ىزدەنىس ءىستى ىلگەرىلەتەدى

تاۋەلسىز ەلىمىزدىڭ جىگەرلى, ءبىلىمدى جاستارىن تاربيەلەۋ – ۇستازداردىڭ باستى پارىزى. ۇستازدار قاۋىمى بۇل ورايدا وزدەرىنە جۇكتەلگەن مىندەتتى ابىرويمەن اتقارىپ ءجۇر. مەن بەينەۋ پوليتەحنيكالىق كوللەدجىندە 2004 جىلدان بەرى جۇمىس جاساپ كەلەمىن. جاس بۋىنعا تەحنيكالىق مامان­دىق­تار بويىنشا تەك ءبىلىم بەرىپ قانا قويماي, ولاردىڭ كوللەدج قابىرعاسىندا ءجۇرىپ-اق ءتاجى­ريبە جيناپ, ماماندىعىنا قاتىس­تى قۇرالدارمەن ەرتە باس­تان شۇ­عىلدانعانى ءجون دەپ ەسەپ­تەيمىن جانە مۇنداي مۇمكىندىكتىڭ جاس­تاردىڭ ءوز مامان­دىعىن تەزى­رەك مەڭگەرىپ كەتۋىنە بەرەر اسەرى كوپ. مەملەكەت باسشىسى ن.نازار­باەۆتىڭ «قازىرگى زاماندا جاس­تارعا اقپاراتتىق تەحنولوگيامەن بايلانىستى الەمدىك ستاندارتقا ساي مۇددەلى جاڭا ءبىلىم بەرۋ وتە قاجەت», دەگەن تاپسىرماسىن ءوزىم ساباق بەرەتىن «ەسەپتەۋ تەح­نيكاسى جانە باعدارلامالىق قامتاماسىزداندىرۋ» مامان­دى­عىندا تۇراقتى نەگىزگە الىپ كەلەمىن. ءبىلىم بەرۋ – كۇردەلى ءىس. اقپا­راتتىق تەحنولوگيا زامانىندا جاستاردى قاراپايىم ساباق بەرۋ ءادىس-تاسىلدەرىمەن قىزىقتىرۋ مۇمكىن ەمەس. سوندىقتان, بىلىكتى مامانداردىڭ ءىس-تاجىريبەسىنە سۇيەنە وتىرىپ جانە ونى ودان ءارى دامىتا ەڭبەك ەتۋ قاجەت. بۇل ۇستازدان جان-جاقتىلىقتى, تالماي ىزدەنۋدى تالاپ ەتەدى. اسىرەسە, اۋىلدىق جەرلەردەگى ءبىلىم بەرۋ ۇيىمدارىنىڭ جاعدايى ۇستازعا جۇكتەلەر مىندەتتىڭ سالماعىن ەكى ەسەلەي تۇسەدى. قولدا باردى ۇقساتىپ, جوقتان بار جاساپ جۇمىس ىستەۋ كەرەكتىگىن ۇعىندىق. وسى ويمەن 2006 جىلدان باستاپ ءۇش كۋرستا وقىتىلاتىن بارلىق مالىمەتتەر جيناقتالعان ەلەكتروندى وقۋلىقتار قۇراستىرىپ شىعاردىق, قازىر ول وقۋلىقتار كوللەدج ستۋدەنتتەرىنە قىزمەت ەتۋدە. كوللەدجدە عيماراتتى باقىلاۋعا, مۇعالىمدەرگە ۆيرتۋالدى تۇردە ساباقتارعا قاتىسىپ ءوزارا تاجىريبە الماسۋى ءۇشىن بەينەكامەرالار ورنالاستىردىق. شالعاي اۋىلداردا جاستاردى ءوندىرىس ورىندارىنا تۇراقتى اپارىپ, ءوندىرىس الاڭدارىندا قۇرال-جابدىقتارمەن جۇمىس جاساتۋ مۇمكىندىگى شەكتەۋلى, ءارى وندىرىستىك قاۋىپسىزدىك ماسە­لەسى تۇرعىسىنان قويىلاتىن تالاپتار دا ءىستى جۇزەگە اسىرۋعا وڭتايلى بولا بەرمەيدى. سون­دىقتان وندىرىستىك جابدىق­تار­دىڭ قولجەتىمدىلىگىن