلەدى. باستاۋىش پارتيا ۇيىمى پارتيانىڭ ۇيىمداستىرۋشىلىق نەگىزگى وزەگى بولىپ تابىلادى جانە مىندەتتەردىڭ جەرگىلىكتى جەرلەردە جوسپارلى جۇزەگە اسۋىنا مۇرىندىق بولادى, ءوز مۇشەلەرى اراسىنداعى اقپاراتتىق-ناسيحاتتىق, تۇسىندىرمە جۇمىستارىن ىسكە اسىرادى, پارتيالىقتاردىڭ جارعىلىق تالاپتاردى مۇلتىكسىز ورىنداۋىن قامتاماسىز ەتەدى. ءىس-شارا بارىسىندا, سونداي-اق قوعامداعى جەمقورلىققا قارسى مادەنيەتتى قالىپتاستىرۋعا جانە ارتتىرۋعا باعىتتالعان رەسپۋبليكالىق كاريكاتۋرا بايقاۋىنىڭ جەڭىمپازدارى دا ماراپاتتالدى. بەلگىلى كاريكاتۋراشى ايداربەك عازيز ۇلى وسى بايقاۋ كوميسسياسىنىڭ مۇشەسى بولعانىن اتاپ وتكەن ءجون. ءاليسۇلتان قۇلانباي, «ەگەمەن قازاقستان»