ەقىۇ باس حاتشىسى قازاقستاندى الەمدىك قاۋىمداستىققا ۇلگى ەتتى

ەۋروپاداعى قاۋىپسىزدىك پەن ىنتىماقتاستىق ۇيىمىنىڭ باس حاتشىسى لامبەرتو زانەر قازاقستاننىڭ باسقارۋ تاجىريبەسى ءتۇيىندى ماسەلەلەردى شەشۋ جولىندا سەرپىلىس بەرەتىنىن ايتتى, دەپ حابارلايدى حابار24. ۇيىم باسشىسىنىڭ ايتۋىنشا, قازىر الەمدىك قاۋىمداستىق تەرروريزم تورىنا شىرمالىپ, سودىرلار لەگىنىڭ اعىلۋ قاۋپى ءتوندى, ميگرانتتار سانى ارتىپ, راديكالدانۋ بەلەڭ الدى. لامبەرتو زانەر مۇنداي پروبلەمالاردى شەشۋ ءۇشىن قازاقستان سەكىلدى سەنىمدى سەرىكتەستىڭ بولۋى ماڭىزدى دەپ سانايدى. "مەن ەۋروپاداعى قاۋىپسىزدىك جانە ىنتىماقتاستىق ۇيىمىندا قازاقستان قالدىرعان مۇرانىڭ ماڭىزى تۋرالى ايتۋدان جالىقپايمىن. قازاقستاننىڭ 25 جىلدا تاۋەلسىز ەل رەتىندە قول جەتكىزگەن جەتىستىكتەرىنە كۋا بولا وتىرىپ, بۇۇ-مىمەن بىرگە ءبىزدىڭ ۇيىمنان دا ويىپ تۇرىپ العان ورنىمەن قۇتتىقتايمىز. ۇيىم جەتەكشىسى رەتىندەگى وكىلەتتىلىگىم بىتپەي تۇرعاندا, 2017 جىلى بولاتىن ەكسپو كورمەسىنە قاتىسۋدى كوزدەپ وتىرمىن. ال قازاقستاننىڭ بۇۇ-مىنىڭ قاۋىپسىزدىك كەڭەسىنە مۇشە بولىپ سايلانۋى - ەلدى الەمدىك قاۋىمداستىقتىڭ ايماقتا جانە جاھاندىق دەڭگەيدە تانىعانىنىڭ ايقىن دالەلى بولا الادى. قازاق ەلى باسشىسىنىڭ يدەيالارى وتە وزەكتى. قازاقستاننىڭ يادرولىق قارۋدان باس تارتۋى جانە ونى تاراتپاۋ جولىندا قوسىپ وتىرعان ۇلەسى الەمدىك قاۋىمداستىق مۇشەلەرى ءۇشىن ۇلگى بولارلىق باستاما دەپ ايتا الامىن", - دەيدى لامبەرتو زانەر.