ارتتىرۋ ماقساتىندا كوللەدج قابىر­عا­سىندا «Beyneu Software» اتتى شى­عارماشىلىق توپ قۇرىپ, سيمۋ­لياتور-ترەناجيورلار جاساۋ­دى قولعا الدىق. ناتيجەسىندە, «مۇناي جانە گاز ءىسى», «اۆتوكولىك قۇرىلىسى» ماماندىقتارى بويىنشا مۋلتيمەديالىق ەلەكتروندى وقۋلىق جاساپ شىقتىق جانە «تەپلوۆوز ءماشينيسى», «مۇناي جانە گاز كەن ورىندارىن پايدالانۋ» جانە «مۇنايدى قايتا وڭدەۋ تەحنولوگياسى» ماماندىقتارىنا ارنالعان وقۋ-جاتتىعۋ سيمۋلياتور-ترەناجەرلار دايىنداپ شىعاردىق. شاعىن ماكەتتەردى پايدالانىپ ءبىلىم العان وقۋشىلارىمىز ماڭ­عىستاۋ وبلىسىنىڭ ءبىلىم بەرۋدى اقپاراتتاندىرۋ وقۋ-ادىستەمەلىك ورتالىعىنىڭ «ەڭ ۇزدىك ۆەب-سايت» بايقاۋىنىڭ بىرنەشە دۇركىن جەڭىمپازدارى اتاندى. كوللەدجىمىزدە بەينەۋ اۋدانىن سۋلاندىرۋ ماقساتىندا سالىنىپ جاتقان سۋ تۇندىرۋ ستانساسىنا قاجەتتى ماماندار قىسقا مەرزىمدى كۋرستاردا ءبىلىم الۋدا. وقۋ جىلىنىڭ سوڭىنا دەيىن سۋ ماماندارىنا ارنالعان ينتەراكتيۆتى ماكەت دايىنداۋدى ماقسات ەتتىك. ءىس-تاجىريبەمىز وبلىس كولەمىندە تاراتىلىپ, ءبىز دايىنداعان ماكەتتەر بىرنەشە كورمەگە قويىلدى. تاجىريبە الماسۋ, ءوز بىلگە­نىڭ­دى وزگەلەرمەن ءبولىسۋ, وزگە ءارىپ­تەستەردەن ۇيرەنۋ – مۇعالىمدىك قىزمەتتىڭ ەڭ باستى شارتى. وسى ورايدا ءتۇرلى دەڭگەيدەگى سە­مي­­نارلارعا قاتىسىپ, ءتاجى­ريبە الماسىپ كەلەمىز. 2012 جىلى گەرمانيانىڭ حامەلن قالاسىنداعى ويگەن راينتە­سا جانە ساۋدا-ساتتىق مەكتەپ­تە­رىندە ەلىمىزدەگى كاسىپتىك جانە تەحنيكالىق ءبىلىم سالاسىنا دۋالدى وقىتۋ جۇيەسىن ەنگىزۋ ماقساتىندا ۇيىمداستىرىلعان تاعلىمدامادان ءوتتىم. ءبىلىم بەرۋ سالاسىنداعى جۇمىسىم ەلەۋ­سىز قالعان جوق. وبلىستىق, رەسپۋبليكالىق دارەجەدەگى ءتۇر­لى ماراپاتتارعا قول جەتكىزىپ, بيىل ءبىلىم جانە عىلىم مي­نيستر­لىگى تاراپىنان «ۇزدىك پەداگوگ-2016» جۇلدەسىنە يە بولدىم. ماراپات الۋ دا, ونى تىزبەلەپ ايتۋ دا ماقسات ەمەس, ەرىنبەي ەڭ­بەك ەتسەڭ, ونى ەلەيتىن ەلىڭ بار ەكەندىگىن ايتۋ – ماقسات. ۇستاز­دىق قىزمەتتىڭ قىزىعى مەن قيىندىعىن قاتار كوتەرىپ, ەلىمىزدىڭ ەر­تە­ڭىن دايىنداۋ جولىندا ىزدەنىسپەن ەڭبەك ەتە بەرەتىن بولامىز. تۇرلان وسپانوۆ, بەينەۋ پوليتەحنيكالىق كوللەدجىنىڭ جوعارى ساناتتى ارنايى ءپان مۇعالىمى ماڭعىستاۋ وبلىسى, بەينەۋ اۋدانى